ປກສ ແຂວງຊຽງຂວາງ ລາຍງານວ່າ: ວັນທີ 15 ກັນຍາ 2026 ເຈົ້າໜ້າທີ່ກອງພັນປ້ອງກັນເຄື່ອນທີ່ ສົມທົບກັບເຈົ້າໜ້າທີ່ພະແນກສິ່ງແວດລ້ອມ ຫ້ອງຕຳຫລວດ ກອງບັນຊາການປ້ອງກັນຄວາມສະຫງົບແຂວງຊຽງຂວາງ ໄດ້ລົງກວດກາ ແລະ ມ້າງຄະດີການລັກລອບຂຸດຄົ້ນແຮ່ທາດທຳມະຊາດ ໂດຍບໍ່ຖືກຕ້ອງຕາມລະບຽບກົດໝາຍ ຢູ່ບ້ານຊອຍນາຟ້າ ຄຸ້ມບ້ານຟາດ ເມືອງແປກ ແຂວງຊຽງຂວາງ.
ຜ່ານການລົງກວດກາຕົວຈິງ, ພົບເຫັນປະຊາຊົນ 2 ຄົນ ກຳລັງລັກລອບກະທຳຜິດ ພ້ອມທັງຢຶດຂອງກາງ ແລະ ອຸປະກອນຮັບໃຊ້ໃນການກະທຳຜິດຈຳນວນໜຶ່ງ ເຊິ່ງປະກອບມີ ຈັກດູດນ້ຳຈຳນວນ 1 ເຄື່ອງ, ເຄື່ອງຈັກບົດຄຳຈຳນວນ 2 ເຄື່ອງ, ແຮ່ທາດທີ່ບໍ່ທັນບົດຈຳນວນ 14 ເປົານ້ອຍ, ແຮ່ທາດທີ່ບົດແລ້ວຈຳນວນ 300 ກວ່າເປົາ ພ້ອມດ້ວຍອຸປະກອນອື່ນໆ ຈຳນວນໜຶ່ງ.
ປັດຈຸບັນ, ເຈົ້າໜ້າທີ່ໄດ້ກັກຕົວຜູ້ລັກລອບກະທຳຜິດທັງ 2 ຄົນດັ່ງກ່າວ ນຳສົ່ງດຳເນີນການສືບສວນ-ສອບສວນ ຕາມລະບຽບກົດໝາຍ. ສ່ວນອຸປະກອນ ແລະ ຂອງກາງຕ່າງໆ ທີ່ພົວພັນເຖິງການກະທຳຜິດ ແມ່ນໄດ້ເກັບມ້ຽນໄວ້ ຈົນກວ່າຈະສອບສວນສຳເລັດຕາມຂັ້ນຕອນ.
