ຂປລ. ແຫລ່ງຂ່າວຈາກ ແຂວງອຸດົມໄຊ ໃຫ້ຮູ້ວ່າ: ບ້ານນໍ້າເງິນ ເມືອງນາໝໍ້ ແຂວງອຸດົມໄຊ ເປັນອີກບ້ານໜຶ່ງ ທີ່ຖືກຜົນກະທົບຈາກໄພພິບັດນໍ້າຖ້ວມ ໜັກໜ່ວງທີ່ສຸດ ໃນວັນທີ 29-30 ສິງຫາ 2026 ຜ່ານມາ, ຊຶ່ງໄດ້ຖ້ວມເຮືອນຊານ, ວັດວາອາລາມ, ຂົວ, ເສັ້ນທາງແຕ່ບ້ານຂວາງ ໄປຫານໍ້າເງິນຖືກຕັດຂາດ, ດິນເຈື່ອນຖົມທາງ, ທາງເຊາະເຈື່ອນ, ເສົາໄຟຟ້າລົ້ມຫລາຍກວ່າ 10 ເສົາ.
ທ່ານ ຈັກກິ ໄພອິນຕາ ຮອງປະທານຕາແສງຂວາງຄໍາ ເມືອງນາໝໍ້ ໄດ້ລາຍງານ ໃນວັນທີ 3 ກັນຍາ 2026 ໃນໂອກາດລົງຕິດຕາມສະພາບນໍ້າຖ້ວມ ໃຫ້ຮູ້ວ່າ: ປັດຈຸບັນນີ້, ບ້ານດັ່ງກ່າວ ບໍ່ມີນໍ້າດື່ມສະອາດ ແລະ ນ້ຳໃຊ້, ບໍ່ມີໄຟຟ້າ, ສັນຍານໂທລະສັບຖືກຕັດຂາດ, ການສັນຈອນໄປ-ມາລໍາບາກ ອາໄສການຍ່າງເອົາ ແລະ ເສັ້ນທາງນໍ້າເງິນ ຫາບ້ານນໍ້າແດງ ແລະ ນໍ້າເງິນໄປຫາບ້ານຕືກາ-ບ້ານຜາຄໍາ ໄປບໍ່ໄດ້ (ທາງຖືກຕັດຂາດ).
ປັດຈຸບັນ, ພະນັກງານຕາແສງ ໄດ້ແບ່ງຄວາມຮັບຜິດຊອບກັນ ລົງເຄື່ອນໄຫວ ຕິດຕາມສະພາບ ແລະ ເກັບກໍາຂໍ້ມູນຜົນເສຍຫາຍ ຢ່າງຮີບດ່ວນ.
ຂ່າວ: ວ້າ ຈາມົວ
