ຂປລ. ເຈົ້າໜ້າທີ່ຕຳຫລວດຈະລາຈອນ ວາງແຜນກໍາລັງເຂົ້າຮ່ວມປ້ອງກັນ ປະຈໍາຈຸດທີ່ພັກຂອງຄະນະຜູ້ແທນ, ຈຸດຫໍປະຊຸມແຫ່ງຊາດ ແລະ ຈັດວາງກຳລັງຢູ່ຕາມຈຸດເສັ້ນທາງ ເພື່ອອຳນວຍຄວາມສະດວກໃຫ້ແກ່ຄະນະຜູ້ແທນ ທີ່ເດີນທາງເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ, ລວມທັງອຳນວຍຄວາມສະ ດວກໃຫ້ປະຊາຊົນ ທີ່ໃຊ້ລົດໃຊ້ຖະໜົນ ແນໃສ່ອຳນວຍຄວາມສະດວກໃນການເດີນທາງ, ລະບາຍການສັນຈອນບໍ່ໃຫ້ແອອັດ.
ທ່ານ ພັນເອກ ຄໍາສອນ ສີດາວົງ ຫົວໜ້າກົມຕໍາຫລວດຈະລາຈອນ ກົມໃຫຍ່ຕໍາຫລວດ ກະຊວງປ້ອງກັນຄວາມສະຫງົບ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 6 ມັງກອນ 2026 ວ່າ: ນັບແຕ່ວັນທີ 4 ມັງກອນ 2026 ເຈົ້າໜ້າທີ່ຕຳຫລວດຈະລາຈອນ ໄດ້ຈັດຕັ້ງປະຕິບັດໜ້າທີ່ປະຈຳຢູ່ແຕ່ລະຈຸດ ເພື່ອອໍານວຍຄວາມສະດວກ ໃຫ້ແກ່ການນໍາພັກ-ລັດ ແລະ ບັນດາຄະນະຜູ້ແທນ ເປັນຕົ້ນແມ່ນອໍານວຍຄວາມສະດວກ ໃຫ້ແກ່ການນໍາທີ່ໄປວາງພວງມາ ລາ ຢູ່ອານຸສາວະສີນັກຮົບນິລະນາມ, ວາງກະຕ່າດອກໄມ້ທີ່ ຫໍພິພທະພັນ ໄກສອນ ພົມວິຫານ ແລະ ສະຖານທີ່ສໍາຄັນອື່ນໆ, ອຳນວຍຄວາມສະດວກໃຫ້ຄະນະຜູ້ແທນ ທີ່ລົງເຄື່ອນໄຫວຢູ່ສະຖານທີ່ຕ່າງໆ ໃຫ້ມີຄວາມສະດວກປອດໄພ ແລະ ເປັນລະບຽບຮຽບຮ້ອຍ, ຊຶ່ງໄລຍະ 2-3 ວັນຜ່ານມາ ເຫັນວ່າສະພາບໂດຍລວມແມ່ນມີຄວາມເປັນລະ ບຽບຮຽບຮ້ອຍດີ ແລະ ສາມາດຮັບປະກັນໃຫ້ບັນດາຜູ້ແທນ, ແຂກທີ່ມາຮ່ວມກອງປະຊຸມ ມີຄວາມປອດໄພດີ. ເຖິງຢ່າງໃດກໍຕາມໃນຊວງດຳເນີນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ. ກົມຕໍາຫລວດຈະລາຈອນ ຈະໄດ້ປະສານສົມທົບກັບ ກໍາລັງຕໍາຫລວດຈະລາຈອນ ປກສ ນະຄອນຫລວງວຽງຈັນ ການຈັດວາງກໍາລັງອໍານວຍຄວາມສະດວກຢູ່ຕາມເສັ້ນທາງ ໃຫ້ມີຄວາມສະດວກທີ່ສຸດ ບໍ່ໃຫ້ເກີດອຸບັດເຫດ ແລະ ບັນຫາການຈະລາຈອນຕິດຂັດ-ອັງອໍ.
ໂອກາດນີ້, ທ່ານ ພັນເອກ ຄໍາສອນ ສີດາວົງ ຍັງໄດ້ຮຽກຮ້ອງໃຫ້ບັນດາພໍ່-ແມ່ປະຊາຊົນ ຜູ້ໃຊ້ລົດ-ໃຊ້ຖະໜົນ ຈົ່ງມີສ່ວນຮ່ວມໃນການເປັນເຈົ້າການຮ່ວມກັນ ໃນການອໍານວຍຄວາມສະດວກ ການໄປ-ມາຂອງຂະບວນລົດການນໍາພັກ-ລັດ ກໍຄື ຂະບວນຂອງຜູ້ແທນ ທີ່ເຂົ້າຮ່ວມກອງປະຊຸມ ໂດຍສະເພາະແມ່ນ ໃຫ້ປະຕິບັດຕາມຄໍາສັ່ງຂອງເຈົ້າໜ້າທີ່ຕໍາຫລວດຈະລາຈອນ ທີ່ປະຕິບັດໜ້າທີ່ລະບາຍການສັນຈອນ ຢູ່ຕາມເສັ້ນທາງສາຍຫລັກ ແລະ ປະຕິ ບັດກົດລະບຽບຈະລາຈອນ ເພື່ອເຮັດໃຫ້ການດໍາເນີນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ດໍາເນີນໄປດ້ວຍຜົນສໍາເລັດ.
ຂ່າວ: ກິດຕາ
