ຫ້ອງຂ່າວ ປກສ ແຂວງຈຳປາສັກລາຍງານວ່າ: ອີງຕາມການລາຍງານຂອງເຈົ້າໜ້າທີ່ວິຊາສະເພາະພະແນກຕໍາຫຼວດ ຄຸ້ມຄອງຄົນຕ່າງປະເທດ ຫ້ອງສັນຕິບານ ປກສ ແຂວງຈຳປາສັກໃຫ້ຮູ້ວ່າ: ໃນ ເວລາ 10:00 ໂມງ ຂອງວັນທີ 08 ກໍລະກົດ 2026 ເຈົ້າໜ້າທີ່ວິຊາສະເພາະພະແນກຕໍາຫຼວດຄຸ້ມຄອງຄົນ ຕ່າງປະເທດ ຫ້ອງສັນຕິບານ ປກສ ແຂວງຈຳປາສັກ ໄດ້ຮັບການລາຍງານຈາກພົນລະເມືອງດີວ່າ: ອາດມີການກໍ່ອາຊະຍະກຳ ຜ່ານລະບົບຄອມພີວເຕີ ຢູ່ເຂດບ້ານ ຫ້ວຍພືນ ເມືອງບາຈຽງຈະເລີນສຸກ ແຂວງຈຳປາສັກ .
ຈາກນັ້ນ, ຈຶ່ງໄດ້ຂໍທິດຊີ້ນຳຈາກຜູ້ບັນຊາ ພ້ອມກຳລັງພົນ ວິຊາສະເພາະ ສົມທົບກັບ ກອງບັນຊາການ ປກສ ເມືອງບາຈຽງຈະເລີນສຸກ ຕາແສງໜອງໃສ ແລະ ອຳນາດການປົກຄອງບ້ານ ຫ້ວຍພືນ ເມືອງບາຈຽງຈະເລີນສຸກ ໄດ້ເຂົ້າກວດກາເປົ້າໝາຍສົງໄສຢູ່ໂຮງງານປຸງແຕ່ງໄມ້ ບົວລະພັນ ຕັ້ງຢູ່ບ້ານ ຫ້ວຍພືນ, ເມືອງບາຈຽງຈະເລີນສຸກ.
ຜ່ານການກວດກາ ສາມາດຄວບຄຸມຕົວຜູ້ຕ້ອງສົງໄສທີ່ເປັນຕ່າງປະເທດໄດ້ 80 ຄົນ ໃນນີ້ມີ: ສັນຊາດອູກັນດາ 61 ຄົນ, ຍີງ20 ຄົນ, ເຄນຢາ 12 ຄົນ ຍີງ 8ຄົນ, ມາເລເຊຍ 6 ຄົນ ແລະ ສັນຊາດແຄມເມລູນ 1 ຄົນ ພ້ອມເຄື່ອງຂອງກາງ ຄອມພິວເຕີຕັ້ງໂຕະ 80 ໜ່ວຍ, ໂນດບຸກ 3 ໜ່ວຍໂທລະສັບ 61 ໜ່ວຍ.ເຄື່ອງຮັບໃຊ້ອື່ນໆອີກຈໍານວນໜຶ່ງ.
ປັດຈຸບັນ, ຄະດີດັ່ງກ່າວ ຍັງຢູ່ໃນຂັ້ນຕອນດໍາເນີນການສືບສວນ-ສອບສວນ ຂອງເຈົ້າໜ້າທີ່ ວິຊາສະເພາະ.
