ເຈົ້າໜ້າທີ່ສະເພາະກິດ ກະຊວງປ້ອງກັນຄວາມສະຫງົບ (ປກສ) ເປີດປະຕິບັດການບຸກກວດລ້າງບ່ອນພະນັນຜິດກົດໝາຍຂະໜາດໃຫຍ່ ເຊິ່ງລັກລອບເປີດຊ້ອນໂຕນຢູ່ພັດທາຄານແຫ່ງໜຶ່ງ ຢູ່ເມືອງສີສັດຕະນາກ, ສາມາດກັກຕົວຜູ້ຖືກຫາໄດ້ 2 ຄົນ ແລະ ຍຶດອຸປະກອນການຫຼິ້ນພະນັນໄດ້ຈໍານວນຫຼາຍ.
ປະຕິບັດການດັ່ງກ່າວແມ່ນໃນວັນທີ 5 ກັນຍາ 2026, ໂດຍກຳລັງເຈົ້າໜ້າທີ່ສະເພາະກິດ ກະຊວງ ປກສ ໄດ້ເຂົ້າກວດຄົ້ນ ຢູ່ພັດທະຄານ ເຟື່ອງຟ້າ ບ້ານໂພນສີນວນ, ເມືອງສີສັດຕະນາກ, ນະຄອນຫຼວງວຽງຈັນ; ຜ່ານການກວດຄົ້ນ, ເຈົ້າໜ້າທີ່ສາມາດກັກຕົວຜູ້ຖືກຫາໄດ້ 2 ຄົນ ຄື: ຄົນລາວ 1 ຄົນ ແລະ ຄົນເກົາຫຼີໃຕ້ 1 ຄົນ.
ພ້ອມດຽວກັນນັ້ນ, ເຈົ້າໜ້າທີ່ຍັງສາມາດຍຶດຂອງກາງທີ່ໃຊ້ເຂົ້າໃນການຫຼິ້ນພະນັນໄດ້ຫຼາຍລາຍການ, ລວມມີ: ໂຕະສຳລັບຫຼິ້ນໄພ້ ປົກເກີ 40 ໂຕະຊິບ (Chip) ແລກປ່ຽນເງິນພະນັນ 7.840 ຊິບໄພ້ 976 ຊຸດ, ຄອມພິວເຕີຕັ້ງໂຕະ 6 ຊຸດ,
ໂຕະນ້ອຍ (ຮູບມົນ) 12 ຊຸດ, ຈໍ LED ຂະໜາດໃຫຍ່ 1 ຊຸດ
ນອກຈາກອຸປະກອນດັ່ງກ່າວແລ້ວ, ເຈົ້າໜ້າທີ່ຍັງຕົກສະລຶງເມື່ອພົບເຫັນ ໃບອະນຸຍາດຜູ້ສ້າງຕັ້ງຫົວໜ່ວຍກິລາ ປະເພດປົກເກີ (ໝາກລຸກ) ເຊິ່ງລະບຸຊື່ ທ້າວ ແກ້ວອາລຸນ ແສ່ງດາລາ, ອາຍຸ 36 ປີ, ອາຊີບຄ້າຂາຍ, ຢູ່ບ້ານວັງຊາຍ, ເມືອງໄຊເສດຖາ, ນະຄອນຫຼວງວຽງຈັນ.
ປັດຈຸບັນ, ເຈົ້າໜ້າທີ່ຕຳຫຼວດກຳລັງເລັ່ງດຳເນີນການສືບສວນ-ສອບສວນຂະຫຍາຍຜົນ ເພື່ອນຳຕົວຜູ້ກະທຳຜິດ ແລະ ຜູ້ຢູ່ເບື້ອງຫຼັງ ມາດຳເນີນຄະດີຕາມລະບຽບກົດໝາຍຢ່າງເຂັ້ມງວດ.
