ໃນວັນທີ 26 ມິຖຸນາ 2026 ພະແນກຕຳຫຼວດຄຸ້ມຄອງຄົນຕ່າງປະເທດ ຫ້ອງສັນຕິບານ ຮ່ວມກັບ ພະແນກຕຳຫຼວດເສດຖະກິດ ຫ້ອງຕຳຫຼວດ ກອງບັນຊາການ ປກສ ແຂວງຄໍາມ່ວນ ໄດ້ນໍາສົ່ງຕົວຜູ້ຖືກຫາສໍ້ໂກງຊັບທາງໂທລະຄົມ ແລະ ການສື່ສານ ( ແກ້ງສະແກມເມີ ) ຈໍານວນ 115 ຄົນ ຍິງ 7 ຄົນ ໃຫ້ກົມຄຸ້ມຄອງຄົນຕ່າງປະເທດ ກົມໃຫຍ່ສັນຕິບານ ກະຊວງປ້ອງກັນຄວາມສະຫງົບ.
+ ຜູ້ຖືກຫາຈໍານວນດັ່ງກ່າວແມ່ນເຈົ້າໜ້າທີ່ ປກສ ແຂວງຄໍາມ່ວນ ກັກຕົວໃນວັນທີ 20 ມິຖຸນາ 2026 ຢູ່ທີ່ຮ້ານຄາຣາໂອເກະ KTV ຊຽວຕົງບູ ຕັ້ງຢູ່ບ້ານນາຄຳ ເມືອງໜອງບົກ ແຂວງຄຳມ່ວນ ສາມາດຈັບຕົວເປົ້າໝາຍໄດ້ 65 ຄົນ ມີສັນຊາດຈີນ ຈຳນວນ 54 ຄົນ, ສັນຊາດມຽນມາ ຈຳນວນ 7 ຄົນ ຍິງ 3 ຄົນ, ສັນຊາດເອທິໂອເປຍ ຈຳນວນ 3 ຄົນ ແລະ ສັນຊາດຢູເຄຣນ ຍິງ 1 ຄົນ. ພ້ອມດ້ວຍຂອງກາງປະເພດ ຄອມພິວເຕີ້ຕັ້ງໂຕະ 65 ໜ່ວຍ , ຄອມພິວເຕີ້ໂນດບຸກ 4 ໜ່ວຍ , ໂທລະສັບມືຖື 420 ໜ່ວຍ ແລະ ໃນວັນທີ 23 ມິຖຸນາ 2026 ຢູ່ທີ່ຣີສອດ ໂອເຟັນວີວ ເຂດບ້ານຖ້ຳ ເມືອງທ່າແຂກ ແຂວງຄຳມ່ວນ ສາມາດກັກຕົວເປົ້າໝາຍໄດ້ ທັງໝົດຈຳນວນ 50 ຄົນ ຍິງ 3 ຄົນ. ເຊິ່ງເປັນສັນຊາດຈີນທັງໝົດ ພ້ອມທັງຢືດຂອງກາງປະເພດຄອມພີວເຕີຕັ້ງໂຕະໄດ້ 72 ໜ່ວຍ, ປິ່ນເຕີ 2 ເຄື່ອງ ແລະ ໂທລະສັບມືຖືຈຳນວນ 337 ເຄື່ອງ.
+ ການສົ່ງຕົວຜູ້ຖືກຫາຄັ້ງນີ້ ລລວມມີສັນຊາດ ຈີນ 104 ຄົນ ຍິງ 3 ຄົນ, ສັນຊາດມຽນມາ 7 ຄົນ ຍິງ 3 ຄົນ, ສັນຊາດເອທິໂອເປຍ 3 ຄົນ ແລະ ສັນຊາດຍູເຄນ ຍິງ 1 ຄົນ ພ້ອມເຄື່ອງຂອງກາງມີ ຄອມພີວເຕີ ຕັ້ງໂຕະ ຈໍານວນ 137 ຫນ່ວຍ, ຄອມພີວເຕີໂນດບຸກ 4 ຫນ່ວຍ, ໂທລະສັບມືຖື 757 ຫນ່ວຍ ແລະ ເຄື່ອງປີ່ນເຕີ 2 ເຄື່ອງ.
+ ທັງນີ້ກໍເພື່ອມອບໃຫ້ກົມຕໍາຫຼວດຄຸ້ມຄອງຄົນຕ່າງປະເທດ ກົມໃຫຍ່ສັນຕິບານ ກະຊວງປ້ອງກັນຄວາມສະຫົງບ ນໍາຕົວພວກກ່ຽວໄປດໍາເນີນຄະດີຕາມລະບຽບກົດຫມາຍແຫ່ງ ສ ປປ ລາວ. ເຊິ່ງກຸ່ມແກ້ງສະແກມເມີດັ່ງກ່າວມີການເຄື່ອນໄຫວ ແລະ ລະເມີດຕໍ່ລະບຽບກົດຫມາຍ ວ່າດ້ວຍການເຂົ້າ-ອອກ ແລະ ຄຸ້ມຄອງຄົນຕ່າງປະເທດ ຢູ່ ສ ປປ ລາວ, ດໍາເນີນທຸລະກິດ, ປະກອບອາຊີບໂດຍບໍ່ໄດ້ຮັບອານຸຍາດ ແລະ ລັກລີ້ຊອນຢູ່ ສ ປປ ລາວ ນອກຈາກນັ້ນ,ຍັງເຄື່ອນໄຫວກໍ່ອາດສະຍາກໍາໂດຍການສໍ້ໂກງຊັບທາງໂທລະຄົມ ແລະ ການສື່ສານ ຢູ່ ສ ປປ ລາວ.
ພາບ-ຂ່າວ ປກສ ແຂວງຄໍາມ່ວນ
