ອິນເດຍຢືນຢັນສືບຕໍ່ເດີນໜ້າສ້າງສາຍສຳພັນກັບມຽນມາ ຫຼັງນາຍົກລັດຖະມົນຕີ ນະເຣນທຣາ ໂມດີ ພົບຫາລືກັບປະທານາທິບໍດີ ມິນ ອ່ອງ ຫຼ່າຍ ທ່າມກາງສຽງວິຈານຈາກຊາດຕາເວັນຕົກ.
ວັນທີ 2 ມິຖຸນາ 2569 ທ່ານ ວິກຣຳ ມິດສຣີ ລັດຖະມົນຕີຊ່ວຍວ່າການກະຊວງການຕ່າງປະເທດອິນເດຍ ກ່າວວ່າ ລັດຖະບານອິນເດຍຢືນຢັນຈະສືບຕໍ່ຮັກສາຄວາມສຳພັນ ແລະ ຫາລືກັບມຽນມາຢ່າງຕໍ່ເນື່ອງ ຫຼັງນາຍົກລັດຖະມົນຕີ ນະເຣນທຣາ ໂມດີ ພົບຫາລືກັບ ພົນເອກ ມິນ ອ່ອງ ຫຼ່າຍ ຜູ້ນຳລັດຖະບານມຽນມາ ທີ່ນະຄອນນິວເດລີ ໃນວັນຈັນທີ່ຜ່ານມາ ເຖິງວ່າມຽນມາຍັງຄົງປະເຊີນກັບມາດຕະການຄວ່ຳບາດຈາກຫຼາຍປະເທດຕາເວັນຕົກ ນັບຕັ້ງແຕ່ການລັດຖະປະຫານໃນປີ 2564.
ທ່ານ ວິກຣຳ ກ່າວວ່າ ໃນລະຫວ່າງການຫາລື ຜູ້ນຳອິນເດຍ ແລະ ມຽນມາ ໄດ້ສົນທະນາປະເດັນຄວາມຮ່ວມມືດ້ານການຄ້າ ຄວາມໝັ້ນຄົງ ການປ້ອງກັນປະເທດ ການຄຸ້ມຄອງຊາຍແດນ ລວມທັງການຂະຫຍາຍຄວາມຮ່ວມມືດ້ານເສດຖະກິດ ເທັກໂນໂລຊີ ພະລັງງານ ແລະ ແຮ່ທາດສຳຄັນ ໂດຍລະບຸວ່ານະໂຍບາຍຂອງອິນເດຍທີ່ມີຕໍ່ມຽນມານັ້ນ ບໍ່ໄດ້ມຸ້ງໝາຍສະແດງທ່າທີຕໍ່ໂຄງສ້າງການເມືອງພາຍໃນ ພ້ອມລະບຸວ່າ ອິນເດຍເຊື່ອໝັ້ນວ່າການມີສ່ວນຮ່ວມ ແລະ ການຕິດຕໍ່ພົວພັນຢ່າງຕໍ່ເນື່ອງຄືແນວທາງທີ່ເໝາະສົມທີ່ສຸດ ໂດຍເນັ້ນວ່າ ການຕັດຂາດຄວາມສຳພັນບໍ່ຊ່ວຍໃຫ້ເກີດຜົນໄດ້ຜົນເສຍທີ່ດີກວ່າ.
ເຖິງວ່າຫຼັງການຫາລື ນາຍົກລັດຖະມົນຕີ ໂມດີ ແລະ ມິນ ອ່ອງ ຫຼ່າຍ ຈະບໍ່ໄດ້ແຖລງຂ່າວຮ່ວມຕໍ່ສື່ມວນຊົນຄືກັນກັບການພົບປະທວິພາຄີທົ່ວໄປ ແຕ່ລັດຖະບານອິນເດຍຢືນຢັນວ່າ ຄວາມຮ່ວມມືກັບມຽນມາຍັງຄົງເປັນສ່ວນສຳຄັນຂອງຍຸດທະສາດດ້ານຄວາມໝັ້ນຄົງ ແລະ ການພັດທະນາຂອງນິວເດລີໃນພາກພື້ນອາຊີໃຕ້ ແລະ ອາຊີຕາເວັນອອກສ່ຽງໃຕ້.
ທັງນີ້ ການຢ້ຽມຢາມຄັ້ງນີ້ຖືເປັນຄັ້ງທຳອິດທີ່ ມິນ ອ່ອງ ຫຼ່າຍ ເດີນທາງຢ້ຽມຢາມອິນເດຍ ນັບຕັ້ງແຕ່ຮັບຕຳແໜ່ງປະທານາທິບໍດີມຽນມາໃນເດືອນເມສາທີ່ຜ່ານມາ ພາຍຫຼັງການເລືອກຕັ້ງທີ່ຖືກວິຈານວ່າເປັນຄວາມພະຍາຍາມສືບທອດອຳນາດຂອງກອງທັບ ຊຶ່ງການພົບກັນຂອງຜູ້ນຳທັງສອງໄດ້ເກີດຂຶ້ນທ່າມກາງສຽງຕຳນິຈາກກຸ່ມສິດທິມະນຸດ ທີ່ມອງວ່າ ການເປີດຮັບຜູ້ນຳມຽນມາອາດຖືກຕີຄວາມໝາຍວ່າເປັນການສ້າງຄວາມຊອບທຳໃຫ້ແກ່ລັດຖະບານທະຫານ.
