ສໍານັກຂ່າວຣອຍເຕີລາຍງານວັນທີ 15 ກຸມພາ 2026 ເຜີຍແຜ່ໃຫ້ເຫັນ ພາບດິນຍຸບໃນເຂດການຜະລິດກະສິກຳທີ່ບ້ານ ພອນດົກ ບາລິກ (Pondok Balik Village) ແຂວງອາເຈະ ທາງພາກເໜືອຂອງອິນໂດເນເຊຍ ໃນວັນທີ 14 ກຸມພາ 2026 ທີ່ຜ່ານມາ. ຂຸມດັ່ງກ່າວມີຂະໜາດໃຫຍ່ ແລະ ຍັງຍຸບຂະຫຍາຍຕົວຢ່າງຕໍ່ເນື່ອງໃນພື້ນທີ່ ທີ່ເປັນທົ່ງນາ ແລະ ສວນປູກຝັງ ກວມເອົາ 3 ເຮັກຕາ ແລະ ມີຄວາມເລິກປະມານ 100 ແມັດ.
ຜົນການປະເມີນທາງທໍລະນີສາດ ພົບວ່າຊັ້ນດິນທີ່ເປັນຫີນທັບ (Tuff) ຫລື ຫີນເຖົ່າພູໄຟ ແລະ ຊັ້ນຊາຍທາງດ້ານລຸ່ມນັ້ນ ສາມາດດູດຊັບນ້ຳບາດານໄດ້ງ່າຍ, ເຮັດໃຫ້ພື້ນທີ່ຄ້ອຍຊັນມີຄວາມສ່ຽງຕໍ່ການພັງທະລາຍແບບກະທັນຫັນ, ເຫັນໄດ້ຢ່າງຊັດເຈນຈາກຮ່ອງຮອຍໜ້າຜາທີ່ຖືກກັດເຊາະຈົນໃຫ້ເຫັນຊັ້ນດິນ.
ທ່ານ ໄຮລີ ໂຢກາ ເຈົ້າແຂວງໆອາເຈະ ກ່າວວ່າ: ການຂະຫຍາຍຕົວຂອງຂຸມຍຸບແມ່ນເກີດຂຶ້ນໄວຫລາຍ ຫລັງຈາກເກີດອຸທົກກະໄພຄັ້ງໃຫຍ່ເມື່ອປາຍປີ 2025 ຜ່ານມາ ແລະ ຜູ້ຊ່ຽວຊານເຕືອນວ່າດິນຍຸບນີ້ ອາດຈະຂະຫຍາຍຕົວຕໍ່ໄປເລື້ອຍໆ ຫາກບໍ່ມີການຄວບຄຸມທິດທາງການໄຫລຂອງນ້ຳ.
