ວັນທີ 23 ມີນາ 2026 ທີມງານພາກສະໜາມຂອງໂຄງການເກັບກູ້ລະເບີດແຫ່ງຊາດ ປະຈໍາ ແຂວງ ຫລວງພະບາງ ໄດ້ສຳເລັດການທຳລາຍລະເບີດໃຫຍ່ ຈຳນວນ 1 ໜ່ວຍ ປະເພດ MK82 GPLD ນໍ້າໜັກ 500 ປອນ (ປະມານ 226.7 ກິໂລກຣາມ) ຢູ່ບ້ານພິກໃຫຍ່, ນະຄອນຫລວງພະບາງ, ແຂວງ ຫລວງພະບາງ.
ການທຳລາຍລະເບີດຄັ້ງນີ້, ທີມງານໄດ້ນໍາໃຊ້ວິທີການທຳລາຍແບບແຮງຕໍ່າ ໂດຍການຕັດສ່ວນທ້າຍຂອງລະເບີດ ແລະ ຈູດດິນລະເບີດທາງດ້ານໃນໃຫ້ໝົດເພື່ອຮັບປະກັນຄວາມປອດໄພ. ວິທີການດັ່ງກ່າວນີ້ໄດ້ຖືກອອກແບບມາໂດຍສະເພາະ ເພື່ອຫລຸດຜ່ອນຄວາມສ່ຽງຈາກການທຳລາຍລະເບີດແບບແຮງສູງ ເຊິ່ງຮັບປະກັນຄວາມປອດໄພໃຫ້ແກ່ທີມງານ ແລະ ຊຸມຊົນທີ່ຢູ່ອ້ອມຂ້າງ.
ໂຄງການເກັບກູ້ລະເບີດແຫ່ງຊາດ ຈະສືບຕໍ່ເກັບກູ້ ແລະ ທຳລາຍລະເບີດບໍ່ທັນແຕກທີ່ຕົກຄ້າງ ເພື່ອສ້າງຄວາມປອດໄພໃຫ້ແກ່ການດໍາລົງຊີວິດ ແລະ ການທຳມາຫາກິນຂອງປະຊາຊົນລາວບັນດາເຜົ່າ ແລະ ການພັດທະນາເສດຖະກິດ-ສັງຄົມ ຂອງ ສປປ ລາວ.
ທີ່ມາ: Lao National Unexploded Ordnance Programme
