ປກສ ແຂວງວຽງຈັນ ລາຍງານວ່າ: ວັນທີ 1-2 ມິຖຸນາ 2026 ເຈົ້າໜ້າທີ່ວິຊາສະເພາະ ພະແນກຕຳຫລວດຄຸ້ມຄອງຄົນຕ່າງປະເທດ ຫ້ອງສັນຕິບານ ແລະ ພະແນກຕໍາຫລວດເສດຖະກິດຫ້ອງຕຳ ຫລວດ ກອງບັນຊາການ ປກສ ແຂວງວຽງຈັນ ໂດຍສົມທົບກັບກົມຕຳຫລວດຄຸ້ມຄອງຄົນຕ່າງປະ ເທດ ກົມໃຫຍ່ສັນຕິບານ ກະຊວງປ້ອງກັນຄວາມສະຫງົບ ກວດກາຄົນຕ່າງປະເທດທີ່ເຂົ້າມາເຊົ່າເຮືອນພັກ ແລະ ເຮືອນຂອງປະຊາຊົນ ເພື່ອເປັນບ່ອນເຄື່ອນໄຫວກໍ່ອາຊະຍາກຳທາງລະບົບອິນເຕີເນັດ ຫລື ຄໍເຊັນເຕີ ຈຳນວນ 3 ຈຸດ ພາຍໃນແຂວງວຽງຈັນ ຄື:
– ເຮືອນພັກແອຄຳ ບ້ານຂັນໝາກ ເມືອງວັງວຽງ ແຂວງວຽງຈັນ ພົບເຫັນຄົນຕ່າງປະເທດ ທັງໝົດ ຈຳນວນ 16 ຄົນ, ມີ 2 ສັນຊາດ, ສັນຊາດຈີນ 15 ຄົນ, ສັນຊາດສິງກະໂປ 1 ຄົນ,
– ເຮືອນປະຊາຊົນ ບ້ານນາປູນ, ເມືອງແກ້ວອຸດົມ, ແຂວງວຽງຈັນ ພົບເຫັນຄົນຕ່າງປະເທດທັງໝົດ 8 ຄົນ, ຍິງ 3 ຄົນ; ມີ 2 ສັນຊາດ, ສັນຊາດຟີລິບ 7 ຄົນ, ຍິງ 3 ຄົນ, ສັນຊາດມາເລເຊຍ 1 ຄົນ,
– ເຮືອນປະຊາຊົນ ບ້ານເວີນສານ, ເມືອງວຽງຄຳ, ແຂວງວຽງຈັນ ພົບເຫັນຄົນຕ່າງປະເທດ ທັງໝົດ ຈຳນວນ 25 ຄົນ, ຍິງ 5 ຄົນ ເປັນສັນຊາດມາເລເຊຍ ທັງໝົດ.
ຜ່ານການກວດກາ ພົບເຫັນເອກະສານໜັງສືຜ່ານແດນ (PASSPORT) ທັງໝົດ ຈຳນວນ 35 ຫົວ ກວດພົບເຄື່ອງມືອີເລັກໂຕນິກ ແລະ ເຄືອງມືອື່ນໆ ຈຳນວນຫລາຍລາຍການ ທີ່ນຳໃຊ້ເຂົ້າໃນການ ເຄື່ອນໄຫວກະທຳຜິດເຈົ້າໜ້າທີ່ວິຊາສະເພາະ ຈຶ່ງໄດ້ກັກຕົວພວກກ່ຽວ ພ້ອມດ້ວຍເອກະສານ ແລະ ເຄື່ອງມືອີເລັກໂຕນິກຕ່າງໆ ມອບໃຫ້ກົມຕຳຫລວດຄຸ້ມຄອງຄົນຕ່າງປະເທດ ກົມໃຫຍ່ສັນຕິບານ ກະຊວງປ້ອງກັນຄວາມສະຫງົບ ເພື່ອສືບຕໍ່ດໍາເນີນຄະດີຕໍ່ພວກກ່ຽວ ຕາມລະບຽບກົດໝາຍ.
