ເປີດເຜີຍຂໍ້ມູນມືປືນ ຍິງງານລ້ຽງສື່ທຳນຽບຂາວ ຕຽມຖືກໂທດຫຼາຍຂໍ້ຫາ

ເຈົ້າໜ້າທີ່ສະຫະລັດກຳລັງດຳເນີນການສືບສວນຂໍ້ເທັດຈິງໃນເຫດຄົນຮ້າຍຍິງປືນໃນງານລ້ຽງສະມາຄົມຜູ້ສື່ຂ່າວທຳນຽບຂາວເມື່ອວັນເສົາທີ່ຜ່ານມາ ໂດຍເບື້ອງຕົ້ນພົບສິ່ງທີ່ອາດເປັນແຮງຈູງໃຈ ແລະ ຄາດວ່າລາວອາດໂດນໂທດຫຼາຍຂໍ້ຫາ

ເຈົ້າໜ້າທີ່ລະດັບສູງຂອງສະຫະລັດເປີດເຜີຍກັບສຳນັກຂ່າວ CBS News ວ່າ ນາຍ ໂຄລ ໂທມັດ ອາລເລນ ຜູ້ຕ້ອງສົງໄສທີ່ພະຍາຍາມກໍ່ເຫດໂຈມຕີໃນງານລ້ຽງສະມາຄົມຜູ້ສື່ຂ່າວທຳເນີຍຂາວໃນຄືນວັນເສົາ (25 ເມ.ສ. 2569) ໄດ້ທິ້ງສິ່ງທີ່ເຈົ້າໜ້າທີ່ເອີ້ນວ່າ “ຄຳແຖລງການ” (Manifesto) ເຊິ່ງລະບຸໄວ້ຢ່າງຊັດເຈນວ່າລາວຕ້ອງການພຸ່ງເປົ້າໂຈມຕີເຈົ້າໜ້າທີ່ໃນລັດຖະບານຂອງທຣຳ

ທາງການລະບຸວ່າໃນເຫດການດັ່ງກ່າວ ປະທານາທິບໍດີ ໂດນາລ ທຣຳ ແລະ ສຸພາບສະຕີໝາຍເລກໜຶ່ງ ເມລາເນຍ ທຣຳ ໄດ້ຮັບການອົບພະຍົບອອກຈາກງານຢ່າງປອດໄພ ແລະ ບໍ່ມີຜູ້ເຂົ້າຮ່ວມງານຄົນໃດໄດ້ຮັບບາດເຈັບສາຫັດ ຢ່າງໃດກໍ່ຕາມ ມີເຈົ້າໜ້າທີ່ໜ່ວຍອາລັກຂາ (Secret Service) ໜຶ່ງນາຍຖືກຍິງຢ່າງໜ້ອຍໜຶ່ງນັດ ແຕ່ບໍ່ເປັນຫຍັງຫຼາຍເນື່ອງຈາກໃສ່ເສື້ອເກາະ

ນາຍອາລເລນ ອາຍຸ 31 ປີ ຖືກຈັບກຸມໄດ້ໃນທີ່ເກີດເຫດ ການສືບສວນເບື້ອງຕົ້ນພົບວ່າ ລາວເປັນນັກການສຶກສາຈາກເມືອງ Torrance ລັດແຄລີຟໍເນຍ ແລະ ສຳເລັດການສຶກສາດ້ານວິສະວະກຳຈາກມະຫາວິທະຍາໄລຊັ້ນນຳ ໂດຍເຈົ້າໜ້າທີ່ກວດພົບຂໍ້ຄວາມທີ່ມີເນື້ອຫາຕ້ານທຣຳ ແລະ ຕ້ານຄຣິສຕ໌ສາດສະໜາໃນບັນຊີໂຊຊຽລມີເດຍຂອງລາວ

ນາຍ ທອດ ແບລນຊ໌ ຮັກສາການລັດຖະມົນຕີວ່າການກະຊວງຍຸຕິທຳ ກ່າວໃນລາຍການ “Face the Nation with Margaret Brennan” ວ່າ ພະນັກງານສອບສວນເຊື່ອວ່າລາວມຸ່ງເປົ້າໂຈມຕີສະມາຊິກໃນຄະນະລັດຖະບານຂອງທຣຳຢ່າງແທ້ຈິງ

ໃນຂະນະນີ້ FBI ກຳລັງດຳເນີນການສືບສວນຄະດີ ຂະນະທີ່ໜ່ວຍອາລັກຂາກຳລັງກວດສອບປະຫວັດຢ່າງລະອຽດຂອງຜູ້ຕ້ອງສົງໄສ ເພື່ອຫາຄຳຕອບວ່າອັນໃດຄືສາເຫດທີ່ເຮັດໃຫ້ກໍ່ເຫດໃນຄັ້ງນີ້

ສິ່ງທີ່ເກີດຂຶ້ນໃນວັນເກີດເຫດ

ແຫຼ່ງຂ່າວຈາກໜ່ວຍງານຮັກສາກົດໝາຍສອງແຫ່ງເປີດເຜີຍກັບ CBS News ວ່າ ມີສຽງປືນດັງຂຶ້ນທັງໝົດຢ່າງໜ້ອຍ 5 ຫາ 8 ນັດ ລະຫວ່າງເກີດເຫດ

ນາຍ ເຈັດ ແຄດໂລລ໌ ຮັກສາການຜູ້ບັນຊາການຕຳຫຼວດກຸງວໍຊິງຕັນ ດີ.ຊີ. ແຖລງຂ່າວວ່າ ຜູ້ຕ້ອງສົງໄສພົກພາ ປືນລູກຊ໊ອກ ປືນພົກ ແລະ ມີດອີກຫຼາຍເຫຼັ້ມ ໃນຂະນະທີ່ພະຍາຍາມບຸກຝ່າຈຸດກວດຄວາມປອດໄພໜ້າງານລ້ຽງທີ່ໂຮງແຮມ Washington Hilton ແລະ ມີການຍິງກັນເກີດຂຶ້ນ ກ່ອນຈະຄວບຄຸມຕົວຄົນຮ້າຍໄດ້ສຳເລັດ ໂດຍທີ່ມືປືນບໍ່ຖືກຍິງແຕ່ຢ່າງໃດ ແຕ່ຖືກນຳຕົວສົ່ງໂຮງໝໍເພື່ອປະເມີນສະພາບຮ່າງກາຍ ແລະ ຈິດໃຈ

ນາຍອາລເລນ ແຝງຕົວເຂົ້າມາເປັນແຂກໃນໂຮງແຮມ ໂດຍເດີນທາງມາດ້ວຍລົດໄຟຈາກລອສແອງເຈລີດ ແວ່ເປລ່ຽນຂະບວນທີ່ຊິຄາໂກ ກ່ອນຈະມຸ່ງໜ້າສູ່ວໍຊິງຕັນ ດີ.ຊີ. ຈາກນັ້ນເຂົ້າເຊັກອິນໂຮງແຮມຕັ້ງແຕ່ວັນສຸກ ຫຼື 1 ວັນກ່ອນເກີດເຫດ

ຫຼັງເຫດການສງົບລົງ ເຈົ້າໜ້າທີ່ສາມາດຍຶດໂທລະສັບມືຖື ແລະ ອຸປະກອນອີເລັກໂທຣນິກອື່ນໆ ຂອງຄົນຮ້າຍ ແລະ ກຳລັງຂໍໝາຍຄົ້ນເພື່ອກວດສອບຂໍ້ມູນພາຍໃນ ເຖິງວ່າຜູ້ຕ້ອງສົງໄສຈະບໍ່ໃຫ້ຄວາມຮ່ວມມື ແຕ່ຜູ້ທີ່ຮູ້ຈັກລາວໄດ້ໃຫ້ຂໍ້ມູນທີ່ເປັນປະໂຫຍດແກ່ພະນັກງານສອບສວນ

ເຈົ້າໜ້າທີ່ລັດຖະບານກາງ 3 ນາຍລະບຸວ່າ ກຳລັງກວດສອບງານຂຽນຂອງຜູ້ຕ້ອງສົງໄສທີ່ບັນທຶກໄວ້ໃນເຈ້ຍ ຊຶ່ງພົບໃນໂຮງແຮມ ເພື່ອຫາແຮງຈູງໃຈໃນການກໍ່ເຫດ

ແຫຼ່ງຂ່າວລະບຸອີກວ່າ ອາລເລນໄດ້ສົ່ງງານຂຽນບາງສ່ວນໄປໃຫ້ສະມາຊິກໃນຄອບຄົວກ່ອນລົງມືກໍ່ເຫດ ເຊິ່ງສະມາຊິກຄອບຄົວຄົນໜຶ່ງໄດ້ຮີບແຈ້ງຕຳຫຼວດທັນທີ ຢ່າງໃດກໍ່ຕາມ ງານຂຽນທີ່ສົ່ງໃຫ້ຄອບຄົວນັ້ນ ດູເໝືອນຈະບໍ່ໄດ້ລະບຸສະເພາະເຈາະຈົງເຖິງງານລ້ຽງສະມາຄົມຜູ້ສື່ຂ່າວທຳເນີຍຂາວແຕ່ຢ່າງໃດ

“ໃນຂະນະນີ້ ດູເໝືອນວ່າລາວຈະເປັນຜູ້ລົງມືກໍ່ເຫດຜູ້ດຽວ” ແຄດໂລລ໌ກ່າວໃນຄືນວັນເສົາ ພ້ອມລະບຸວ່າການສືບສວນຍັງດຳເນີນຕໍ່ໄປ ເຊິ່ງສອດຄ່ອງກັບຄຳແຖລງຂອງປະທານາທິບໍດີທຣຳທີ່ບອກກັບຜູ້ສື່ຂ່າວວ່າ ເຊື່ອວ່າຜູ້ຕ້ອງສົງໄສມີລັກສະນະເປັນ “ໝາປ່າໂດດດ່ຽວ” ທີ່ລົງມືໂດຍບໍ່ມີຜູ້ສັ່ງການ

ປະຫວັດຜູ້ຕ້ອງສົງໄສທີ່ຮູ້ໃນຕອນນີ້

ແຫຼ່ງຂ່າວລະບຸວ່າ ນາຍອາລເລນມີປະຫວັດການຄອບຄອງອາວຸດປືນ ໂດຍລາວຊື້ປືນລູກຊ໊ອກທີ່ໃຊ້ກໍ່ເຫດໃນເດືອນສິງຫາ 2568 ແລະ ຍັງມີປືນພົກເຄິ່ງອັດຕະໂນມັດອີກກ່ອງທີ່ຊື້ໃນປີ 2566

ຜູ້ຕ້ອງສົງໄສອາໄສຢູ່ໃນຫຼາຍພື້ນທີ່ຂອງລອສແອງເຈລີດ ຕັ້ງແຕ່ເດືອນພະຈິກ 2553 ຫາ ມີນາ 2569 ໂດຍໃຊ້ເວລາສ່ວນໃຫຍ່ຢູ່ໃນເມືອງ Torrance ແລະ ເຄີຍມີທີ່ຢູ່ໃນເມືອງ San Gabriel ໃນຊ່ວງຕົ້ນປີ 2561 ຫາ ທ້າຍປີ 2562

ອາລເລນສຳເລັດການສຶກສາປະລິນຍາຕີດ້ານວິສະວະກຳເຄື່ອງກົນຈາກ ສະຖາບັນເທັກໂນໂລຊີແຫ່ງແຄລີຟໍເນຍ (Caltech) ໃນປີ 2560 ກ່ອນຈະສຳເລັດປະລິນຍາໂທດ້ານວິທະຍາການຄອມພິວເຕີຈາກ ມະຫາວິທະຍາໄລ CSUDH ໃນປີ 2568 ໂດຍ Caltech ໄດ້ຢືນຢັນຂໍ້ມູນການຈົບການສຶກສາຂອງລາວຜ່ານອີເມວໃຫ້ CBS News ແລ້ວ

ໂປຣໄຟລ໌ໃນ LinkedIn ລະບຸວ່າລາວເປັນນັກພັດທະນາວີດີໂອເກມອິດສະລະ ແລະ ຄຣູພາດທ໌ໄທມ໌ ນອກຈາກນີ້ລາວຍັງເຄີຍເຮັດວຽກໃນບໍລິສັດຕິວເຕີຊື່ C2 Education ໃນເມືອງ Torrance ແລະ ເຄີຍໄດ້ຮັບລາງວັນ “ຄຣູດີເດັ່ນປະຈຳເດືອນ” ໃນເດືອນທັນວາ 2567 ຢ່າງໃດກໍ່ຕາມ ຍັງບໍ່ແນ່ຊັດວ່າລາວຍັງເຮັດວຽກຢູ່ທີ່ນັ້ນຫຼືບໍ່ ຂະນະທີ່ເຂດການສຶກສາ Torrance ຢືນຢັນວ່າລາວບໍ່ເຄີຍເປັນພະນັກງານຂອງເຂດດັ່ງກ່າວ

ສະມາຊິກໃນຄອບຄົວຄົນໜຶ່ງໃຫ້ຂໍ້ມູນກັບພະນັກງານສອບສວນວ່າ ອາລເລນມັກກ່າວຖ້ອຍຄຳທີ່ຮຸນແຮງ ແລະ ມັກອ້າງເຖິງແຜນການທີ່ຈະເຮັດ “ບາງສິ່ງບາງຢ່າງ” ເພື່ອແກ້ໄຂບັນຫາຂອງໂລກໃນປັດຈຸບັນ ນອກຈາກນີ້ ຄອບຄົວຍັງລະບຸວ່າລາວໄປສະໜາມຍິງປືນເພື່ອຝຶກຊ້ອມເປັນປະຈຳ

ລາວເປັນສະມາຊິກຂອງກຸ່ມທີ່ຊື່ວ່າ “The Wide Awakes” ແລະ ເຄີຍເຂົ້າຮ່ວມການປະທ້ວງຕ້ານທຣຳ ພາຍໃຕ້ຄຳຂວັນ “No Kings” ໃນແຄລີຟໍເນຍ ນອກຈາກນີ້ ຂໍ້ມູນການບໍລິຈາກເງິນເພື່ອການຫາສຽງຂອງລັດຖະບານກາງລະບຸວ່າ ອາລເລນເຄີຍບໍລິຈາກ 25 ໂດລາ ໃຫ້ກັບ ActBlue ຊຶ່ງເປັນຄະນະກຳມະການລະດົມທຶນທາງການເມືອງຂອງພັກເດໂມແຄຣດ ເພື່ອສະໜັບສະໜູນການຫາສຽງຂອງ ນາງ ຄາມາລາ ແຮດດີດ ໃນປີ 2567

ຂໍ້ຫາທີ່ມືປືນອາດໄດ້ຮັບ

ນາງ ຈາໄນ ປີໂລ ອາຍາສີສະຫະລັດປະຈຳກຸງວໍຊິງຕັນ ດີ.ຊີ. ປະກາດໃນຄືນວັນເສົາວ່າ ນາຍອາລເລນຈະຖືກຕັ້ງຂໍ້ຫາເບື້ອງຕົ້ນຢ່າງລະ 1 ກະທົງ ໄດ້ແກ່:

• ຂໍ້ຫາໃຊ້ອາວຸດປືນລະຫວ່າງກໍ່ອາຊະຍາກຳທີ່ໃຊ້ຄວາມຮຸນແຮງ
• ຂໍ້ຫາທຳຮ້າຍເຈົ້າໜ້າທີ່ລັດຖະບານກາງໂດຍໃຊ້ອາວຸດຮ້າຍແຮງ

ໂດຍລາວຄາດວ່າລາວຈະຖືກຕັ້ງຂໍ້ຫາເພີ່ມຕື່ມ ເມື່ອການສືບສວນຂະຫຍາຍຜົນອອກໄປ

“ຈາກຂໍ້ມູນທີ່ພວກເຮົາມີຈົນເຖິງຕອນນີ້ ເປັນທີ່ຊັດເຈນວ່າບຸກຄົນຜູ້ນີ້ມີເຈດຕະນາທີ່ຈະສ້າງອັນຕະລາຍ ແລະ ຄວາມເສຍຫາຍໃຫ້ໄດ້ຫຼາຍທີ່ສຸດເທົ່າທີ່ຈະເປັນໄປໄດ້” ປີໂລກ່າວ

ດ້ານນາຍແບລນຊ໌ລະບຸວ່າ ການທີ່ຜູ້ຕ້ອງສົງໄສຈະຖືກຕັ້ງຂໍ້ຫາເພີ່ມຕື່ມຫຼືບໍ່ນັ້ນ ຂຶ້ນຢູ່ກັບສິ່ງທີ່ພະນັກງານສອບສວນກວດພົບໃນລະຫວ່າງການລວບລວມພະຍານຫຼັກຖານ ໂດຍສະເພາະຢ່າງຍິ່ງໃນສ່ວນທີ່ກ່ຽວຂ້ອງກັບແຮງຈູງໃຈ

“ຍັງມີຂໍ້ຫາລະດັບລັດຖະບານກາງອີກຫຼາຍຂໍ້ຫາທີ່ອາດນຳມາໃຊ້ໄດ້ ແຕ່ມັນຂຶ້ນຢູ່ກັບການທີ່ພວກເຮົາຕ້ອງເຂົ້າໃຈເຖິງແຮງຈູງໃຈ ເຈດຕະນາ ແລະ ການກຽມການລ່ວງໜ້າຂອງລາວ” ນາຍແບລນຊ໌ກ່າວ

ອາຍາສີປີໂລລະບຸວ່າ ນາຍອາລເລນຈະຖືກນຳຕົວຂຶ້ນສານລັດຖະບານກາງເພື່ອຮັບຊາບຂໍ້ຫາໃນວັນຈັນນີ້ ແລະ ນາຍແບລນຊ໌ຄາດວ່າກະບວນການສັ່ງຟ້ອງຢ່າງເປັນທາງການຈະຕາມມາໃນລຳດັບຕໍ່ໄປ.
ທີ່ມາ: cbsnews