ລາຄານ້ຳມັນໂລກດິ່ງລົງກວ່າ 5% ຫຼັງຕະຫຼາດຄາດຫວັງສະຫະລັດ ແລະ ອີຣ່ານອາດບັນລຸຂໍ້ຕົກລົງຢຸດຄວາມຂັດແຍ່ງ ຂະນະທີ່ຕະຫຼາດຮຸ້ນທົ່ວໂລກສ່ວນໃຫຍ່ປັບຕົວຂຶ້ນ ຮັບແຮງຫນູນຈາກຮຸ້ນເຕັກໂນໂລຊີ.
ວັນທີ 28 ພຶດສະພາ 2569 ລາຄານ້ຳມັນໃນຕະຫຼາດໂລກປັບຕົວຫຼຸດລົງຢ່າງໜັກ ຫຼັງນັກລົງທຶນຈັບຕາຄວາມຄືບໜ້າການເຈລະຈາລະຫວ່າງສະຫະລັດ ແລະ ອີຣ່ານ ທ່າມກາງຄວາມຫວັງວ່າທັງສອງຝ່າຍອາດບັນລຸຂໍ້ຕົກລົງເພື່ອຫຼຸດຄວາມຕຶງຄຽດໃນຕາເວັນອອກກາງ ແລະ ນຳໄປສູ່ການກັບຄືນມາເປີດເສັ້ນທາງເດີນເຮືອຜ່ານຊ່ອງແຄບຮໍມຸດອີກຄັ້ງ.
ລາຄານ້ຳມັນປັບຫຼຸດລົງຫຼາຍກວ່າ 5% ຈາກແຮງຄາດການວ່າ ຫາກການເຈລະຈາຄືບໜ້າ ຈະຊ່ວຍບັນເທົາຄວາມສ່ຽງດ້ານອຸປະທານພະລັງງານໂລກ ຫຼັງສົງຄາມໃນຕາເວັນອອກກາງຕັ້ງແຕ່ທ້າຍເດືອນກຸມພາ ທຳໃຫ້ການເດີນເຮືອບັນທຸກນ້ຳມັນ ແລະ ສິນຄ້າຜ່ານຊ່ອງແຄບຮໍມຸດແທບຢຸດຊະງັກ ສົ່ງຜົນໃຫ້ລາຄາພະລັງງານພຸ່ງຂຶ້ນຕໍ່ເນື່ອງໃນຊ່ວງທີ່ຜ່ານມາ.
ໃນຂະນະດຽວກັນ ຕະຫຼາດຮຸ້ນທົ່ວໂລກສ່ວນໃຫຍ່ປັບຕົວຂຶ້ນ ໂດຍດັດຊະນີຫຼັກທັງ 3 ຂອງສະຫະລັດປິດບວກ ແລະ ສ້າງສະຖິຕິສູງສຸດໃໝ່ ນັກລົງທຶນຍັງສືບຕໍ່ເຂົ້າຊື້ຮຸ້ນກຸ່ມເຕັກໂນໂລຊີ ທ່າມກາງຄວາມເຊື່ອໝັ້ນວ່າການເຕີບໂຕຂອງເຕັກໂນໂລຊີປັນຍາປະດິດ ຫຼື AI ຈະຍັງເປັນແຮງຂັບສຳຄັນຂອງຜົນໄດ້ຮັບຂອງບໍລິສັດໃນຂະແໜງເຕັກໂນໂລຊີ.
ນັກເສດຖະສາດເຕືອນວ່າ ຫາກລາຄາພະລັງງານຍັງຜັນຜວນ ແລະ ເງິນເຟີ້ຍັງຢູ່ໃນລະດັບສູງ ທະນາຄານກາງຫຼາຍປະເທດອາດຈຳເປັນຕ້ອງປັບຂຶ້ນອັດຕາດອກເບ້ຍເພີ່ມເຕີມ ຊຶ່ງຈະເພີ່ມຕົ້ນທຶນການກູ້ຢືມ ແລະ ອາດກົດດັນການເຕີບໂຕຂອງເສດຖະກິດໂລກໃນໄລຍະຕໍ່ໄປ.
