ວັນທີ 11 ກັນຍາ 2026 ຕາມການລາຍງານຂອງຂອງ ທ່ານ ປາຮົນ ພິລາວັນ ກໍາມະການພັກເມືອງ ຫົວໜ້າຫ້ອງການ ໂຍທາທິການ ແລະ ຂົນສົ່ງເມືອງນາໝໍ້ ໄດ້ລາຍງານໃຫ້ຮູ້ວ່າ: ເສັ້ນທາງຄົມມະນາຄົມພາຍໃນເມືອງນາໝໍ້ ໄດ້ຮັບຜົນກະທົບໄພທໍາມະຊາດເສຍຫາຍຢ່າງຫຼວງຫຼາຍ ໃນໄພພິບັດນໍ້າຖ້ວມເມືອງນາໝໍ້ ລະວ່າງວັນທີ 29-30 ສິງຫາ 2026 ຜ່ານມາ.
ໃນ 3 ຕາແສງທົ່ວເມືອງ ໂດຍສະເພາະແມ່ນເສັ້ນທາງ, ຂົວ ແລະ ລະບົບນໍ້າປະປາ ການສັນຈອນໄປມາຂອງບັນດາບ້ານ ຫາເທດສະບານເມືອງຖຶກຕັດຂາດ, ລວມທັງເສັ້ນທາງຫຼວງແຫ່ງຊາດ 13 ເໜືອ, ທາງຫຼວງແຂວງ ແລະ ທາງຫຼວງທ້ອງຖິ່ນ.
ຜ່ານການລົງເກັບກໍາຂໍ້ມູນ ປະເມີນຄວາມເສຍຫາຍເບື້ອງຕົ້ນ ເຫັນວ່າ ມີ 14 ຕອນທາງ ທີ່ໄດ້ຮັບຜົນກະທົບ ເສຍຫາຍ, ບໍ່ສາມາດສັນຈອນໄປມາໄດ້ ສໍາລັບທາງຫຼວງແຫ່ງຊາດ ພາຍຫຼັງທີ່ໄດ້ຮັບຜົນກະທົບ ພວກເຮົາໄດ້ເລັ່ງແກ້ໄຂ ສໍາເລັດພາຍໃນ 2 ວັນ ເພື່ອເປີດການສັນຈອນ. ການປະເມີນມູນຄ່າຄວາມເສຍຫາຍເພື່ອແກ້ໄຂສຸກເສີນເບື້ອງຕົ້ນປະມານ 20 ກວ່າຕື້ກີບ ແລະ ຕ້ອງການງົບປະມານເພື່ອມາພື້ນຟູຄືນປະມານ 60 ກວ່າຕື້ກີບ.
ທ່ານຍັງໃຫ້ຮູ້ວ່າ: ປະຈຸບັນນີ້ ກໍາລັງເລັ່ງເຂົ້າແກ້ໄຂຕອນທາງ 1803 ຊ່ວງ ກມ 20 ເຂົ້າຫາບ້ານມູຕືນ ດ່ານພູຫຼັກຄໍາ ຖ້າສະພາບດິນຟ້າອາກາດອໍານວຍ ຝົນບໍ່ຕົກ ວັນທີ 12 ກັນຍາ 2026 ຈະໃຫ້ສາມາດເປີດການສັນຈອນໄດ້ ຈາກນັ້ນພວກເຮົາກໍ່ຈະສືບຕໍ່ແກ້ໄຂສຸກເສີນຕອນທາງຕ່າງໆ ຕາມບູລິມະສິດທີ່ພວກເຮົາວາງແຜນໄວ້ ແລະ ການແກ້ໄຂສຸກເສີນຕອນທາງທັງໝົດຈະໃຫ້ສໍາເລັດຢູ່ໃນຕົ້ນເດືອນ ຕຸລາ 2026.
———
ຂ່າວໃໝ່-ໂຄສະນາເມືອງນາໝໍ້
