ໃນວັນທີ 19 ພຶດສະພາຜ່ານມາ, ທ່ານ ຄຳສິງ ມະນີຈັນ ຫົວໜ້າຝ່າຍຄຸ້ມຄອງລະບົບໄຟຟ້າພາກກາງ ລັດວິສາຫະກິດໄຟຟ້າລາວ ແລະ ທ່ານ ກຽງສັກ ປຣັກສາດທອງ ຫົວໜ້າສາຂາແຂວງວຽງຈັນ ຫົວໜ້າພະແນກບໍລິຫານ-ສັງລວມ ຄະນະພະແນກເຕັກນິກຄຸ້ມຄອງລະບົບໄຟຟ້າ, ຄະນະຫ້ອງການອ້ອມຂ້າງສາຂາ ແຂວງວຽງຈັນ ໄດ້ລົງເຄື່ອນໄຫວ ແລະ ຊີ້ນຳວຽກງານຮອບດ້ານ ຢູ່ຫ້ອງການໄຟຟ້າເມືອງໂພນໂຮງ, ຫ້ອງການໄຟຟ້າເມືອງວຽງຄຳ, ສະຖານີໄຟຟ້າໂພນສູງ, ສະຖານີໄຟຟ້າທ່າລາດ ແລະ ສະຖານີໄຟຟ້າແສງສະຫວ່າງ ທີ່ຂຶ້ນກັບ ລັດວິສາຫາກິດໄຟຟ້າລາວ ສາຂາແຂວງວຽງຈັນ.
ການລົງຊຸກຍູ້ຄັ້ງນີ້ ເພື່ອຮັບຟັງການລາຍງານ ສະພາບຂໍ້ຫຍຸ້ງຍາກ, ສະພາບບັນຫາ ສິ່ງທ້າທາຍ ແລະ ຂໍ້ສະເໜີຕ່າງໆໃນການຈັດຕັ້ງປະຕິບັດວຽກງານ ສູ້ຊົນ 7 ຕົວຊີ້ວັດໃນໄລຍະຜ່ານມາ, ນອກຈາກນັ້ນ ຍັງໄດ້ເຜີຍແຜ່ວຽກງານການປະຕິຮູບຂອງ ຟຟລ ໂດຍສະເພາະວຽກງານ (2-4-7): 2 ໜ້າທີ່ການເມືອງ, 4 ປະຕິຮູບ, 7 ຕົວຊີ້ວັດ ເພື່ອລຸລ່ວງໃຫ້ອ້າຍນ້ອງພະນັກງານກຳມະກອນໃນຂອບເຂດຫ້ອງການໄຟຟ້າເມືອງ, ສະຖານີໄຟຟ້າ ເຂົ້າໃຈຢ່າງທົ່ວເຖິງ ທ່ານຫົວໜ້າຝ່າຍ ໄດ້ໃຫ້ກຽດໂອ້ລົມ ແລະ ມີທິດຊີ້ນຳຢ່າງໃກ້ຊິດໃຫ້ຄະນະຫ້ອງການໄຟຟ້າເມືອງໂພນໂຮງ, ຫ້ອງການໄຟຟ້າເມືອງວຽງຄຳ, ສະຖານີໄຟຟ້າໂພນສູງ, ສະຖານີໄຟຟ້າທ່າລາດ ແລະ ສະຖານີໄຟຟ້າແສງສະຫວ່າງ ສຸມໃສ່ຈັດຕັ້ງປະຕິບັດ 7 ຕົວຊີ້ວັດ ທີ່ຂັ້ນເທິງໄດ້ມອບໝາຍໃຫ້ຢ່າງເຂັ້ມງວດ ໂດຍສະເພາະແມ່ນຍົກລະດັບການບໍລິການລູກຄ້າ ຮັບແຈ້ງເຫດ ແລະ ແກ້ໄຂບັນຫາໃຫ້ວ່ອງໄວ, ສຸພາບ ແລະ ປະທັບໃຈ; ຮັກສາສະຖຽນລະພາບຂອງລະບົບໄຟຟ້າ ເອົາໃຈໃສ່ລົງກວດກາ ແລະ ບົວລະບັດຮັກສາແລວສາຍສົ່ງໄຟຟ້າຢ່າງເປັນປົກກະຕິ ເພື່ອຫຼຸດຜ່ອນບັນຫາໄຟຕົກ-ໄຟມອດ ໃຫ້ໜ້ອຍທີ່ສຸດ.
(ຂ່າວ: ຟຟລ)
