ຂປລ. ກອງປະຊຸມຄະນະສະເພາະກິດແກ້ໄຂບັນຫານໍ້າມັນເຊື້ອໄຟ ຈັດຂຶ້ນໃນວັນທີ 26 ມີນາ 2026 ທີ່ສໍານັກ ງານນາຍົກລັດຖະມົນຕີ, ພາຍໃຕ້ການເປັນປະທານຂອງ ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ຜູ້ຊີ້ນໍາ ວຽກງານຂົງເຂດເສດຖະກິດ ແລະ ການພົວພັນຮ່ວມມືກັບຕ່າງປະເທດ, ຫົວໜ້າຄະນະສະເພາະກິດ, ມີບັນດາທ່ານ ໃນຄະນະ, ກອງເລຂາຄະນະສະເພາະກິດ, ຜູ້ຕາງໜ້າຂະແໜງການ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ. ທັງນີ້, ກໍເພື່ອສືບຕໍ່ຈັດຕັ້ງຜັນຂະຫຍາຍ ຄຳສັ່ງຂອງນາຍົກລັດຖະມົນຕີ ສະບັບເລກທີ 40/ນຍ, ລົງວັນທີ 13 ມີນາ 2026 ວ່າດ້ວຍ ການເພີ່ມທະວີແກ້ໄຂບັນຫາຜົນກະທົບຈາກລາຄານໍ້າມັນເຊື້ອໄຟ ສູ່ຂົງເຂດວຽກງານຕ່າງໆ ໃຫ້ເກີດເປັນຮູບປະທຳຕົວຈິງ ຫລາຍຂຶ້ນ.
ກອງປະຊຸມ ໄດ້ຮັບຟັງລາຍງານຜົນການແກ້ໄຂບັນຫານໍ້າມັນເຊື້ອໄຟ ໃນໄລຍະຜ່ານມາ ເປັນຕົ້ນ ການອອກ ບັນດາມາດຕະການ ແລະ ນະໂຍບາຍຕ່າງໆ, ການຈັດຕັ້ງຜັນຂະຫຍາຍທິດຊີ້ນຳຂອງລັດຖະບານ ຢູ່ບັນດາຂະແໜງການ ແລະ ທ້ອງຖິ່ນ, ສະພາບການສະໜອງນໍ້າມັນ ກໍຄື ການນໍາເຂົ້າ, ລາຄາ, ການແຈກຢາຍ, ການບໍລິການປໍ້ານໍ້າມັນ ແລະ ອື່ນໆ, ພ້ອມທັງປຶກສາຫາລືກ່ຽວກັບການແກ້ໄຂບາງບັນຫາທີ່ຄົງຄ້າງ ແລະ ບໍ່ທັນໂລ່ງລ່ຽນ ໃນການນຳເຂົ້າ-ແຈກຢາຍ-ຈໍາໜ່າຍນໍ້າມັນເຊື້ອໄຟ ໃຫ້ສັງຄົມໄດ້ຊົມໃຊ້ ແລະ ການຊຸກຍູ້ສົ່ງເສີມການນຳໃຊ້ລົດໄຟຟ້າ ໃນໄລຍະຜ່ານມາ ເພື່ອວາງນະ ໂຍບາຍ ກໍຄື ມາດຕະການໃນຕໍ່ໜ້າໃຫ້ມີປະສິດທິພາບ ແລະ ປະສິດທິຜົນ ເປັນຕົ້ນ ແຫລ່ງນໍາເຂົ້ານໍ້າມັນເຊື້ອໄຟໃໝ່, ນະໂຍບາຍຕໍ່ບໍລິສັດ ແລະ ພາກສ່ວນທີ່ນຳເຂົ້ານໍ້າມັນເຊື້ອໄຟ ທີ່ມີເງື່ອນໄຂ-ທ່າແຮງດີ; ການກຳນົດນະໂຍບາຍສົ່ງເສີມ ການນໍາໃຊ້ລົດໄຟຟ້າ ທີ່ມີຄຸນນະພາບ, ຫັນການຊໍາລະສະສາງ ຜ່ານລະບົບທະນາຄານ, ຈຳກັດໄດ້ການສວຍໂອກາດຕ່າງໆ, ທັງເຮັດໃຫ້ພາກທຸລະກິດ ມີກຳໄລທີ່ສົມເຫດສົມຜົນ ແລະ ສອດຄ່ອງກັບນະໂຍບາຍການຄ້າກັບຕ່າງປະເທດ, ແນໃສ່ຫລຸດ ຜ່ອນຜົນກະທົບຕໍ່ສັງຄົມ ໂດຍສະເພາະຄ່າຄອງຊີບ, ການຜະລິດ, ອັດຕາແລກປ່ຽນ ແລະ ການປະຕິບັດແຜນພັດທະນາຕ່າງໆ ທັງໄລຍະສັ້ນ ແລະ ໄລຍະຍາວ.
ຂ່າວ-ພາບ: ກົມປະຊາສຳພັນ ຫສນຍ.
