ໃນວັນທີ 18 ພຶດສະພາ 2026, ກົມຕຳຫຼວດຄຸ້ມຄອງການທ່ອງທ່ຽວ ຮ່ວມກັບ ກົມຕຳຫຼວດຄຸ້ມຄອງຄົນຕ່າງປະເທດ ກົມໃຫຍ່ສັນຕິບານ ກະຊວງປ້ອງກັນຄວາມສະຫງົບ ໄດ້ປະສານສົມທົບກັບພາກສ່ວນທີ່ກ່ຽວຂ້ອງ ເຂົ້າມ້າງກຸ່ມແກ້ງສໍ້ໂກງຊັບທາງໂທລະຄົມ (ສະແກມເມີ ) ຢູ່ໂຮງແຮມແຫ່ງໜຶ່ງ ເຂດບ້ານທາດຫຼວງເໜືອ ເມືອງໄຊເສດຖາ ນະຄອນຫຼວງວຽງຈັນ.
ຜ່ານການກວດກາພົບເປົ້າໝາຍທີ່ເປັນກຸ່ມແກ້ງສໍ້ໂກງຊັບທາງໂທລະຄົມ ຈໍານວນ 88 ຄົນ ຍິງ 11 ຄົນ, ມີ 5 ສັນຊາດ; ໃນນີ້ ມີຜູ້ຖືກຫາສັນຊາດຫວຽດນາມ ຈໍານວນ 50 ຄົນ ຍິງ 10 ຄົນ, ຈີນ 35 ຄົນ ຍິງ 1 ຄົນ, ມຽນມາ 1 ຄົນ, ເກົາຫຼີໃຕ້ 1 ຄົນ ແລະ ສັນຊາດລາວ 1 ຄົນ. ນອກນັ້ນ, ຍັງໄດ້ຢຶດເຄື່ອງຂອງກາງເປັນຄອມພິວເຕີຕັ້ງໂຕະ, ໂທລະສັບມືຖື ອີກຈໍານວນຫຼາຍ.
ປັດຈຸບັນ, ເຈົ້າໜ້າທີ່ໄດ້ກັກຕົວເປົ້າໝາຍດັ່ງກ່າວ ເພື່ອດຳເນີນການສືບສວນ-ສອບສວນຂະຫຍາຍຜົນ ຕາມຂັ້ນຕອນຂອງກົດໝາຍຢ່າງເຂັ້ມງວດ.
ພາບ-ຂ່າວ:ຄໍາໂຖ
