ທ່າມກາງພາລະກິດການຄົ້ນຫາຜູ້ປະສົບໄພທີ່ຕິດຄ້າງຢູ່ພາຍໃນຖ້ຳ ທີ່ເຕັມໄປດ້ວຍຄວາມກົດດັນ ແລະ ຄວາມຍາກລຳບາກ, ຫຼ້າສຸດໄດ້ມີພາບຄວາມປະທັບໃຈທີ່ສັງຄົມອອນລາຍ ແລະ ປະຊາຊົນລາວ ຕ່າງພາກັນຍົກຍ້ອງ ແລະ ກ່າວເຖິງຢ່າງຫຼວງຫຼາຍ ກ່ຽວກັບເລື່ອງລາວຂອງໄວຮຸ່ນອາສາກະຕັນຍູຄົນໜຶ່ງ ທີ່ຖືກຂະໜານນາມໃຫ້ເປັນ “ຮີໂຣໂຕນ້ອຍ ຜູ້ຢູ່ດ່ານໜ້າ”ຮີໂຣໂຕນ້ອຍ ຜູ້ບໍ່ຮູ້ອິດຮູ້ເມື່ອຍ
ບຸກຄົນທີ່ກຳລັງເປັນກະແສຊື່ນຊົມໃນຂະນະນີ້ຄື “ນ້ອງຄິວ” ໄວຮຸ່ນອາຍຸ 15 ປີ ເຊິ່ງເປັນຄົນທ້ອງຖິ່ນ ທີ່ໄດ້ເຂົ້າຮ່ວມປະຕິບັດໜ້າທີ່ໃນພາລະກິດກູ້ໄພຄັ້ງປະຫວັດສາດ ຢູ່ທີ່ຖ້ຳ ບ້ານພັນໄຊ, ເມືອງລ້ອງແຈ້ງ, ແຂວງໄຊສົມບູນ
ຕະຫຼອດໄລຍະເວລາການດຳເນີນພາລະກິດ, ຈະເຫັນພາບນ້ອງຄິວຢູ່ຮ່ວມກັບທີມງານກູ້ໄພລາວ-ໄທ ແລະ ຜູ້ຊ່ຽວຊານດ້ານການດຳນ້ຳ-ປີນຖ້ຳຈາກຕ່າງປະເທດ ຢ່າງບໍ່ຮູ້ອິດຮູ້ເມື່ອຍ. ດ້ວຍຄວາມທີ່ນ້ອງເປັນຄົນ “ຕົວນ້ອຍ ແລະ ຈ່ອຍກວ່າໝູ່” ເຮັດໃຫ້ນ້ອງກາຍເປັນກຳລັງສຳຄັນ ທີ່ອາສາຢ່ອນຕົວ ແລະ ຄານມຸດເຂົ້າໄປໃນຊ່ອງຫຼີບຫີນ ຫຼື ໂພງຖ້ຳທີ່ມີຄວາມຄັບແຄບຫຼາຍໆຈຸດ ເຊິ່ງຜູ້ໃຫຍ່ຮູບຮ່າງໃຫຍ່ບໍ່ສາມາດເຂົ້າໄປໄດ້ ເພື່ອເຂົ້າໄປສຳຫຼວດ ແລະ ປູທາງໃນການຄົ້ນຫາສັນຍານຊີວິດ
ຄວາມກ້າຫານ, ຄວາມຕັ້ງໃຈ ແລະ ຈິດໃຈອາສາຂອງນ້ອງຄິວໃນໄວພຽງ 15 ປີ ໄດ້ສ້າງຄວາມປະທັບໃຈໃຫ້ກັບທີມກູ້ໄພນານາຊາດ ແລະ ປະຊາຊົນທີ່ຕິດຕາມຂ່າວສານຢ່າງສຸດຊຶ້ງ. ຫຼາຍຄົນຕ່າງເຂົ້າມາສະແດງຄວາມຂອບໃຈ ແລະ ອວຍພອນໃຫ້ນ້ອງປອດໄພໃນທຸກໆຍ່າງກ້າຂອງການປະຕິບັດງານ.
