ໃນວັນທີ 11 ພຶດສະພາ 2026, ທ່ານ ສຸກສະຫວັນ ວິໄລວົງ ປະທານຄະນະກຳມະການປົກຄອງ ແຂວງຈຳປາສັກ ພ້ອມດ້ວຍຄະນະລົງຊຸກຍູ້ ແລະ ຕິດຕາມຄວາມຄືບໜ້າຂອງໂຄງການກໍ່ສ້າງອາຄານຜະລິດກາເຟ ດ້ວຍອາຍແກັດໄຮໂດຣເຈນ ຂອງບໍລິສັດ ລາວ ກຣີນ ໄຮໂດຣເຈນ ສະອາດ ຈຳກັດ ທີ່ຕັ້ງຢູ່ເຂດເສດຖະກິດພິເສດປາກເຊ-ຍີ່ປຸ່ນ (ບ້ານໝາກແງວ ເມືອງປະທຸມພອນ).
ໂຄງການດັ່ງກ່າວ ເປັນໂຮງງານຂົ້ວກາເຟທີ່ນຳໃຊ້ພະລັງງານໄຮໂດຣເຈນສີຂຽວ 100% ແຫ່ງທຳອິດຂອງ ສປປ ລາວ ເພື່ອຍົກລະດັບໃຫ້ລາວ ກາຍເປັນຜູ້ນຳດ້ານພະລັງງານສະອາດ ແລະ ເປັນມິດກັບສິ່ງແວດລ້ອມໃນລະດັບສາກົນ. ໂຄງການເລີ່ມກໍ່ສ້າງມາແຕ່ທ້າຍປີ 2025 ແລະ ຄາດວ່າຈະສຳເລັດ 100% ໃນຕົ້ນເດືອນກຸມພາ 2027.
ໂອກາດດັ່ງກ່າວ, ທ່ານ ສຸກສະຫວັນ ວິໄລວົງ ໄດ້ກ່າວຊົມເຊີຍວິໄສທັດອັນກວ້າງໄກຂອງບໍລິສັດ ທີ່ສ້າງໃບໜ້າໃໝ່ໃຫ້ກັບຂະແໜງອຸດສາຫະກຳ ຂອງແຂວງຈຳປາສັກ ແລະ ປະເທດຊາດ.
ໃນໂອກາດດຽວກັນ, ຄະນະຜູ້ແທນຍັງໄດ້ໄປຢ້ຽມຢາມ ໂຮງງານ ຈຸນເຊີງ ບັນຈຸພັນ, ຊຶ່ງເປັນໂຮງງານຜະລິດເຈ້ຍແຂງຄົບວົງຈອນ (3 ຊັ້ນ, 5 ຊັ້ນ ແລະ 7 ຊັ້ນ) ທີ່ໄດ້ດຳເນີນການມາແຕ່ປີ 2025. ໂຮງງານແຫ່ງນີ້, ມີກຳລັງການຜະລິດສູງເຖິງ 100.000 ອັນຕໍ່ວັນ ແລະ ທີ່ສຳຄັນແມ່ນນຳໃຊ້ວັດຖຸດິບພາຍໃນປະເທດເຖິງ 70%, ຖືເປັນການຊຸກຍູ້ເສດຖະກິດຖານຮາກຢ່າງແທ້ຈິງ.
ຂ່າວ-ພາບ: ມຸກດາວັນ ວໍລະເພັດ
