ວັນທີ 18 ກຸມພານີ້, ເມືອງມຸນລະປາໂມກ ແຂວງຈໍາປາສັກ ໄດ້ຈັດພິທີມອບ ແລະ ເປີດນໍາໃຊ້ເສັ້ນທາງ 5 ເສັ້ນ ໃນເທດສະບານເມືອງ ໂດຍການເຂົ້າຮ່ວມຂອງທ່ານ ອາລຸນໄຊ ສູນນະລາດ ກຳມະການສູນກາງພັກ ເລຂາຄະນະບໍລິຫານງານພັກແຂວງ, ທ່ານ ພົນຈັດຕະວາ ວິລະຕູ ວໍລະຈິດ ຄະນະປະຈໍາພັກແຂວງ ຫົວໜ້າການເມືອງກອງບັນຊາການທະຫານແຂວງ ຜູ້ຊີ້ນໍາວຽກງານຮອບດ້ານຢູ່ເມືອງມຸນລະປາໂມກ, ມີແຂກຖຶກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນພິທີ, ທ່ານ ວັນລະເດດ ແກ້ວຈັນທາ ຮອງເລຂາຄະນະບໍລິຫານງານພັກເມືອງ ປະທານຄະນະກໍາມະການປົກຄອງເມືອງ ລາຍງານວ່າ: ໂຄງການກໍ່ສ້າງເສັ້ນທາງຕາຜ້າຜັງເມືອງ 5 ເສັ້ນ ໃນເທດສະບານເມືອງມຸນລະປາໂມກ ມີ 2 ໂຄງການ ຊອ່ງເປັນການລົງທຶນຂອງລັດ (ແຂວງຈໍາປາສັກ), ມີຄວາມຍາວ 4,050 ແມັດ, ມູນຄ່າລວມ 5 ຕື້ 826 ລ້ານກີບ. ໃນນັ້ນ, ໂຄງການທີ 1 ມີ 4 ເສັ້ນ, ມີຄວາມຍາວ 3,200 ແມັດ, ມູນຄ່າ 4 ຕື້ 400 ລ້ານກີບ ໂດຍແມ່ນບໍລິສັດ ຄໍາເພັດ ດວງຈະເລີນ ກໍ່ສ້າງ ຂົວ – ທາງ ຈໍາກັດຜູ້ດຽວ ເປັນຜູ້ຮັບ ເໝົາກໍ່ສ້າງ ຊຶ່ງໄດ້ເລີ່ມຈັດຕັ້ງປະຕິບັດວຽກໂຄງການແຕ່ວັນທີ 20 ທັນວາ 2025 ເປັນຕົ້ນມາ; ໂຄງການທີ 2, ເປັນເສັ້ນທາງປູຢາງ 2 ຊັ້ນ ແຕ່ສາມແຍກ (ຄຸ້ມປ່າອ້ອຍ) ຫາ ທ່າບັກ ບ້ານເວີນແຄນ ມີຄວາມຍາວ 850 ແມັດ, ລວມມູນຄ່າ 1 ຕື້ 426 ລ້ານກີບ ໂດຍແມ່ນບໍລິສັດ ລັດວິສາຫະກິດກໍ່ສ້າງ ແລະ ຕິດຕັ້ງໄຟຟ້າຄົບວົງຈອນ ໄຊສົມບູນ ເປັນຜູ້ຮັບເໝົາກໍ່ສ້າງ ຊຶ່ງໄດ້ເລີ່ມຈັດຕັ້ງປະຕິບັດໂຄງການແຕ່ເດືອນທັນວາ ປີ 2025 ທີ່ຜ່ານມາ. ຜ່ານການກວດກາພາກສະໜາມ ແລະ ການປະເມີນຕົວຈິງ ຂອງ 2 ໂຄງການ ເຫັນວ່າສະພາບໜ້າທາງ ແລະ ບັນດາໜ້າວຽກຕ່າງໆທີ່ໄດ້ປະຕິບັດໄປແລ້ວນັ້ນ ຖືກຕ້ອງຕາມມາດຕະຖານເດັກນິກ ຂອງວີຊາການ ແລະ ສາມາດຮັບຮອງການສັນຈອນໄປ – ມາໄດ້ຢ່າງສະດວກສະບາຍ. ໃນຕໍ່ໜ້ານີ້. ຄະນະພັກ - ອົງການປົກຄອງເມືອງ ຍັງຈະໄດ້ພ້ອມກັນສືບຕໍ່ການສ້ອມແປງ ແລະ ປັບປຸງຍົກລະດັບເສັ້ນທາງປູຢາງຊັ້ນ 1 ພາຍໃນຕາຜ້າເທດສະບານເມືອງ ຈໍານວນ 6 ເສັ້ນ, ມີຄວາມຍາວ 3,550 ແມັດ ຕື່ມອີກ.
ຕອນທ້າຍ, ທ່ານ ອາລຸນໄຊ ສູນນະລາດ ໄດ້ຮ່ວມກັບການນໍາແຂວງ, ການນໍາເມືອງ ແລະ ບໍລິສັດ ທີ່ຮັບເໝົາກໍ່ສ້າງເສັ້ນທາງ ຕັດແຖບຜ້າ, ເປີດປ້າຍ ນໍາໃຊ້ເສັ້ນທາງ ແລະ ລັ່ນຄ້ອງ 9 ບາດ ເພື່ອເປັນສີລິມຸງຄຸນ ແລະ ເປັນນີມິດໝາຍອັນດີໃຫ້ແກ່ການເປີດງານນໍາໃຊ້ເສັ້ນທາງດັ່ງກ່າວ.
(ຂ່າວ-ພາບ: ທູນທອງໃຈ)
