ເຫດເກີດທີ່ຊິນຈຽງ, ຈີນ 11 ກຸມພາ – ເກີດເຫດແມ່ລູກນັກທ່ອງທ່ຽວຕົກແມ່ນ້ຳໃນເຂດອຸທະຍານຄານາສ ຫຼັງຈາກຝ່າຝືນເສັ້ນເຕືອນເພື່ອເຂົ້າໄປຖ່າຍຮູບຕາມແຄມຝັ່ງ ໂຊກດີທີ່ນັກທ່ອງທ່ຽວໃນບໍລິເວນດັ່ງກ່າວຮີບເຂົ້າຊ່ວຍເຫຼືອຈົນທັງສອງລອດຊີວິດ.
ລາຍງານລະບຸວ່າ ເຫດການເກີດເມື່ອເວລາປະມານ 13:30 ຂອງວັນທີ 10 ກຸມພາ ບໍລິເວນໃກ້ກັບຫຸບເຂົາຫົວຈ້າວ (Hua Jiao Valley) ຕາມແຄມແມ່ນ້ຳຄານາສ ໃນເຂດທ່ອງທ່ຽວຊິນຈຽງ ໂດຍຍິງສວມເສື້ອສີບົວ ແລະ ຍິງອີກຄົນສວມເສື້ອສີຂາວຖືກຊ່ວຍຂຶ້ນຈາກນ້ຳທີລະຄົນໃນເວລາຕໍ່ມາ. ຕຳຫຼວດຢືນຢັນວ່າຜູ້ປະສົບເຫດແມ່ນແມ່ ແລະ ລູກທີ່ເດີນທາງທ່ອງທ່ຽວດ້ວຍລົດສ່ວນຕົວ. ພື້ນທີ່ເກີດເຫດມີປ້າຍເຕືອນຫ້າມເຂົ້າໃກ້ຕາມແຄມແມ່ນ້ຳ ແຕ່ທັງສອງບໍ່ໄດ້ສັງເກດຄຳເຕືອນ ແລະ ຂ້າມເຂດກັ້ນ ຈົນເກີດອຸປະຕິເຫດ.
ຄະນະກຳມະການບໍລິຫານອຸທະຍານຄານາສເປີດເຜີຍວ່າ ລະຫວ່າງຖ່າຍຮູບ ເດັກຍິງຕົກນ້ຳກ່ອນ ເຮັດໃຫ້ແມ່ຕົກໃຈ ແລະ ຮີບລົງໄປຊ່ວຍ ສົ່ງຜົນໃຫ້ຕົກຢູ່ໃນອັນຕະລາຍທັງຄູ່ ກ່ອນທີ່ຜູ້ຄົນເທິງຝັ່ງຈະເຂົ້າຊ່ວຍເຫຼືອນຳຕົວຂຶ້ນມາໄດ້. ປະຈຸບັນອາການຂອງທັງສອງຢູ່ໃນເກນດີ. ຜູ້ຊ່ວຍເຫຼືອຄົນໜຶ່ງຊື່ ເຕິ້ງ ຈື່ຫຼົງ ເລົ່າວ່າ ລາວໄດ້ຍິນສຽງຮ້ອງຂໍຄວາມຊ່ວຍເຫຼືອ ຈຶ່ງລົງຈາກລົດໄປເບິ່ງ ແລະ ພົບເດັກຍິງກຳລັງຖືກກະແສນ້ຳທີ່ແຮງ ແລະ ເຢັນຈັດພັດພາໄປ ທ່າມກາງອຸນຫະພູມຕ່ຳກວ່າ -20 ອົງສາເຊນຊຽດ.
ຫຼັງຈາກຊ່ວຍເດັກຂຶ້ນມາໄດ້ ກໍພົບວ່າມານດາຕິດຢູ່ໃນແມ່ນ້ຳຍ້ອນກ້ອນນ້ຳແຂງ ຈຶ່ງເອີ້ນຄົນອື່ນມາຊ່ວຍກັນດຶງຂຶ້ນຝັ່ງ.ເຈົ້າໜ້າທີ່ຕຳຫຼວດເດີນທາງຮອດບ່ອນເກີດເຫດຢ່າງວ່ອງໄວ ແລະ ຢືນຢັນວ່າທັງສອງບໍ່ໄດ້ຮັບບາດເຈັບຮ້າຍແຮງ ມີພຽງເສື້ອຜ້າເປຍກ ແລະ ກຸນແຈລົດຫາຍ.ທາງການອຸທະຍານເຕືອນບໍລິສັດທັວ ແລະ ນັກທ່ອງທ່ຽວໃຫ້ເພີ່ມຄວາມລະມັດລະວັງ ປະຕິບັດຕາມກົດຄວາມປອດໄພ ບໍ່ເຂົ້າໃກ້ພື້ນທີ່ເສີ່ຍງ ຫຼື ເຂດທີ່ຍັງບໍ່ເປີດໃຫ້ເຂົ້າຊົມ ແລະ ຫາກເກີດເຫດສຸກເສີນຄວນຕັ້ງສະຕິພ້ອມແຈ້ງເຈົ້າໜ້າທີ່ທັນທີ.
