ຂ່າວຈາກ ແຂວງບໍ່ແກ້ວ ໃຫ້ຮູ້ວ່າ: ການນຳແຂວງບໍ່ແກ້ວ ມອບເງິນຊ່ວຍເຫລືອ 100 ລ້ານກີບ ໃຫ້ແຂວງອຸດົມໄຊ ເພື່ອນຳໃຊ້ເຂົ້າໃນການຊ່ວຍເຫລືອ ແລະ ບັນເທົາຜົນກະທົບຈາກໄພນ້ຳຖ້ວມໃນເດືອນສິງຫາຜ່ານມາ ທີ່ເຮັດໃຫ້ປະຊາຊົນ, ຊັບສິນ ແລະ ພື້ນຖານໂຄງລ່າງບາງສ່ວນໄດ້ຮັບຜົນກະທົບເສຍຫາຍເປັນຈຳນວນຫລາຍ.
ພິທີມອບ-ຮັບເງິນຊ່ວຍເຫລືອດັ່ງກ່າວ ໄດ້ຈັດຂຶ້ນ ໃນວັນທີ 8 ກັນຍາ 2026 ທີ່ນະຄອນຫລວງວຽງຈັນ ຕາງໜ້າມອບໂດຍ ທ່ານ ພົນຈັດຕະວາ ແປ້ນຄຳ ບຸດຈັນແພງ ເລຂາພັກແຂວງ ປະທານສະພາປະຊາຊົນ ແຂວງບໍ່ແກ້ວ ແລະ ຕາງໜ້າຮັບໂດຍທ່ານ ບຸນຄົງ ຫລ້າຈຽມພອນ ເລຂາພັກແຂວງ ປະທານສະພາປະຊາຊົນ ແຂວງອຸດົມໄຊ.
ການມອບເງິນຊ່ວຍເຫລືອໃນຄັ້ງນີ້ ເປັນການສະແດງເຖິງນ້ຳໃຈ, ຄວາມສາມັກຄີ ແລະ ການເອື້ອອາທອນຊ່ວຍເຫລືອເຊິ່ງກັນ ແລະກັນ ລະຫວ່າງສອງແຂວງບໍ່ແກ້ວ-ອຸດົມໄຊ ໃນຍາມທີ່ປະຊາຊົນປະສົບຄວາມລຳບາກ ພ້ອມທັງເປັນການຮ່ວມແຮງຮ່ວມໃຈຟື້ນຟູຊີວິດການເປັນຢູ່ຂອງປະຊາຊົນ ພາຍຫລັງປະສົບໄພພິບັດ ໃຫ້ກັບເຂົ້າສູ່ສະພາບປົກກະຕິໂດຍໄວ.
ໂອກາດນີ້, ທ່ານ ບຸນຄົງ ຫລ້າຈຽມພອນ ຕາງໜ້າໃຫ້ປະຊາຊົນບັນດາເຜົ່າແຂວງອຸດົມໄຊ ໄດ້ສະແດງຄວາມຂອບໃຈມາຍັງຄະນະນຳ ແລະ ປະຊາຊົນແຂວງບໍ່ແກ້ວ ທີ່ໄດ້ມີນ້ຳໃຈອັນດີງາມ ໃຫ້ການຊ່ວຍເຫລືອໃນຄັ້ງນີ້ ຊຶ່ງຈະເປັນກຳລັງໃຈສຳຄັນໃຫ້ແກ່ປະຊາຊົນຜູ້ປະສົບໄພ ແລະ ຈະນຳເງິນຊ່ວຍເຫລືອຄັ້ງນີ້ ໄປນຳໃຊ້ໃຫ້ເກີດປະໂຫຍດສູງສຸດ.
ການຮ່ວມສົ່ງຕໍ່ນ້ຳໃຈຊ່ວຍເຫລືອໃນຄັ້ງນີ້ ນັບເປັນອີກໜຶ່ງການສະແດງເຖິງຄວາມສາມັກຄີ ແລະ ຄວາມເອື້ອອາທອນຂອງພາກສ່ວນຕ່າງໆ ເພື່ອຮ່ວມກັນຝ່າຟັນຜົນກະທົບຈາກໄພທຳມະຊາດ ແລະ ຟື້ນຟູຊີວິດການເປັນຢູ່ຂອງປະຊາຊົນໃຫ້ກັບຄືນສູ່ພາວະປົກກະຕິໂດຍໄວ.
ຂ່າວ: ຈ.ຈັນທະລິດ
