ວັນທີ 30 ມິຖຸນາ 2026 ພະແນກຕຳຫລວດ ກອງບັນຊາການ ປກສ ເມືອງຕະໂອ້ຍ ໄດ້ຈັດກອງປະຊຸມສຶກສາອົບຮົມກຸ່ມໄວລຸ້ນ ຈຳນວນ 15 ຄົນ (ຍິງ 6 ຄົນ) ທີ່ມົ້ວສຸມດື່ມນ້ຳກະທ້ອມ ແລະ ດື່ມຄໍລະເຈນປະສົມສານເສບຕິດ. ໂດຍການເປັນປະທານຂອງທ່ານ ພັນໂທ ກິແກ້ວ ແສງສຸລິຍາ, ຮອງເລຂາຄະນະພັກຮາກຖານ, ຮອງຫົວໜ້າກອງບັນຊາການ ປກສ ເມືອງຕະໂອ້ຍ, ພ້ອມດ້ວຍຜູ້ປົກຄອງຂອງກຸ່ມໄວລຸ້ນເຂົ້າຮ່ວມ.
ເຈົ້າໜ້າທີ່ໄດ້ສືກສາອົບຮົມເຖິງຜົນຮ້າຍ ແລະ ໄພອັນຕະລາຍຂອງການດື່ມນ້ຳກະທ້ອມ, ການດື່ມຄໍລະເຈນ ແລະ ການຢາສູບໄຟຟ້າ ທີ່ມີສານເສບຕິດ ທີ່ສົ່ງຜົນກະທົບຮ້າຍແຮງຕໍ່ຮ່າງກາຍ ແລະ ສັງຄົມ ເຊັ່ນ: ຜົນກະທົບຕໍ່ລະບົບປະສາດ, ເຮັດໃຫ້ມີອາການງຸດງິດ, ໃຈເຕັ້ນຜິດປົກກະຕິ, ຊຶມເສົ້າ ແລະ ປະສາດຫຼອນ, ຜົນກະທົບຕໍ່ສຸຂະພາບ, ຮ່າງກາຍຊຸດໂຊມ, ເສຍອະນາຄົດ, ຄອບຄົວແຕກແຍກ ແລະ ສ້າງຄວາມເດືອດຮ້ອນໃຫ້ແກ່ສັງຄົມ.
ຈາກນັ້ນ, ເຈົ້າໜ້າທີ່ໄດ້ໃຫ້ໄວລຸ້ນ 10 ຄົນ ເຊັນບົດບັນທຶກກ່າວເຕືອນ ແລະ ມອບໃຫ້ພໍ່ແມ່ຜູ້ປົກຄອງນຳໄປສຶກສາອົບຮົມຕໍ່ ໂດຍເນັ້ນຢ້ຳວ່າ: ຕ້ອງປັບປ່ຽນພຶດຕິກຳຢ່າງເດັດຂາດ ຫາກຍັງສືບຕໍ່ກະທຳຜິດອີກ ເຈົ້າໜ້າທີ່ຈະນຳຕົວມາດຳເນີນຄະດີຕາມລະບຽບກົດໝາຍຢ່າງເຂັ້ມງວດ.
ສ່ວນອີກ 5 ຄົນ ທີ່ເຫລືອ ເຈົ້າໜ້າທີ່ ຈະໄດ້ດຳເນີນມາດຕະການຕາມລະບຽບກົດໝາຍຕໍ່ໄປ.
