ກອງທັບເກົາຫຼີໃຕ້ຈັດການຊ້ອມຮົບຍິງຈິງຄັ້ງໃຫຍ່ທີ່ເມືອງໂພຊອນ ທາງພາກເໜືອຂອງປະເທດ ສະແດງຄວາມພ້ອມ ແລະ ສັກຍະພາບການປະຕິບັດການຮ່ວມຂອງກອງທັບ ທ່າມກາງສະຖານະການຄວາມໝັ້ນຄົງໃນຄາບສະໝຸດເກົາຫຼີທີ່ຍັງຄົງຕຶງຕຽງ.
ການຊ້ອມຮົບຄັ້ງນີ້ໄດ້ນຳຍຸດໂທປະກອນເຂົ້າຮ່ວມຫຼາຍເຖິງ 457 ລາຍການ ຄອບຄຸມທັງກຳລັງພາກພື້ນດິນ ແລະ ທາງອາກາດ ໂດຍອາວຸດສຳຄັນທີ່ຖືກນຳມາສະແດງປະກອບດ້ວຍ ລົດຖັງຫຼັກ K2 Black Panther, ປືນໃຫຍ່ອັດຕາຈອນ K9, ເຄື່ອງຍິງຈະຫຼວດຫຼາຍລຳກ້ອງ, ເຮລີຄອບເຕີໂຈມຕີ ລວມທັງເຄື່ອງບິນຂັບໄລ່ KF-21 ຊຶ່ງເປັນເຄື່ອງບິນລົບລຸ້ນໃໝ່ທີ່ເກົາຫຼີໃຕ້ພັດທະນາຂຶ້ນເອງ.
ພາຍໃນງານມີຜູ້ເຂົ້າຮ່ວມຊົມປະມານ 1,900 ຄົນ ທັງເຈົ້າໜ້າທີ່ດ້ານຄວາມໝັ້ນຄົງ, ບຸກຄະລາກອນທາງທະຫານ ແລະ ຜູ້ສັງເກດການ ຊຶ່ງຖືເປັນໜຶ່ງໃນການສາທິດກຳລັງລົບຂະໜາດໃຫຍ່ຂອງເກົາຫຼີໃຕ້ໃນໄລຍະທີ່ຜ່ານມາ.
ກະຊວງກາລະໂຫມເກົາຫຼີໃຕ້ລະບຸວ່າ ການຝຶກຄັ້ງນີ້ມຸ່ງເນັ້ນການສະແດງເຈດຈຳນົງດ້ານການປ້ອງກັນປະເທດແບບພຶ່ງພາຕົນເອງ ເທິງພື້ນຖານຂີດຄວາມສາມາດທາງທະຫານຂອງເກົາຫຼີໃຕ້ເອງ ພ້ອມທັງເນັ້ນຍ້ຳເຖິງສັກຍະພາບຂອງກອງທັບໃນການຮັບມືໄພຂົ່ມຂູ່ທັນສະໄໝ.
ນອກຈາກນີ້ ການຊ້ອມຮົບຍັງເປັນສ່ວນໜຶ່ງຂອງການທົດສອບ ແລະ ກວດສອບປະສິດທິພາບການປະຕິບັດການຂອງລະບົບອາວຸດ ແລະ ເທັກໂນໂລຊີທາງທະຫານຂັ້ນສູງ ທີ່ພັດທະນາໂດຍອຸດສາຫະກຳປ້ອງກັນປະເທດຂອງເກົາຫຼີໃຕ້.
ກະຊວງກາລະໂຫມຍັງລະບຸອີກວ່າ ການເປີດເຜີຍການຝຶກຕໍ່ສາທາລະນະ ແລະ ສື່ມວນຊົນ ມີເປົ້າໝາຍເພື່ອສະແດງໃຫ້ທັງປະຊາຊົນພາຍໃນປະເທດ ແລະ ນານາຊາດໄດ້ເຫັນເຖິງສັກຍະພາບທີ່ພິສູດໄດ້ຈິງ ຂອງອາວຸດທີ່ຜະລິດໂດຍເກົາຫຼີໃຕ້ ຊຶ່ງໃນໄລຍະຫຼາຍປີທີ່ຜ່ານມາ ເກົາຫຼີໃຕ້ກຳລັງຜັກດັນຕົວເອງຂຶ້ນເປັນໜຶ່ງໃນຜູ້ສົ່ງອອກອາວຸດລາຍສຳຄັນຂອງໂລກ.
ທີ່ຜ່ານມາ ອາວຸດຍຸດໂທປະກອນຂອງເກົາຫຼີໃຕ້ ເຊັ່ນ ລົດຖັງ K2 ແລະ ປືນໃຫຍ່ອັດຕາຈອນ K9 ໄດ້ຮັບຄວາມສົນໃຈຈາກຫຼາຍປະເທດໃນຢູໂຣບ, ຕາເວັນອອກກາງ ແລະ ອາຊີ ຈາກຈຸດເດັ່ນດ້ານເທັກໂນໂລຊີ, ຄວາມທັນສະໄໝ ແລະ ຄວາມສາມາດໃນການຜະລິດຈຳນວນຫຼາຍພາຍໃນປະເທດ.
ການຊ້ອມຮົບຄັ້ງນີ້ຍັງສະທ້ອນເຖິງຄວາມພະຍາຍາມຂອງລັດຖະບານເກົາຫຼີໃຕ້ໃນການເສີມສ້າງຂີດຄວາມສາມາດທາງທະຫານ ທ່າມກາງຄວາມກັງວົນດ້ານຄວາມໝັ້ນຄົງໃນພາກພື້ນ ໂດຍສະເພາະຈາກໂຄງການພັດທະນາອາວຸດ ແລະ ຂີ້ປະນາວຸດຂອງເກົາຫຼີເໜືອທີ່ຍັງສືບຕໍ່ດຳເນີນໄປຢ່າງຕໍ່ເນື່ອງ.
ຂ່າວຈາກ: Yonhap
