ໂຄງການຮັກສາພະຍາດຫົວໃຈແຕ່ກໍາເນີດຂອງເດັກ ຢູ່ບັນດາປະເທດລຸ່ມແມ່ນໍ້າຂອງ (MCHC) ໄດ້ດໍາເນີນພາລະກິດປິ່ນປົວເດັກນ້ອຍ ທີ່ເປັນພະຍາດຫົວໃຈພິການແຕ່ກໍາເນີດຄັ້ງທຳອິດໄດ້ປະສົບຜົນສຳເລັດ ທີ່ໂຮງໝໍມະໂຫສົດ ໃນວັນທີ 7 ກຸມພາຜ່ານມາ.
ໃນລະຫວ່າງພາລະກິດເປັນເວລາ 1 ມື້ນີ້ ເດັກນ້ອຍຈຳນວນ 3 ຄົນ ທີ່ໄດ້ຮັບການບົ່ງມະຕິພະຍາດວ່າເປັນໂຣກຫົວໃຈພິການແຕ່ກຳເນີດ (Congenital Heart Disease: CHD) ໄດ້ຮັບການຮັກສາແບບຫັດຖະ ການ (Interventional Treatment) ຢ່າງທັນເວລາ ໃນຈຳນວນ 3 ກໍລະນີດັ່ງກ່າວ ມີ 1 ກໍລະນີ ຖືກກວດພົບຜ່ານກິດຈະກຳຄັດກອງ CHD ໃນໂຮງຮຽນ ທີ່ໂຄງການໄດ້ຈັດຂຶ້ນຢູ່ແຂວງຫຼວງພະບາງ ໃນເດືອນທັນວາ 2025 ແລະ ອີກ 2 ກໍລະນີ ໄດ້ຮັບການສົ່ງຕໍ່ມາຈາກໂຮງໝໍມະໂຫສົດ ສິ່ງນີ້ສະທ້ອນໃຫ້ເຫັນເຖິງແນວທາງການເຮັດວຽກແບບເຊື່ອມໂຍງການກວດພົບໃນໄລຍະເລີ່ມຕົ້ນ ກັບການຮັກສາທາງການແພດຢ່າງມີປະສິດທິຜົນ ພາລະ ກິດໃນຄັ້ງນີ້ ນັບເປັນຈຸດໝາຍສຳຄັນຂອງໂຄງການ ໂດຍການຮ່ວມມືລະຫວ່າງ ສະຖາບັນການຮ່ວມມືເພື່ອການພັດທະນາເສດຖະກິດລຸ່ມແມ່ນ້ຳຂອງ (Mekong Institute – MI)
ກະຊວງສາທາລະນະສຸກ ສປປ ລາວ ແລະ ໂຮງໝໍ Fuwai ແລະ ສະຖາບັນວິທະຍາສາດການແພດຈີນ ໂຄງການໄດ້ຮັບການສະໜັບສະໜູນຈາກລັດຖະ ບານສາທາລະນະລັດປະຊາຊົນຈີນ ຜ່ານກອງທຶນການພັດທະນາໂລກ ແລະ ການຮ່ວມມືໃຕ້–ໃຕ້ (Global Development and South–South Cooperation Fund) ພາຍໃຕ້ໂຄງການນີ້ ໂຮງໝໍ Fuwai ໄດ້ສົ່ງທີມແພດສະເພາະທາງຫຼາຍສາຂາມາສົມທົບ ປະກອບດ້ວຍແພດຜູ້ຊຳນານການຮັກສາຫົວໃຈດ້ວຍຫັດຖະການ 2 ຄົນ ຜູ້ຊຳນານດ້ານອັລຕຣາຊາວ 1 ຄົນ ແລະ ພະຍາບານສະເພາະທາງ 1 ຄົນ ໂດຍນຳໃຊ້ວິທີການ PAN ທີ່ພັດທະນາໂດຍໂຮງໝໍ Fuwai ທີມແພດໄດ້ດຳເນີນການຮັກສາຫົວໃຈແບບບໍ່ຕ້ອງຜ່າຕັດໃຫຍ່ ຊຶ່ງມີລັກສະນະບໍ່ໃຊ້ລັງສີ ການບາດເຈັບນ້ອຍ ແລະ ຟື້ນຕົວໄວ ເໝາະສົມຢ່າງຍິ່ງສຳລັບການຮັກສາເດັກນ້ອຍ ໃນພື້ນທີ່ ທີ່ມີຊັບ ພະຍາກອນຈຳກັດ
ພ້ອມກັນນັ້ນ, ເພື່ອສອດຄ່ອງກັບເປົ້າໝາຍການພັດທະນາສັກກະຍະພາບ ບຸກຄະລາກອນແພດຈາກໂຮງໝໍມະໂຫສົດ ໄດ້ເຮັດວຽກຄຽງຂ້າງກັບຜູ້ຊຳນານຈາກໂຮງໝໍ Fuwai ຕະຫຼອດຂັ້ນຕອນການຮັກສາ ການຮ່ວມມື
ແບບປະຕິບັດຈິງນີ້ ໄດ້ຊ່ວຍໃຫ້ເກີດການຖ່າຍທອດຄວາມຮູ້ ແລະ ທັກສະວິຊາຊີບຢ່າງເປັນຮູບປະທຳ ອັນເປັນການເສີມສ້າງສັກກະຍະພາບແຫ່ງຊາດ ໃນການເບິ່ງແຍງຫົວໃຈເດັກນ້ອຍ.
ໂຄງການຮັກສາພະຍາດຫົວໃຈແຕ່ກໍາເນີດຂອງເດັກ ຢູ່ບັນດາປະເທດລຸ່ມແມ່ນໍ້າຂອງ (MCHC) ມີເປົ້າ ໝາຍໃນການໃຫ້ການຮັກສາໂດຍບໍ່ເສຍຄ່າໃຫ້ເດັກນ້ອຍຢ່າງໜ້ອຍ 30 ຄົນ ທີ່ເປັນໂຣກຫົວໃຈແຕ່ກຳເນີດ ໃນ ສປປ ລາວ ເພື່ອຂະຫຍາຍໂອກາດໃນການເຂົ້າຮັບບໍລິການ ຮັກສາຫົວໃຈເດັກນ້ອຍທີ່ຊ່ວຍຊີວິດໃຫ້ເດັກນ້ອຍ ແລະ ຄອບຄົວທີ່ຂາດແຄນ.
ຂ່າວ: ວຽງຈັນໃໝ່
