ວັນທີ 17 ກັນຍາ 2026 ທີ່ນະຄອນໜານໜິງ ສປ ຈີນ, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ຜູ້ປະຈຳການ, ພ້ອມດ້ວຍຄະນະຜູ້ແທນຂອງ ສປປ ລາວ ໄດ້ເຂົ້າຮ່ວມພິທີເປີດງານວາງສະແດງສິນຄ້າ ອາຊຽນ-ຈີນ ຄັ້ງທີ 23 (CAEXPO) ປະຈໍາປີ 2026, ໃຫ້ກຽດເປັນປະທານ ແລະ ກ່າວປາໄສເປີດງານໂດຍ ທ່ານ ຕິ່ງ ເຊສຽງ ຮອງນາຍົກລັດຖະມົນຕີ, ຜູ້ປະຈຳການ ຂອງ ສປ ຈີນ, ມີບັນດາຜູ້ນຳຂັ້ນສູງ ແລະ ຜູ້ແທນຈາກພາກລັດ, ພາກທຸລະກິດ ແລະ ພາກສ່ວນຕ່າງໆ ຂອງ ອາຊຽນ ແລະ ຈີນ ເຂົ້າຮ່ວມ.
ງານວາງສະແດງຄັ້ງນີ້, ຈັດຂຶ້ນພາຍໃຕ້ຄຳຂວັນ “ສົ່ງເສີມກາລະໂອກາດຂອງການຍົກລະດັບເຂດການຄ້າເສລີ ອາຊຽນ-ຈີນ 3.0 ເພື່ອຊີວິດທີ່ດີຂຶ້ນກວ່າເກົ່າ” ຊຶ່ງສະແດງໃຫ້ເຫັນເຖິງຄວາມມຸ່ງໝັ້ນຂອງ ອາຊຽນ ແລະ ຈີນ ໃນການສືບຕໍ່ຍົກລະດັບ ແລະ ເສີມສ້າງການຮ່ວມມືດ້ານເສດຖະກິດ, ການຄ້າ ແລະ ການລົງທຶນ ໃຫ້ເກີດໝາກຜົນເປັນຮູບປະທຳຫລາຍຂຶ້ນ.
ໃນໂອກາດນີ້, ທ່ານ ສະເຫລີມໄຊ ກົມມະສິດ ໄດ້ກ່າວປາໄສ ໂດຍສະແດງຄວາມຍິນດີ ແລະ ຕີລາຄາສູງຕໍ່ການຈັດງານວາງສະແດງ (CAEXPO) ຢ່າງຕໍ່ເນື່ອງ ແລະ ໄດ້ເນັ້ນວ່າ ການຍົກລະດັບ ເຂດການຄ້າເສລີ ອາຊຽນ-ຈີນ 3.0 ຈະເປັນບາດກ້າວສຳຄັນໃນການສ້າງໂອກາດໃໝ່ໃຫ້ແກ່ການຮ່ວມມື ອາຊຽນ-ຈີນ ໃນຫລາຍຂົງເຂດທີ່ຄວນໃຫ້ຄວາມສຳຄັນ ເຊັ່ນ: ດ້ານການຄ້າ ແລະ ການລົງທຶນ: ໂດຍເນັ້ນການຫັນເປັນທັນສະໄໝດ້ານການຄ້າ, ການສົ່ງເສີມເສດຖະກິດດີຈິຕອນ ແລະ ການພັດທະນາສີຂຽວຢ່າງຍືນຍົງ.
ການຮ່ວມມືດ້ານພະລັງງານ: ໂດຍການເພີ່ມທະວີການຮ່ວມມືໃນການຫັນປ່ຽນໄປສູ່ພະລັງງານສະອາດ, ຊຸກຍູ້ການລົງທຶນຮ່ວມໃນຂະແໜງພະລັງງານທົດແທນ, ການພັດທະນາຕົວເມືອງອັດສະລິຍະ ແລະ ໂຄງລ່າງພື້ນຖານທີ່ຍືນຍົງ; ດ້ານການຮ່ວມມືໃນການຄໍ້າປະກັນສະບຽງອາຫານ, ພະລັງງານ ແລະ ຕ່ອງໂສ້ການຜະລິດ ລະຫວ່າງ ອາຊຽນ-ຈີນ, ຜ່ານການອຳນວຍຄວາມສະດວກດ້ານການຄ້າ, ຫລຸດຜ່ອນອຸປະສັກ ແລະ ສິ່ງກີດຂວາງທາງການຄ້າທີ່ບໍ່ແມ່ນພາສີ, ພ້ອມທັງສົ່ງເສີມພາກຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ແລະ ກາງ, ການພັດທະນາເສດຖະກິດດີຈິຕອນ ແລະ ເສດຖະກິດສີຂຽວ.
