ໃນເວລາ 09:00 ໂມງເຊົ້າ ຂອງວັນທີ 06 ກໍລະກົດ 2026, ພາຍຸໝູນເຂດຮ້ອນ ໄມສັກ (Maysak) ເຊິ່ງເປັນພາຍຸຫົວທີ 10 ປະຈຳປີ 2026 ໄດ້ອ່ອນກຳລັງລົງເປັນພາຍຸດີເປຣຊັນແລ້ວ ແລະ ຄາດວ່າຈະອ່ອນກຳລັງລົງຕື່ມອີກເປັນຍ່ານຄວາມກົດດັນອາກາດຕ່ຳປົກຄຸມຢູ່ເຂດພາກໃຕ້ຂອງປະເທດຈີນ.
ເຖິງແມ່ນວ່າ ສປປ ລາວ ຈະໄດ້ຮັບພຽງຜົນກະທົບທາງອ້ອມ, ແຕ່ເນື່ອງຈາກມໍລະສຸມຕາເວັນຕົກສ່ຽງໃຕ້ທີ່ພັດປົກຄຸມຍັງມີກຳລັງແຮງ, ຈຶ່ງຈະເຮັດໃຫ້ມີຝົນຕົກ, ຟ້າຮ້ອງ, ຟ້າເຫຼື້ອມ ໃນລະດັບຄ່ອຍເປັນບໍລິເວນກວ້າງ, ແລະ ມີຝົນຕົກປານກາງ ຫາ ຕົກໜັກ ພ້ອມມີລົມພັດແຮງເປັນບາງໂອກາດຢູ່ບາງທ້ອງຖິ່ນໃນແຕ່ລະພາກ ໂດຍຈະຕົກຕິດຕໍ່ກັນໃນໄລຍະໜຶ່ງອາທິດໜ້າ ແຕ່ວັນທີ 06 ຫາ 12 ກໍລະກົດ 2026.
ດັ່ງນັ້ນ, ກົມອຸຕຸນິຍົມ ແລະ ອຸທົກກະສາດ ຈຶ່ງໄດ້ແຈ້ງເຕືອນເຖິງປະຊາຊົນບັນດາເຜົ່າ, ອົງການປົກຄອງທ້ອງຖິ່ນ ແລະ ອົງການຈັດຕັ້ງທຸກພາກສ່ວນໃນແຕ່ລະພາກ ລວມທັງນະຄອນຫຼວງວຽງຈັນ ໃຫ້ເພີ່ມຄວາມລະມັດລະວັງ ແລະ ກຽມພ້ອມຮັບມືກັບສະພາບຝົນຕົກໜັກຕິດຕໍ່ກັນຫຼາຍວັນ ທີ່ອາດຈະເຮັດໃຫ້ເກີດມີດິນເຈື່ອນ, ນ້ຳປ່າໄຫຼຫຼາກ, ນ້ຳຖວມຊື່ງ, ແລະ ນ້ຳຖວມອັ່ງໃນຕົວເມືອງ ພ້ອມທັງໃຫ້ຕິດຕາມຂ່າວພະຍາກອນອາກາດຢ່າງໃກ້ຊິດ.
