ວັນທີ 21 ກໍລະກົດ 2026, ເຈົ້າໜ້າທີ່ກົມຕຳຫຼວດເສດຖະກິດ ກົມໃຫຍ່ຕຳຫຼວດ ສົມທົບກັບພາກສ່ວນທີ່ກ່ຽວຂ້ອງ ເຂົ້າມ້າງກຸ່ມແກ້ງຕອບແຊັດເວັບພະນັນອອນລາຍ ຢູ່ 2 ຈຸດກັກຕົວແອັດມິນຕອບແຊັດເວບພະນັນອອນລາຍ ເປັນຄົນໄທ ຈໍານວນ 67 ຄົນ ຍິງ 36 ຄົນ.
ຈຸດທີ 1 ບຸກກວດຄົ້ນຕຶກ 4 ຊັ້ນຕັ້ງຢູ່ບ້ານໂພນພະເນົາ ເມືອງໄຊເສດຖາ ເຈົ້າຂອງຊື່ ນາງ ສຸສະດາ ໄຊຍະບຸນຊູ ປະຊາຊົນຢູ່ບ້ານສະພານທອງເໜືອ ເມືອງສີສັດຕະນາກ ນະຄອນຫຼວງວຽງຈັນ, ໂດຍກຸ່ມຜູ້ຖືກຫາ ໄດ້ເຊົ່າເປັນບ່ອນເຄື່ອນໄຫວຕອບແຊັດເວັບພະນັນອອນລາຍ.
ຈຸດທີ 2 ຢູ່ໂຮງແຮມໂງ່ນຊັບ ຕັ້ງຢູ່ບ້ານ ດອນໜູນ ເມືອງໄຊທານີ ນະຄອນຫຼວງວຽງຈັນ ໂດຍພວກຖືກຫາໄດ້ໃຊ້ເປັນບ່ອນພັກເຊົາ.
ຜ່ານການກວດຄົ້ນພົບເຫັນອຸປະກອນທີ່ໃຊ້ເຂົ້າໃນການເຄື່ອນໄຫວຕອບແຊັດເວັບພະນັນອອນລາຍ ມີຄອມພິວເຕີຕັ້ງໂຕະ ຈໍານວນ 46 ຊຸດ, ໂທລະສັບມືຖື 133 ໜ່ວຍ, ຊຸດໂຕະ 4 ໜ່ວຍຕິດກັນ ຈໍານວນ 8 ຊຸດ ແລະ ເຄື່ອງຂອງກາງອື່ນໆອີກຈຳນວນໜຶ່ງ.
ປັດຈຸບັນ, ເຈົ້າໜ້າທີ່ກຳລັງດຳເນີນການສອບສວນ ແລະ ກຽມສົ່ງຕົວພວກຖືກຫາໃຫ້ທາງການໄທນຳຕົວໄປດຳເນີນຄະດີ.
ໃນໂອກາດນີ້, ຂໍສະແດງຄວາມຂອບໃຈຕໍ່ພໍ່ແມ່ປະຊາຊົນ ພົນລະເມືອງດີ ທີ່ໄດ້ແຈ້ງຂໍ້ມູນທີ່ເປັນປະໂຫຍດໃຫ້ເຈົ້າໜ້າທີ່ຈົນນຳໄປສູ່ການບຸກມ້າງຂະບວນການດັ່ງກ່າວ ແລະ ຫວັງຢ່າງຍິ່ງວ່າພໍ່ແມ່ປະຊາຊົນທຸກທົ່ວໜ້າຈະຊ່ວຍເປັນຫູເປັນຕາຊ່ວຍເຈົ້າໜ້າທີ່,ຫາກທ່ານພົບເຫັນບຸກຄົນ, ກຸ່ມຄົນ ແລະ ສະຖານທີ່ ທີ່ສົງໄສເຄື່ອນໄຫວກະຜິດຕໍ່ກົດໝາຍ ໃຫ້ຮີບຮ້ອນແຈ້ງຕໍ່ເຈົ້າໜ້າທີ່ໂດຍດ່ວນ, ແຈ້ງເຂົ້າມາທາງເພຈຂອງພວກເຮົາ ຫຼື ເພຈກົມຕຳຫຼວດເສດຖະກິດ ຫຼື ແຈ້ງເຂົ້າສາຍດ່ວນ 1533 ໄດ້ຕະຫຼອດເວລາ.
