ກົມອຸຕຸນິຍົມ ແລະ ອຸທົກກະສາດ ໄດ້ອອກແຈ້ງເຕືອນພາຍຸໝູນເຂດຮ້ອນ ໄມສັກ (Maysak) ສະບັບທີ 2 ເນື່ອງຈາກມີຮ່ອງຄວາມກົດດັນອາກາດຕ່ຳຍັງສືບຕໍ່ພາດຜ່ານເຂດພາກເໜືອ ຫາ ພາກກາງຂອງປະເທດລາວ ສົມທົບກັບລົມມໍລະສຸມຕາເວັນຕົກສ່ຽງໃຕ້ທີ່ມີກຳລັງແຮງ.
ສຳລັບພາຍຸໝູນເຂດຮ້ອນ ໄມສັກ (Maysak) ຫົວທີ 10 ປະຈຳປີ 2026 ທີ່ຕັ້ງຢູ່ທະເລຈີນໃຕ້ຕອນກາງນັ້ນ ກຳລັງເຄື່ອນທີ່ໄປທາງທິດຕາເວັນຕົກສ່ຽງໃຕ້ດ້ວຍຄວາມໄວ 10 ກິໂລແມັດຕໍ່ຊົ່ວໂມງ ແລະ ຄາດວ່າຈະເຄື່ອນທີ່ເຂົ້າໃກ້ເກາະໄຮນຳ ສປ ຈີນ ໃນວັນທີ 4 ກໍລະກົດ 2026 ເຊິ່ງຈະສົ່ງຜົນໃຫ້ມີຝົນຕົກຟ້າຮ້ອງໃນລະດັບຄ່ອຍ ຫາ ປານກາງເປັນບໍລິເວນກວ້າງ ແລະ ມີຝົນຕົກໜັກພ້ອມລົມແຮງຢູ່ບາງທ້ອງຖິ່ນໃນແຕ່ລະພາກຂອງປະເທດລາວ ແຕ່ວັນທີ 2 ຫາ 5 ກໍລະກົດ 2026.
ສ່ວນພາຍຸໝູນເຂດຮ້ອນ ບາວີ (Bavi) ຫົວທີ 9 ທີ່ກຳລັງກໍ່ຕົວຢູ່ໃນເຂດມະຫາສະໝຸດປາຊີຟິກນັ້ນ ຈະບໍ່ສົ່ງຜົນກະທົບຕໍ່ປະເທດລາວ. ດັ່ງນັ້ນ ຈຶ່ງຂໍແຈ້ງເຕືອນເຖິງປະຊາຊົນບັນດາເຜົ່າ, ອຳນາດການປົກຄອງ ແລະ ທຸກພາກສ່ວນ ໃຫ້ມີສະຕິລະມັດລະວັງ ແລະ ກຽມພ້ອມຮັບມືກັບສະພາບຝົນຕົກປານກາງ ຫາ ຕົກໜັກຕໍ່ເນື່ອງຫຼາຍວັນ ເຊິ່ງອາດຈະເຮັດໃຫ້ເກີດມີນ້ຳຖ້ວມຊຸ, ດິນເຈື່ອນ ແລະ ນ້ຳຖ້ວມຂັງໃນຕົວເມືອງ ພ້ອມທັງໃຫ້ຕິດຕາມຂ່າວພະຍາກອນອາກາດຢ່າງຕໍ່ເນື່ອງ.
