ໃນວັນທີ 22 ພຶດສະພາ 2026, ໂດຍປະຕິບັດລະບຽບກົດໝາຍ ແລະ ກົນໄກການຮ່ວມມືວຽກງານຕໍາຫຼວດ ລະຫວ່າງສອງປະເທດ; ກົມຕໍາຫຼວດຄຸ້ມຄອງຄົນຕ່າງປະເທດ ກົມໃຫຍ່ສັນຕິບານ ໄດ້ປະສານສົມທົບກັບ ກົມພົວພັນຕ່າງປະເທດ ຫ້ອງວ່າການ ກະຊວງປ້ອງກັນຄວາມສະຫງົບ ແລະ ສະຖານທູດຣາຊະອານາຈັກໄທ ປະຈໍາລາວ ມອບ-ຮັບ ຕົວຜູ້ຖືກຫາສັນຊາດໄທ ທີ່ລັກລອບເປີດເວບຫຼິ້ນການພະນັນທາງອອນລາຍ ຈໍານວນ 102 ຄົນ ຍິງ 42 ຄົນ ໃຫ້ທາງການໄທ ກັບໄປດໍາເນີນຄະດີຕາມລະບຽບກົດໝາຍ ຢູ່ຣາຊະອານາຈັກໄທ. ພິທີ ມອບ-ຮັບ ໄດ້ຈັດຂື້ນຢູ່ທີ່ ດ່ານສາກົນຂົວມິດຕະພາບ ລາວ-ໄທ 1 ນະຄອນຫຼວງວຽງຈັນ-ໜອງຄາຍ.
ໂອກາດນີ້, ທັງສອງຝ່າຍ ກໍໄດ້ມີການເຊັນບົດບັນທຶກ ມອບ-ຮັບ ຕົວຜູ້ຖືກຫາຈໍານວນດັ່ງກ່າວ, ຕາງໜ້າເຊັນມອບຝ່າຍລາວແມ່ນ ທ່ານ ພັນເອກ ພອນທິບ ພົມພັກດີ ຫົວໜ້າກົມຕໍາຫຼວດຄຸ້ມຄອງຄົນຕ່າງປະເທດ ແລະ ເຊັນຮັບຝ່າຍໄທໂດຍ ທ່ານ ພັນເອກ ປະລິນຍາເອກ ກິດສະດາກອນ ກິ່ນເກສອນ ຮອງຜູ້ບັງຄັບການກວດຄົນເຂົ້າ-ອອກເມືອງ 4 ປະເທດໄທ ຊຶ່ງມີຄະນະຮັບຜິດຊອບທັງສອງຝ່າຍ ເຂົ້າຮ່ວມເປັນສັກຂີພິຍານ.
ຜູ້ຖືກຫາຈຳນວນດັ່ງກ່າວນີ້ຖືກເຈົ້າໜ້າທີ່ກັກຕົວໃນວັນທີ 13 ພຶດສະພາ 2026 ໃນລະຫວ່າງທີ່ ເຈົ້າໜ້າທີ່ຕຳຫຼວດ ປະຕິບັດການກວດຄົ້ນເຄຫາສະຖານຢູ່ 3 ຈຸດຄື: ເຮືອນພັກຄູນໄຊ ແລະ ເຮືອນພັກຮຸ່ງເຮືອງ ຢູ່ເຂດບ້ານໝອງຜື, ໂຮງແຮມຮຸ່ງທິບ ບ້ານໄຊຍະພູມ ທັງສາມສະຖານທີ່ແມ່ນຢູ່ ນະຄອນໄກສອນ ພົມວິຫານ ແຂວງສະຫວັນນະເຂດ, ສາມາດກັກຕົວຜູ້ຖືກຫາສັນຊາດໄທ ໄດ້ຈໍານວນ 102 ຄົນ, ຍິງ 42 ຄົນ ທີ່ລັກລອບເປີດເວບຫຼິ້ນການພະນັນອອນລາຍ ພ້ອມຂອງກາງຄອມພິວເຕີຕັ້ງໂຕະ 122 ໜ່ວຍ, ຄອມໂນດບຸກ 9 ໜ່ວຍ ແລະ ໂທລະສັບມືຖື 720 ໜ່ວຍ ທີ່ໃຊ້ເຂົ້າໃນການເຄື່ອນໄຫວກະທໍາຜິດໃນຄັ້ງນີ້. ມາໃນວັນທີ 15 ພຶດສະພາ 2026 ເຈົ້າໜ້າທີ່ກອງບັນຊາການ ປກສ ແຂວງສະຫວັນນະເຂດ ຈຶ່ງໄດ້ນໍາຕົວຜູ້ຖືກຫາມອບໃຫ້ ກົມຕໍາຫຼວດຄຸ້ມຄອງຄົນຕ່າງປະເທດ ກົມໃຫຍ່ສັນຕິບານ ກະຊວງປ້ອງກັນຄວາມສະຫງົບ ເພື່ອດໍາເນີນຄະດີຕາມຂັ້ນຕອນຂອງກົດໝາຍ.
ຄືດັ່ງທີ່ພວກເຮົາຮູ້ແລ້ວວ່າ ໃນຍຸກທີ່ເຕັກໂນໂລຊີດີຈີຕອນ ແລະ ອິນເຕີເນັດ ໄດ້ກາຍເປັນສ່ວນໜຶ່ງທີ່ຂາດບໍ່ໄດ້ໃນຊີວິດປະຈໍາວັນ, ໄພຂົ່ມຂູ່ຈາກ ແກ້ງສະແກມເມີ ຫຼື ອາຊະຍາກໍາທໍາໂທລະຄົມ ແລະ ການສື່ສານ ໄດ້ຂະຫຍາຍຕົວຢ່າງວ່ອງໄວ ແລະ ກາຍເປັນໜຶ່ງໃນໄພຄຸກຄາມທີ່ຮ້າຍແຮງທີ່ສຸດ ຕໍ່ຄວາມໝັ້ນຄົງ, ເສດຖະກິດ ແລະ ສັງຄົມ, ເຊິ່ງພວກເຂົາໄດ້ໃຊ້ວິທີການຕ່າງໆດ້ວຍຫຼາຍຮູບແບບ ໃນການເຊົ່າ ຫຼື ໃຊ້ພື້ນທີ່ເຊັ່ນ: ໂຮງແຮມ, ອາພັດເມັນ, ຫ້ອງແຖວ ຫຼື ເຮືອນພັກ ເປັນບ່ອນດໍາເນີນງານທີ່ເຊື່ອງຊ້ອນ ແລະ ມັກປ່ຽນທີ່ຕັ້ງເລື້ອຍໆ ເພື່ອຫຼີກລ່ຽງການຕິດຕາມຈາກເຈົ້າໜ້າທີ່, ກຸ່ມແກ້ງເຫຼົ່ານີ້ ຍັງມີການຈັດຕັ້ງເປັນລະບົບ ໂດຍມີສາຍບັງຄັບບັນຊາ ແລະ ການຈ່າຍເງີນໃຫ້ຜູ້ທີ່ຖືກຫຼອກລວງ ຫຼື ບັງຄັບໃຊ້ແຮງງານ.
ຕໍ່ກັບບັນຫາດັ່ງກ່າວ ຈຶ່ງຂໍຝາກເຕື່ອນມາຍັງທຸກຄົນໃນທົ່ວສັງຄົມ ຈົ່ງມີສະຕິໃນການນໍາໃຊ້ສື່ສັງຄົມອອນລາຍ ເພື່ອບໍ່ໃຫ້ຕົກເປັນເຫຍື່ອຂອງກຸ່ມແກ້ງດັ່ງກ່າວ ເຊິ່ງໄດ້ສົ່ງຜົນກະທົບຕໍ່ຊີວິດ ແລະ ຈິດໃຈ ເຮັດໃຫ້ສັງຄົມບໍ່ມີຄວາມສະຫງົບ ແລະ ເປັນລະບຽບຮຽບຮ້ອຍ. ຖ້າຫາກໃຜພົບເຫັນບຸກຄົນ ຫຼື ກຸ່ມຄົນທີ່ໜ້າສົງໄສ ແມ່ນໃຫ້ແຈ້ງຕໍ່ເຈົ້າໜ້າທີ່ຢ່າງຮີບດ່ວນ ຫຼື ສາມາດໂທແຈ້ງສາຍດ່ວນ 1533 ສູນຕ້ານການຫຼອກລວງທາງອອນລາຍ.
