ແຫລ່ງຂ່າວຈາກ ແຂວງຫົວພັນ ໃຫ້ຮູ້ວ່າ: ຫ້ອງການອຸດສາຫະກຳ ແລະ ການຄ້າເມືອງຊຳໃຕ້ ແຂວງຫົວພັນ ຈັດພິທີທຳລາຍສິນຄ້ານຳເຂົ້າທີ່ບໍ່ຖືກຕ້ອງຕາມລະບຽບກົດໝາຍ ໃນວັນທີ 8 ມິຖຸນາ 2026 ຊຶ່ງປະເພດສິນຄ້າທີ່ນຳມາທຳລາຍໃນຄັ້ງນີ້ສ່ວນໃຫຍ່ແມ່ນ ເບຍ ທີ່ນຳເຂົ້າຈາກປະເທດເພື່ອນບ້ານ ໂດຍມີການລັກລອບນຳເຂົ້າແບບຜິດກົດໝາຍ ແລະ ບໍ່ຜ່ານຂະບວນການກວດກາ ທາງດ້ານພາສີ-ອາກອນ, ຊຶ່ງສ້າງຄວາມເສຍຫາຍ ໃຫ້ແກ່ງົບປະມານຂອງລັດ ແລະ ສົ່ງຜົນກະທົບ ຕໍ່ຄວາມເປັນລະບຽບຮຽບຮ້ອຍ ໃນການດຳເນີນທຸລະກິດ ແລະ ຄວາມປອດໄພຂອງຜູ້ບໍລິໂພກ ໂດຍມີ ທ່ານ ບຸນລຽງ ສີລິນພັນ ຮອງປະທານຄະນະກຳມະການປົກຄອງເມືອງຊຳໃຕ້ ພ້ອມດ້ວຍຄະນະກຳມະການກວດກາ ແລະ ຄຸ້ມຄອງຕະຫລາດຂັ້ນເມືອງ, ເຈົ້າໜ້າທີ່ຕຳຫລວດເສດຖະກິດ, ເຈົ້າໜ້າທີ່ພາສີ-ອາກອນ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ສິນຄ້າທີ່ນຳມາທຳລາຍໃນຄັ້ງນີ້ ປະກອບມີ: ເບຍຫວຽດນາມ (ຫລາຍຍີ່ຫໍ້) ຈຳນວນ 33 ແກັດ, ຊິງຊັ່ງບໍ່ໄດ້ມາດຖານ 8 ໜ່ວຍ ລວມມູນຄ່າ ປະມານ 9 ລ້ານກວ່າກີບ. ສິນຄ້າທັງໝົດເຫລົ່ານີ້ ແມ່ນໄດ້ມາຈາກການລົງພື້ນທີ່ກວດກຕິດຕາມ ແລະ ສະກັດກັ້ນ ຂອງເຈົ້າໜ້າທີ່ກ່ຽວຂ້ອງ ຢູ່ຕາມຈຸດກວດກາ ແລະ ບັນດາຮ້ານຄ້າພາຍໃນເມືອງຊຳໃຕ້ ທີ່ໄດ້ມີການລັກລອບນຳເຂົ້າ ແລະ ວາງຈຳໜ່າຍໂດຍບໍ່ມີເອກະສານຢັ້ງຢືນການເສຍພາສີ ແລະ ບໍ່ຖືກຕ້ອງຕາມລະບຽບຫລັກການຂອງ ສປປ ລາວ.
ໃນໂອກາດນີ້, ເຈົ້າໜ້າທີ່ກ່ຽວຂ້ອງ ໄດ້ຮຽກຮ້ອງມາຍັງບັນດາຜູ້ປະກອບການ, ພໍ່ຄ້າຊາວຂາຍ ພາຍໃນເມືອງຊຳໃຕ້ ໃຫ້ເອົາໃຈໃສ່ ແລະ ເຄົາລົບກົດໝາຍຢ່າງເຂັ້ມງວດ, ບໍ່ໃຫ້ນຳເຂົ້າ ຫລື ຮັບຊື້ສິນຄ້າທີ່ໜີພາສີ ແລະ ບໍ່ຖືກຕ້ອງຕາມກົດໝາຍມາຈຳໜ່າຍ. ພ້ອມກັນນັ້ນ, ກໍຂໍຄວາມຮ່ວມມືຈາກພໍ່ແມ່ປະຊາຊົນ ຊ່ວຍເປັນຫູເປັນຕາ ແລະ ແຈ້ງເບາະແສແກ່ເຈົ້າໜ້າທີ່ ຫາກພົບເຫັນການກະທຳຜິດ ເພື່ອຮ່ວມກັນປົກປັກຮັກສາສະຖຽນລະພາບ ທາງດ້ານເສດຖະກິດ ແລະ ຄວາມປອດໄພຂອງຜູ້ບໍລິໂພກພາຍໃນເມືອງໃຫ້ດີຂຶ້ນເລື້ອຍໆ.
ຂ່າວ-ພາບ: ຈັນໄຊ ໄຊຍະທຳ
