ຈາກການລາຍງານຂອງ ທີມງານເກັບກູ້ລະເບີດ MAG ໃຫ້ຮູ້ວ່າ: ເມື່ອບໍ່ດົນມານີ້, ທີມງານບູລະນະເສັ້ນທາງ ໄດ້ພົບລະເບີດລູກໂບ່ມ ໜັກ 750 ປອນ ໃນລະຫວ່າງທີ່ພວກເຂົາກໍາລັງສ້ອມແປງຖະໜົນ ຢູ່ທີ່ບ້ານວັງຄົນ, ເມືອງບົວລະພາ, ແຂວງຄຳມ່ວນ, ໝາກໂບ່ມໃຫຍ່ດັ່ງກ່າວຢູ່ຫ່າງຈາກເສົາໄຟຟ້າ ທີ່ເປັນເສົາໄຟຫຼັກຂອງຊຸມຊົນ ບໍ່ເທົ່າໃດແມັດ.
ພາຍຫຼັງໄດ້ຮັບການລາຍງານ ທີມງານເກັບກູ້ລະເບີດຂອງອົງການແມັກ (MAG) ທີ່ໄດ້ຮັບທຶນສະໜັບສະໜູນຈາກ Restoration Laos ໄດ້ຮີບຮ້ອນລົງພື້ນທີ່ທັນທີ. ທີມງານໄດ້ວາງແຜນຢ່າງຮອບຄອບ ແລະ ນຳໃຊ້ມາດຕະການຄວາມປອດໄພທີ່ເຂັ້ມງວດ ລວມທັງເຮັດການປະເມີນວ່າໂບ່ມໃຫຍ່ດັ່ງກ່າວສາມາດເຄື່ອນຍ້າຍໄດ້ ຈຶ່ງເຮັດການເຄື່ອນຍ້າຍໄປສະໜາມທໍາລາຍທີ່ປອດໄພ ແລະ ຫ່າງໄກຈາກຊຸມຊົນ ເພື່ອຮັບປະກັນວ່າການທຳລາຍໂບ່ມໃຫຍ່ນີ້ຈະສົ່ງຜົນກະທົບຕໍ່ການດໍາເນີນຊີວິດຂອງຊາວບ້ານໃຫ້ໜ້ອຍທີ່ສຸດ.
ການພົບເຫັນວັດຖຸອັນຕະລາຍຄືແນວນີ້ ສະທ້ອນໃຫ້ເຫັນວ່າ ໃນ ສປປ ລາວ ຍັງມີລະເບີດບໍ່ທັນແຕກທີ່ເປັນອັນຕະລາຍຕົກຄ້າງຢູ່. ດ້ວຍເຫດນີ້ ວຽກງານເກັບກູ້ລະເບີດ ແລະ ການສະໜັບສະໜູນຢ່າງຕໍ່ເນື່ອງ ຈຶ່ງມີຄວາມສຳຄັນ ເພື່ອຮັບປະກັນຄວາມປອດໄພຂອງຊຸມຊົນ ແລະ ໃຫ້ພວກເຂົາສາມາດນຳໃຊ້ທີ່ດິນໄດ້ຢ່າງປອດໄພ.
ທີ່ມາຂ່າວ: MAG UXO Visitor Information Centres, Lao PDR
