ຂ່າວຕ່າງປະເທດລາຍງານ ໃນວັນທີ 10 ກຸມພາ ຜ່ານມາວ່າ: ມະຫາວິທະຍາໄລ Ben-Gurion ຂອງ Negev ໃນອິສຣາເອນ ໄດ້ເປີດເຜີຍຜົນການສຶກສາທີ່ສະແດງໃຫ້ເຫັນວ່າເດັກນ້ອຍຈາກຄອບຄົວທີ່ກິນອາຫານມັງສະວິຣັດ ແລະ ກິນອາຫານເຈ (Vegetarian and vegan) ມີການເຕີບໂຕໃນອັດຕາທີ່ເກືອບໃກ້ຄຽງກັນກັບເດັກນ້ອຍທີ່ກິນອາຫານທຸກປະເພດ.
ນັກຄົ້ນຄວ້າຈາກມະຫາວິທະຍາໄລດັ່ງກ່າວ, ຮ່ວມມືກັບກະຊວງສາທາລະນະສຸກອິສຣາເອນ ໄດ້ວິເຄາະຂໍ້ມູນຈາກເດັກນ້ອຍເກືອບ 1.2 ລ້ານຄົນໃນໄລຍະເວລາ 10 ປີ (2014-2023) ຊຶ່ງກວມເອົາປະມານ 70% ຂອງເດັກນ້ອຍທັງໝົດໃນອິສຣາເອນ, ເພື່ອສຶກສາວ່າອາຫານທີ່ເຮັດຈາກພືດສາມາດສະໜັບສະໜູນການເຕີບໂຕຢ່າງໄວວາໃນໄລຍະສອງປີທຳອິດໄດ້ ຫຼື ບໍ່?.
ການສຶກສາພົບວ່າ: ເດັກນ້ອຍທີ່ກິນອາຫານມັງສະວິຣັດ ແລະ ກິນອາຫານເຈ ມີນ້ຳໜັກ, ຄວາມສູງ ແລະ ຂະ ໜາດຮອບຫົວທີ່ຂະຫຍາຍຕົວບໍ່ແຕກຕ່າງຈາກເດັກນ້ອຍທີ່ກິນທັງພືດ ແລະ ສັດ. ເຖິງວ່າເດັກນ້ອຍທີ່ກິນອາຫານເຈອາດຈະມີໂອກາດທີ່ນ້ຳໜັກນ້ອຍກວ່າເກນເລັກໜ້ອຍໃນ 60 ມື້ທຳອິດຫຼັງເກີດ, ແຕ່ຄວາມແຕກຕ່າງນີ້ຈະຫາຍໄປເມື່ອອາຍຸຄົບ 2 ປີ. ໃນຂະນະທີ່ບັນຫາເດັກນ້ອຍໃຫຍ່ບໍ່ເຕັມທີ່ແມ່ນຫາຍາກຫຼາຍໃນທຸກກຸ່ມອາຫານ ແລະ ບໍ່ພົບຄວາມແຕກຕ່າງທີ່ສຳຄັນ.
ທີມນັກຄົ້ນຄວ້າໄດ້ເນັ້ນໜັກວ່າ: ສິ່ງສຳຄັນແມ່ນການວາງແຜນການກິນອາຫານທີ່ເຮັດຈາກພືດຢ່າງເໝາະສົມ, ຄຽງຄູ່ກັບການສະໜັບສະໜູນດ້ານໂພຊະນາການໃນລະຫວ່າງການຖືພາ ແລະ ເດັກອ່ອນ. ພ້ອມທັງກ່າວຕື່ມວ່າ: ອາຫານທີ່ເຮັດຈາກພືດບໍ່ສົ່ງຜົນກະທົບທາງລົບຕໍ່ການພັດທະນາທາງດ້ານຮ່າງກາຍໃນໄວເດັກ ແລະ ຂໍ້ມູນນີ້ຈະເປັນຫຼັກຖານອ້າງອີງສຳລັບການຕັດສິນໃຈກ່ຽວກັບນະໂຍບາຍສາທາລະນະສຸກທົ່ວໂລກໃນອະນາຄົດ.
ນອກຈາກນັ້ນ, ການສຶກສານີ້ຍັງໄດ້ຖືກຕີພິມໃນວາລະສານ JAMA Network Open.
