ເກີດເຫດສັ່ນສະເທືອນຂຶ້ນ ຂະນະທີ່ຜູ້ສື່ຂ່າວ ແລະ ຊ່າງພາບຂອງສະຖານີໂທລະພາບ ອັນ-ມານາ (Al-Manar) ໃນເລບານອນ ກຳລັງລາຍງານຂ່າວສົດກ່ຽວກັບເຫດການໂຈມຕີຂອງອິດສະຣາແອນ ແຕ່ກັບຖືກໂຈມຕີຊ້ຳໃນໄລຍະປະຊິດ ສົ່ງຜົນໃຫ້ທັງສອງຄົນໄດ້ຮັບບາດເຈັບຈາກສະເກັດລະເບີດ.
ເຫດການດັ່ງກ່າວເກີດຂຶ້ນຢູ່ເມືອງ ນາບາຕິເຍ (Nabatieh) ທາງຕອນໃຕ້ຂອງເລບານອນ ຂະນະທີ່ຜູ້ສື່ຂ່າວ ແລະ ຊ່າງພາບຂອງສະຖານີໂທລະພາບ ອັນ-ມານາ ເຊິ່ງຢູ່ພາຍໃຕ້ການຄວບຄຸມຂອງກຸ່ມຮິສໂບເລາະ (Hezbollah) ກຳລັງລາຍງານຂ່າວການໂຈມຕີຂອງອິດສະຣາແອນ.
ພາບທີ່ເຜີຍແຜ່ເທິງໂລກອອນໄລນ໌ ສະແດງໃຫ້ເຫັນຜູ້ສື່ຂ່າວກຳລັງລາຍງານຂ່າວສົດຢູ່ໃກ້ກັບມັດສະຍິດ ຮຸສເຊນິຍະ (Husseinyeh) ຢູ່ໃຈກາງເມືອງນາບາຕິເຍ ໃນເວລາປະມານ 20:00 ໂມງ ຂອງວັນອາທິດ ກ່ອນຈະເກີດການໂຈມຕີລະລອກທີສອງໃກ້ກັບຈຸດທີ່ເຂົາຢືນຢູ່ ເຮັດໃຫ້ຜູ້ສື່ຂ່າວໄດ້ຮັບບາດເຈັບຈາກສະເກັດລະເບີດບໍລິເວນຂາ ແລະ ແຂນ ສ່ວນຊ່າງພາບກໍໄດ້ຮັບບາດເຈັບເຊັ່ນກັນ. ທາງສະຖານີລະບຸວ່າ ທັງສອງຄົນມີອາການຊົງໂຕ ແລະ ກຳລັງຢູ່ລະຫວ່າງການຜ່າຕັດ.
ເຫດການນີ້ເກີດຂຶ້ນທ່າມກາງການໂຈມຕີທາງອາກາດຂອງອິດສະຣາແອນຫຼາຍລະລອກທົ່ວພື້ນທີ່ທາງຕອນໃຕ້ຂອງເລບານອນ ໂດຍກະຊວງສາທາລະນະສຸກເລບານອນລາຍງານວ່າ ມີຜູ້ເສຍຊີວິດຢ່າງໜ້ອຍ 10 ຄົນ ຮວມທັງແມ່ຍິງ ແລະ ເດັກນ້ອຍ ໂດຍ 8 ຄົນເສຍຊີວິດຈາກການໂຈມຕີອາຄານແຫ່ງໜຶ່ງຢູ່ເມືອງ ຄຟາ ຣຸມມານ (Kfar Roummane) ແລະ ມີເຈົ້າໜ້າທີ່ກູ້ໄພເສຍຊີວິດອີກ 1 ຄົນ ຈາກການໂຈມຕີໃສ່ລົດ.
ທາງດ້ານກອງທັບອິດສະຣາແອນລະບຸວ່າ ການໂຈມຕີດັ່ງກ່າວແມ່ນການໂຕ້ຕອບ ຫຼັງຈາກກຸ່ມຮິສໂບເລາະໄດ້ສົ່ງໂດຣນຕິດລະເບີດເຂົ້າໂຈມຕີກອງກຳລັງອິດສະຣາແອນ ພ້ອມທັງລະບຸວ່າ ໄດ້ໂຈມຕີສະມາຊິກຮິສໂບເລາະທີ່ຖືກກ່າວຫາວ່າລຳລຽງອາວຸດໃນພື້ນທີ່ເມືອງ ຄຟາ ຣຸມມານ ຂະນະທີ່ກຸ່ມຮິສໂບເລາະຍັງບໍ່ທັນໄດ້ອອກມາອ້າງໂຕວ່າເປັນຜູ້ກໍ່ເຫດໂຈມຕີດັ່ງກ່າວ.
