ວັນທີ 9 ກໍລະກົດ 2026 ກອງບັນຊາການປ້ອງກັນຄວາມສະຫງົບເມືອງທຸລະຄົມ ແຂວງວຽງຈັນ ໄດ້ສຶກສາອົບຮົມນັກຂັບຂີ່ ທີ່ລະເມີດກົດຈະລາຈອນ ແລະ ດັດແປງສະພາບເຕັກນິກລົດ, ໂດຍການເປັນປະທານຂອງ ພັທ ໄຊພອນ ຈັນທະລາດ ຄະນະພັກກອງບັນຊາການ ປກສ ເມືອງ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ພັທ ໄຊພອນ ຈັນລະລາດ ໄດ້ລາຍງານວ່າ: ໃນໄລຍະຕົ້ນປີ 2026 ພະແນກຕໍາຫລວດກອງຈະລາຈອນກອງບັນຊາການເມືອງ ໄດ້ລົງເຄື່ອນໄຫວຕິດຕາມ ຕ້ານປະກົດການຫຍໍ້ທໍ້ ໃນສັງຄົມໂດຍສະເພາະຜູ້ໃຊ້ລົດໃຊ້ຖະໜົນເຊັ່ນ: ໄວລຸ້ນຂັບຂີ່ລົດໄວ-ໃຊ້ສຽງດັງ, ດັດແປງສະພາບເຕັກນິກລົດຈັກ, ໃສ່ຢາງນ້ອຍ, ໃສ່ທໍ່ສຽງດັດແຕ່ງ, ລົດບໍ່ຕິດປ້າຍທະບຽນ ສາມາດເກັບກູ້ພາຫະນະໄດ້ ທັງໝົດ 13 ຄັນ.
ພະແນກຕໍາຫລວດກອງຈະລາຈອນ ໄດ້ຮຽກຕົວນັກຂັບຂີ່ພ້ອມທັງຜູ້ປົກຄອງ ເຂົ້າມາສຶກສາອົບຮົມ, ກ່າວເຕືອນຜູ້ຂັບຂີ່, ທີ່ຂີ່ລົດດັດແປງສະພາບເຕັກນິກ, ໃຫ້ມີສະຕິເຄົາລົບລະບຽບການຈະລາຈອນຢ່າງເຄັ່ງຄັດ. ພ້ອມນີ້ ຍັງໃຫ້ຜູ້ຂັບຂີ່ມ້າງ ແລະ ທໍາລາຍອາໄຫລ່ ທີ່ມີການດັດແປງສະພາບເຕັກນິກລົດຈັກອອກ ແລ້ວເອົາອາໄຫລ່ໃໝ່ມາປະກອບໃສ່ຄືນໃຫ້ຖືກຕ້ອງ.
ຈາກນັ້ນ, ຈຶ່ງໄດ້ເຮັດບົດບັນທຶກ ເພື່ອບໍ່ໃຫ້ກັບມາກະທຳຜິດອີກ ພ້ອມທັງມອບລົດຈັກຄືນໃຫ້ ແລະ ມອບໃຫ້ ຜູ້ປົກຄອງສືບຕໍ່ສຶກສາອົບຮົມລູກຕົນເອງ ແລະ ສ້ອມແປງລົດໃຫ້ກັບສູ່ສະພາບເດີມ.
