ນິວຊີແລນສັ່ງອົບພະຍົບປະຊາຊົນຫຼາຍຮ້ອຍຄົນອອກຈາກເຮືອນຊານຮິມຝັ່ງໃນນະຄອນຫຼວງເວລລິງຕັນ ຫຼັງຈາກປະເຊີນໜ້າກັບຄື້ນຂະໜາດໃຫຍ່ສູງເຖິງ 11 ແມັດ ຊັດເຂົ້າຝັ່ງ ທ່າມກາງກະແສລົມແຮງຈັດ ກະທົບການເດີນທາງ ແລະ ຕ້ອງຍົກເລີກຫຼາຍຖ້ຽວບິນ.
ຄື້ນຂະໜາດໃຫຍ່ຊັດເຂົ້າສູ່ບໍລິເວນອ່າວເວລລິງຕັນ ໃນວັນອັງຄານທີ 9 ມິຖຸນາ ຕາມເວລາທ້ອງຖິ່ນ ໂດຍໜ່ວຍງານພະຍາກອນອາກາດນິວຊີແລນລະບຸວ່າ ຄວາມສູງຂອງຄື້ນວັດໄດ້ຮອດ 11 ແມັດ.
ທ່ານ ແອນດຣິວ ລິດເທິລ ນາຍົກເທດສະມົນຕີນະຄອນຫຼວງເວລລິງຕັນ ປະກາດສະພາວະສຸກເສີນກ່ອນທີ່ຄື້ນຂະໜາດໃຫຍ່ຈະເຂົ້າເຖິງຝັ່ງ ພ້ອມສັ່ງອົບພະຍົບປະຊາຊົນໃນພື້ນທີ່ສ່ຽງທາງໃຕ້ ໄດ້ແກ່ ໂອວີໂຣ ເບ, ໄອສະແລນ ເບ, ຮອດຕັນ ເບ ແລະ ເບຣກເກີ ເບ ພ້ອມເຕືອນວ່າ ເຈົ້າໜ້າທີ່ສຸກເສີນອາດໃຫ້ການຊ່ວຍເຫຼືອຜູ້ທີ່ຝ່າຝືນຄຳສັ່ງ ແລະ ຢູ່ໃນພື້ນທີ່ອັນຕະລາຍບໍ່ໄດ້.
ຄຳສັ່ງອົບພະຍົບມີຜົນຕັ້ງແຕ່ຊ່ວງເຊົ້າວັນອັງຄານ ໂດຍຕຳຫຼວດຖືກສົ່ງເຂົ້າໄປຄວບຄຸມພື້ນທີ່ ພ້ອມຕັ້ງດ່ານກັ້ນຖະໜົນໂດຍຮອບ ເພື່ອປ້ອງກັນປະຊາຊົນເດີນທາງເຂົ້າໃກ້ຝັ່ງ.
ສະພາທ້ອງຖິ່ນລະບຸວ່າ ເຄີຍເກີດເຫດການລັກສະນະດັ່ງກ່າວມາແລ້ວໃນປີ 2021 ສ້າງຄວາມເສຍຫາຍໃຫ້ເຮືອນຊານຫຼາຍຫຼັງໃນເຂດເບຣກເກີ ເບ ໂດຍຄັ້ງນັ້ນຄື້ນສູງປະມານ 6.5 ແມັດ.
ນອກຈາກຄື້ນສູງແລ້ວ ນະຄອນຫຼວງເວລລິງຕັນຍັງປະເຊີນໜ້າກັບລົມກະໂຊກແຮງ ໂດຍບໍລິເວນໄອສະແລນ ເບ ມີລາຍງານວ່າລົມແຮງຈົນເຮັດໃຫ້ຜູ້ຍິງ 2 ຄົນຖືກພັດລົ້ມ ຂະນະຄື້ນຊັດນ້ຳຂຶ້ນມາເທິງຖະໜົນ.
ສະໜາມບິນເວລລິງຕັນໄດ້ຮັບຜົນກະທົບເຊັ່ນກັນ ຫຼັງຈາກຕ້ອງຍົກເລີກບາງຖ້ຽວບິນ ຈາກກະແສລົມທີ່ມີຄວາມໄວສູງສຸດເຖິງ 128 ກິໂລແມັດຕໍ່ຊົ່ວໂມງ.
ຂະນະດຽວກັນ ເຮືອບິນຂະໜາດນ້ອຍຂອງສາຍການບິນທ້ອງຖິ່ນ ໂກນເດັນ ເບ ແອ ຖືກແຮງລົມພັດລົ້ມຕຽງຂ້າງຂະນະຈອດຢູ່ໃນສະໜາມບິນ ເຖິງວ່າຈະບໍ່ມີຜູ້ໂດຍສານຢູ່ເທິງເຄື່ອງ ໂດຍເຈົ້າໜ້າທີ່ດັບເພີງໄດ້ເຂົ້າມາຊ່ວຍຍຶດເຮືອບິນໃຫ້ຢູ່ກັບພື້ນ.
ລ່າສຸດ ທາງການຍັງຄົງເຕືອນປະຊາຊົນໃຫ້ຫຼີກລ່ຽງພື້ນທີ່ຊາຍຝັ່ງ ເນື່ອງຈາກສະພາບອາກາດເລວຮ້າຍ ແລະ ຄື້ນສູງຍັງຄົງເປັນໄພອັນຕະລາຍຕໍ່ເນື່ອງ.
ຂ່າວຈາກ: channelnewsasia
