ໃນໄລຍະເດືອນ ພຶດສະພາ 2026 ນີ້ໜ່ວຍສະເພາະກິດຫ້ອງສັນຕິບານ ແລະ ຫ້ອງຕໍາຫຼວດ ກອງບັນຊາການ ປກສ ແຂວງອຸດົມໄຊ ສົມທົບພາກສ່ວນກ່ຽວຂ້ອງເຂົ້າກວດກາພ້ອມກັກຕົວຄົນຕ່າງປະເທດທີ່ມາພັກເຊົາຢູ່ຈຸດໂຮງແຮມ ເຂດບ້ານວັງໄຮ ເມືອງໄຊ ແຂວງອຸດົມໄຊ ຈຳນວນ 02 ຈຸດ, ຜ່ານການເຂົ້າກວດກາຕົວຈິງພົບເຫັນຄົນຕ່າງປະເທດ ທີ່ມາພັກເຊົາລີ້ຊ້ອນບໍ່ຖືກຕ້ອງ ຈໍານວນ 50 ຄົນ, ໂທລະສັບ 53 ເຄື່ອງ ພ້ອມເຄື່ອງຕິດຕົວຈຳນວນໜຶ່ງ. ໃນນີ້ ຄົນສັນຊາດຈີນ 46 ຄົນ, ສັນຊາດມຽນມາ 04 ຄົນ.
ຜ່ານການກວດກາ ແລະ ສືບສວນ-ສອບສວນ ຂັ້ນເບື້ອງຕົ້ນຂອງເຈົ້າໜ້າທີ່ ຈໍານວນເປົ້າໝາຍດັ່ງກ່າວແມ່ນບໍ່ມີໜັງສືຜ່ານແດນ (Passport) ທີ່ຊັດເຈນ, ເຈົ້າໜ້າທີ່ວິຊາສະເພາະ ປກສ ແຂວງອຸດົມໄຊ ຈຶ່ງໄດ້ກັກຕົວດຳເນີນການສືບສວນ-ສອບສວນ ເພື່ອຂະຫຍາຍຜົນ.
ໃນວັນທີ 26 ພຶດສະພາ 2026 ເຈົ້າໜ້າທີ່ກອງບັນຊາການ ປກສ ແຂວງອຸດົມໄຊ ໄດ້ນຳຕົວພວກກ່ຽວສົ່ງໃຫ້ທາງການຈີນເພື່ອດຳເນີນຄະດີຕາມກົດໝາຍຕໍ່ໄປ, ຝ່າຍລາວຕາງໜ້າມອບໂດຍ ພັທ ບຸນຄຳ ສູລິໄຊ ຮອງຫົວໜ້າຫ້ອງສັນຕິບານ ປກສ ແຂວງອຸດົມໄຊ ສປປ ລາວ, ຝ່າຍຈີນຕາງໜ້າຮັບໂດຍ ພັທ ຈາງຊຽງ ຫົວໜ້າກອງຕຳຫຼວດກວດຄົນເຂົ້າ-ອອກເມືອງ ແລະ ຄຸ້ມຄອງຄົນຕ່າງປະເທດ ກອງບັນຊາການຕຳຫຼວດ ເມືອງຫຼ້າ ແຂວງຢຸນນານ ສປ ຈີນ, ມີເຈົ້າໜ້າທີ່ວິຊາສະເພາະທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ສ່ວນຄົນສັນຊາດມຽນມາ ຈຳນວນ 04 ຄົນແມ່ນພວມສືບຕໍ່ດຳເນີນ.
ຂ່າວ: ປກສ ແຂວງອຸດົມໄຊ
