ໃນໄລຍະ 6 ເດືອນຕົ້ນປີ 2026, ກອງບັນຊາການປ້ອງ ກັນຄວາມສະຫງົບ ເມືອງຊານໄຊ ແຂວງອັດຕະປື ໄໄດ້ສຸມໃສ່ນໍາພາ-ຊີ້ນໍາກໍາລັງວິຊາສະເພາະ ເຮັດໜ້າທີ່ຢ່າງມີຄວາມ ຮັບຜິດຊອບສູງ ໃນການສະກັດກັ້ນ ແລະ ແກ້ໄຂປະກົດການຫຍໍ້ທໍ້ຕ່າງໆ ໂດຍສະເພາະ ແມ່ນການແກ້ໄຂບັນຫາອຸບັດຕິເຫດຕາມທ້ອງຖະໜົນ, ໂດຍການລົງເຜີຍແຜ່ກົດ ໝາຍຈະລາຈອນທາງບົກ ແລະ ລະບຽບການສັນຈອນໃຫ້ແກ່ຜູ້ໃຊ້ລົດ-ໃຊ້ຖະໜົນ ພາຍໃນເມືອງ ຢ່າງກວ້າງຂວາງ.
ວັນທີ 26 ພຶດສະພາ 2026 ນີ້, ພັທ ພູມີ ແກ້ວບົວລະ ພາ ຫົວໜ້າກອງບັນຊາການປ້ອງກັນຄວາມສະຫງົບ ເມືອງຊານໄຊ ໃຫ້ສໍາພາດວ່າ: ເຖິງວ່າເຈົ້າໜ້າທີ່ ຈະລາຈອນໄດ້ຈັດຕັ້ງປະຕິບັດມາດຕະການຕ່າງໆ ຢ່າງແຂງແຮງ ແລ້ວກໍ ຕາມ, ແຕ່ສະຖິຕິການເກີດອຸບັດຕິເຫດ ຢູ່ພາຍໃນເມືອງຊານໄຊ ກໍຍັງມີທ່າອ່ຽງເພີ່ມຂຶ້ນ, ເຊິ່ງໃນໄລຍະ 6 ເດືອນຕົ້ນປີ 2026, ທົ່ວເມືອງ ມີເກີດອຸບັດຕິເຫດ ທັງໝົດ 27 ເລື່ອງ, ຖ້າທຽບໃສ່ 6 ເດືອນທ້າຍປີ 2025 ມີອຸບັດຕິເຫດເພີ່ມຂຶ້ນ 2 ເລື່ອງ, ມີຜູ້ໄດ້ຮັບບາດເຈັບ ທັງໝົດ 36 ຄົນ ຍິງ 4 ຄົນ ແລະ ມີຄົນເສຍຊີວິດ 3 ຄົນ, ມີພາຫະນະເປ່ເພ ທັງໝົດ 41 ຄັນ.
ທ່ານຫົວໜ້າກອງບັນຊາການ ປກສ ເມືອງຊານໄຊ ໃຫ້ຮູ້ຕື່ມວ່າ: ສາເຫດຫຼັກທີ່ພາໃຫ້ເກີດອຸບັດຕິເຫດ ແມ່ນເກີດຈາກຜູ້ຂັບຂີ່ດື່ມສິ່ງມຶນເມົາແລ້ວຂັບຂີ່, ການຂັບຂີ່ລົດໄວເກີນກໍານົດ ແລະ ພາຫະນະບໍ່ໄດ້ມາດຕະຖານເຕັກນິກ, ສ່ວນຈຸດສ່ຽງທີ່ເກີດອຸບັດຕິເຫດເລື້ອຍໆແມ່ນຢູ່ເສັ້ນທາງເລກທີ 9001 ເລີ່ມແຕ່ຈຸດປະຕູໂຂງ ຫາ ຄ້ອຍຕາດຈໍ ບ້ານວັງໄຊ ແລະ ເສັ້ນທາງແຕ່ສາມແຍກລູກສອນໄຟ ໄປຫາ ເຂື່ອນເຊກະໝານ, ເຊິ່ງກຸ່ມເປົ້າໝາຍທີ່ເກີດອຸບັດຕິເຫດສ່ວນຫຼາຍ ແມ່ນຢູ່ໃນເກນອາຍຸແຕ່ 17 ປີ-45 ປີ; ຜ່ານການຈັດຕັ້ງປະຕິບັດຕົວຈິງ ຄຽງຄູ່ກັບຂໍ້ສະດວກທີ່ມີຄະນະພັກຂັ້ນເທິງໃຫ້ທິດຊີ້ນໍາຢ່າງໃກ້ຊິດ ແລະ ມີນິຕິກໍາ ເປັນບ່ອນອີງແລ້ວ, ກໍຍັງມີ ຂໍ້ຫຍຸ້ງຍາກ ເປັນຕົ້ນ ດ້ານງົບປະມານ,ອຸ ປະກອນ ແລະ ພາຫະນະຮັບໃຊ້ເຂົ້າໃນການເຄື່ອນໄຫວພາກສະໜາມ ແລະ ລົງໂຄສະນາ ແມ່ນຍັງຂາດເຂີນ.
ສໍາລັບ ທິດທາງແຜນການໃນຕໍ່ໜ້າ, ກອງບັນຊາການ ປກສ ເມືອງຊານໄຊ ຈະສືບຕໍ່ລົງເຄື່ອນໄຫວໂຄສະນາກົດ ໝາຍວ່າດ້ວຍຈະລາຈອນທາງບົກ ໃຫ້ແກ່ພໍ່ແມ່ປະຊາຊົນ ແລະ ຕາມໝວດໂຮງຮຽນຕ່າງໆ ໃຫ້ມີຄວາມຮັບຮູ້ເຂົ້າໃຈຢ່າງເລິກເຊິ່ງ, ພ້ອມທັງເພີ່ມທະວີການຕັ້ງຈຸດກວດກາ ແລະ ຈັດສັນພາຫະນະຕາມຈຸດສ່ຽງຕ່າງໆ ເປັນຕົ້ນແມ່ນທາງສາມແຍກ ແລະ ສີ່ແຍກ ເພື່ອຫຼຸດຜ່ອນການເກີດອຸບັດຕິເຫດ ໃຫ້ໄດ້ຫຼາຍທີ່ສຸດ.
ພັທ ພູມີ ແກ້ວບົວລະພາ ໄດ້ຮຽກຮ້ອງມາຍັງພໍ່ແມ່ປະຊາຊົນບັນດາເຜົ່າທຸກຊັ້ນຄົນໃນສັງຄົມ ຈົ່ງຮ່ວມແຮງຮ່ວມໃຈກັນ ເປັນເຈົ້າການໃນການປະຕິບັດກົດລະບຽບຈະລາຈອນຢ່າງເຄັ່ງຄັດ, ເຄົາລົບກົດລະບຽບໃນການໃຊ້ລົດໃຊ້ຖະໜົນຢ່າງຖືກຕ້ອງ ແລະ ຕ້ອງໃສ່ໝວກກັນກະ ທົບທຸກຄັ້ງໃນເວລາຂັບຂີ່ ເພື່ອຄວາມປອດໄພໃນຊີວິດ ແລະ ຊັບສິນຂອງຕົນເອງ ກໍຄື ຂອງຜູ້ອື່ນ ໃນສັງຄົມ.
ຂ່າວ: ສຸກສະຫວ່າງ.
