ເມື່ອເວລາ 11:45 ນາທີ ຂອງວັນທີ 15 ກໍລະກົດ 2026, ໄດ້ເກີດເຫດອັກຄີໄພ (ໄຟໄໝ້ເຮືອນ) ຂອງທ້າວ ສະຫວັນ ເພັດປັນຍາ ອາຍຸ 35 ປີ, ພະນັກງານ ລັດວິສາຫະກິດການບິນລາວ ສາຂາແຂວງຫຼວງພະບາງ ເຊິ່ງຕັ້ງຢູ່ບ້ານເມືອງງາ, ນະຄອນ ຫຼວງພະບາງ. ເຫດການດັ່ງກ່າວໄດ້ສ້າງຄວາມເສຍຫາຍ ປະເພດ ເຮືອນຢູ່ ແລະ ຊັບສິນເປັນຈຳນວນຫຼວງຫຼາຍ. ໃນຂະນະເກີດເຫດ, ເຈົ້າໜ້າທີ່ດັບເພີງຈາກກອງບັນຊາການ ປກສ ແຂວງ, ປກສ ນະຄອນ ຫຼວງພະບາງ, ປກສ ກຸ່ມເມືອງງາ ແລະ ໜ່ວຍກູ້ໄພ ໄດ້ຮີບຮ້ອນລະດົມກຳລັງເຂົ້າສະກັດກັ້ນໄຟຢ່າງສຸດຄວາມສາມາດ. ສ່ວນສາເຫດຂອງການເກີດໄຟໄໝ້ໃນຄັ້ງນີ້ ແມ່ນຍັງຢູ່ໃນຂັ້ນຕອນການສືບສວນ-ສອບສວນ ຂອງເຈົ້າໜ້າທີ່ເຕັກນິກວິຊາສະເພາະ.
ດ້ວຍຄວາມເປັນຫ່ວງເປັນໃຍຈາກຄະນະພັກ-ອົງການປົກຄອງທຸກຂັ້ນ, ໃນຕອນແລງຂອງວັນດຽວກັນ, ຄະນະກຳມະການຄຸ້ມຄອງໄພພິບັດຂັ້ນແຂວງ ແລະ ຂັ້ນນະຄອນ, ອົງການກາແດງແຂວງຫຼວງພະບາງ ພ້ອມດ້ວຍສະມາຊິກສະພາປະຊາຊົນແຂວງ ເຂດເລືອກຕັ້ງນະຄອນ ຫຼວງພະບາງ ໄດ້ຮ່ວມກັນນຳເອົາເຄື່ອງອຸປະໂພກ-ບໍລິໂພກ ແລະ ເງິນສົດ ໄປມອບໃຫ້ຄອບຄົວຜູ້ປະສົບໄພ.
ການລົງມອບເຄື່ອງຊ່ວຍເຫຼືອຄັ້ງນີ້ ນໍາໂດຍ ທ່ານ ນາງ ວຽນວິໄລ ດີລະພັນ, ຮອງ ປະທານ ຄະນະກຳມະການປົກຄອງ ແຂວງຫຼວງພະບາງ, ທ່ານ ນາງ ວິໄລພອນ ຖະໜອມສັກ, ຮອງ ປະທານ ຄະນະກຳມະການປົກຄອງ ນະຄອນຫຼວງພະບາງ ແລະ ທ່ານ ນາງ ສຸທາ ທອງສະມຸດ, ສະມາຊິກສະພາປະຊາຊົນແຂວງ ພ້ອມດ້ວຍພາກສ່ວນທີ່ກ່ຽວຂ້ອງ.
ເຄື່ອງທີ່ນໍາມາຊ່ວຍເຫຼືອໃນເບື້ອງຕົ້ນປະກອບມີ: ເຂົ້າສານ 150 ກິໂລ, ໝີ່ກຶ່ງສຳເລັດຮູບ, ນ້ຳດື່ມ, ໄຂ່ ແລະ ເຄື່ອງໃຊ້ຄົວເຮືອນຈຳນວນໜຶ່ງ. ນອກຈາກນັ້ນ, ຍັງໄດ້ມອບເງິນສົດຊ່ວຍເຫຼືອຈາກຂັ້ນແຂວງ ຈຳນວນ 5.000.000 ກີບ ແລະ ຂັ້ນນະຄອນ 2.500.000 ກີບ, ລວມທັງການຊ່ວຍເຫຼືອເບື້ອງຕົ້ນຈາກອົງການຈັດຕັ້ງບ້ານເມືອງງາ.
ໃນໂອກາດນີ້, ທ່ານ ນາງ ວຽນວິໄລ ດີລະພັນ ໄດ້ກ່າວ ໃຫ້ກຳລັງໃຈແກ່ຄອບຄົວຜູ້ເຄາະຮ້າຍ ໃຫ້ມີສະຕິເຂັ້ມແຂງ ເພື່ອຟື້ນຟູຊີວິດການເປັນຢູ່ ແລະ ເສດຖະກິດຄອບຄົວໃຫ້ກັບຄືນສູ່ສະພາບປົກກະຕິໂດຍໄວ. ທັງນີ້, ທາງຄະນະພັກ ແລະ ອົງການປົກຄອງຂັ້ນເທິງ ຈະສືບຕໍ່ຕິດຕາມດູແລ ແລະ ລະດົມທຶນຊ່ວຍເຫຼືອຈາກທົ່ວສັງຄົມຕື່ມອີກ.
ພາບ-ຂ່າວ: ຄະນະໂຄສະນາອົບຮົມນະຄອນ ຫຼວງພະບາງ.
