ຂປລ. ແຫລ່ງຂ່າວຈາກ ແຂວງອຸດົມໄຊ ໃຫ້ຮູ້ວ່າ: ເມື່ອບໍ່ດົນມານີ້, ຂະແໜງການ ອຸດສາຫະກຳແລະການຄ້າ (ອຄ) ແຂວງອຸດົມໄຊ ເຄື່ອນຕິດຕາມຊຸກຍູ້ວຽກງານອຸດສາຫະກຳ-ການຄ້າຢູ່ເມືອງປາກແບງ ຊຶ່ງນຳໂດຍທ່ານ ທ່ານ ອາລຸນ ບຸນວິໄລ ຫົວໜ້າພະແນກອຸດສາຫະກຳ ແລະ ການຄ້າແຂວງອຸດົມໄຊ.
ທ່ານ ອ່ອນຕາ ສາລິກາທອງ ຫົວໜ້າຫ້ອງການອຸດສາຫະກຳ ແລະ ການຄ້າເມືອງປາກແບງ ໄດ້ຍົກໃຫ້ເຫັນສະພາບທີ່ພົ້ນເດັ່ນຄື: ການຈັດຕັ້ງປະຕິບັດຄຸ້ມຄອງແຮ່ທາດ ແມ່ນໄດ້ສ້າງແຜນວຽກໂດຍສົມທົບກັບພາກສ່ວນ, ຂະແໜງການຕ່າງໆ, ການສະກັດກັ້ນການລັກລອບຂຸດຄົ້ນແຮ່ທາດ ໂດຍບໍ່ໄດ້ຮັບອະນຸຍາດຈາກລັດຖະບານ ແມ່ນມີມາດຕະການຕໍ່ຜູ້ລະເມີດສ້າງບົດບັນທຶກກ່າວເຕືອນ, ສຶກສາອົບຮົມ ແລະ ປັບໃໝຕາມລະບຽບການ, ວຽກງານຄຸ້ມຄອງລາຄາສິນຄ້າ ໄດ້ປະຕິບັດຕາມພາວະທາງດ້ານເສດຖະກິດ ໃນການຂະຫຍາຍຕົວໃນແຕ່ລະໄລຍະ, ປະຕິບັດຕາມນິຕິກຳທີ່ຂັ້ນເທິງວາງອອກໃນແຕ່ລະລາຍການຂອງສິນຄ້າ ແລະ ການສົມທຽບປະລິມານຂອງສິນຄ້າທີ່ມີຢູ່ພາຍໃນເມືອງ ໂດຍປະສານງານກັບບັນດາເມືອງ, ແຂວງທີ່ໃກ້ຄຽງ ເພື່ອບໍ່ໃຫ້ສູງເກີນໄປ ແລະ ຫລຸດລົງເກີນໄປ ໃຫ້ຢູ່ໃນລາຄາສົມດູນ. ສຳລັບການຈັດຕັ້ງປະຕິບັດວຽກງານ ທະບຽນວິສາຫະກິດ, ວຽກງານທໍລະນີສາດ ແລະ ບໍ່ແຮ່, ວຽກງານສົ່ງເສີມການພັດທະນາສິນຄ້າ ແລະ ການບໍລິການ, ວຽກງານອຸສາຫະກຳປຸງແຕ່ງ, ວຽກງານຊັບສິນທາງປັນຍາ, ວຽກງານການຄ້າພາຍໃນ, ວຽກງານກວດກາການຄ້າຂັ້ນເມືອງ ແລະ ວຽກງານດ້ານພະລັງງານ ພ້ອມທັງໄດ້ຍົກໃຫ້ເຫັນດ້ານອ່ອນຂໍ້ຄົງຄ້າງ, ບັນຫາສິ່ງທ້າທາຍທີ່ຈະຕ້ອງສືບຕໍ່ແກ້ໄຂໃນຕໍ່ໜ້າ.
ບັນດາຜູ້ແທນກອງປະຊຸມ ກໍຄືຂະແໜງການທີ່ກ່ຽວຂ້ອງຂັ້ນແຂວງ, ຂັ້ນເມືອງ ຍັງໄດ້ປະກອບຄຳຄິດຄຳເຫັນສະຫລຸບຖອດຖອນບົດຮຽນຮ່ວມກັນ ກ່ຽວກັບບັນດາໜ້າວຽກຕ່າງໆ ເປັນຕົ້ນ ການຮັບໜ້າທີ່ວຽກງານໃໝ່ໃນແຕ່ລະດ້ານ ເພື່ອໃຫ້ມີຄວາມຊຳນິຊຳນານ ແລະ ປະຕິບັດໃຫ້ຖືກຕ້ອງສອດຄ່ອງ ຕາມພາລະບົດບາດສິດ ແລະ ໜ້າທີ່ຄວາມຮັບຜິດຊອບ ເພື່ອຮັບປະກັນການຈັດຕັ້ງປະຕິບັດວຽກງານ ໃນແຕ່ລະດ້ານໃຫ້ໄດ້ຮັບປະສິດທິພາບ ແລະ ປະສິດທິຜົນເປັນຢ່າງດີ.
ໂອກາດດັ່ງກ່າວ, ທ່ານ ອາລຸນ ບຸນວິໄລ ໄດ້ຍົກໃຫ້ເຫັນຄວາມໝາຍຄວາມສຳຄັນ ຂອງວຽກງານອຸດສາຫະກຳ-ການຄ້າ, ຍົກໃຫ້ເຫັນສະພາບຄວາມຫຍຸ້ງຍາກສິ່ງທ້າທາຍ ເປັນຕົ້ນ ຄວາມບໍ່ສະຫງົບຢູ່ໃນພາກພື້ນສາກົນ ຊຶ່ງເຮັດໃຫ້ມີຜົນກະທົບຕໍ່ພາຍໃນປະເທດ ໂດຍສະເພາະ ບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ, ອັດຕາເງິນເຟີສູງ ລາຄານ້ຳມັນແພງ ພ້ອມທັງຮຽກຮ້ອງໃຫ້ຄະນະນຳ ແລະ ພະນັກງານທີ່ກ່ຽວຂ້ອງເອົາໃຈໃສ່ຄົ້ນຄວ້າຄືນ ບັນຫາຈຸດອ່ອນຂໍ້ຄົງຄ້າງ, ພາລະບົດບາດ ສິດ ໜ້າທີ່ ເປັນຕົ້ນ ແຜນພັດທະນາເສດຖະກິດ-ສັງຄົມຂອງເມືອງ, ບັນດາແຜນຈຸດສຸມຕ່າງໆ ທີ່ນອນຢູ່ໃນວຽກງານອຸດສາຫະກຳ-ການຄ້າ ການສ້າງແຜນພັດທະນາຕາມທ່າແຮງບົ່ມຊ້ອນຂອງເມືອງ, ປຸກລະດົມຂົນຂວຍຊຸກຍູ້ສົ່ງເສີມ ບັນດາຜູ້ປະກອບການ ໃຫ້ມີລາຍຮັບຕາມທ່າແຮງທີ່ມີ, ເອົາໃຈໃສ່ດ້ານວຽກງານການເມືອງແນວຄິດ, ມີຄວາມສາມັກຄີພາຍໃນໃຫ້ເປັນອັນດຽວກັນ, ແລກປ່ຽນບົດຮຽນຮ່ວມກັນ ແລະ ເອົາໃຈໃສ່ວຽກງານວິຊາສະເພາະ, ສືບຕໍ່ຕິດຕາມຊຸກຍູ້ໂຄງການດ້ານອຸດສະຫະກຳແລະ ດ້ານພະລັງງານຕ່າງໆ ຢູ່ພາຍໃນເມືອງ ໃຫ້ສອດຄ່ອງຕາມແຜນທີ່ວາງໄວ້, ເປັນເຈົ້າການໃນການສະກັດກັ້ນ ແລະ ແກ້ໄຂບັນຫາການລັກລອບຂຸດຄົ້ນຄຳຕົກຂ້ອນຢູ່ພາຍໃນເມືອງ.
ໂອກາດດຽວກັນ, ຄະນະດັ່ງກ່າວ ຍັງໄດ້ລົງຕິດຕາມກວດກາສິນຄ້າ ພາຍໃນຕະຫລາດ, ບັນດາໂຄງການລົງທຶນ, ຫົວໜ່ວຍອຸດສາຫະກຳທັງພາກລັດ ແລະ ເອກະຊົນ ພາຍໃນເມືອງ ເພື່ອໃຫ້ດຳເນີນຖືກຕ້ອງສອດຄ່ອງຕາມລະບຽບການ.
