ສຳນັກຂ່າວຕ່າງປະເທດລາຍງານວ່າ: ວັນທີ 10 ກຸມພາ 2026 ເກີດເຫດເຮືອບິນໂດຍສານຂະໜາດກາງຂອງສາຍການບິນ “ສະຕາສະກາຍ ເອເວຍຊັນ” (Star Sky Aviation) ແຫ່ງປະເທດໂຊມາລີ ປະສົບບັນຫາຂັດຂ້ອງທາງດ້ານເຕັກນິກ ເຮັດໃຫ້ນັກບິນຕັດສິນໃຈນຳເຮືອບິນລົງຈອດສຸກເສີນ ຢູ່ບໍລິເວນຊາຍຝັ່ງ ໃກ້ກັບສະໜາມບິນສາກົນ ໃນນະຄອນຫລວງໂມກາດີຊູ, ເຊິ່ງຜູ້ໂດຍສານ ແລະ ລູກເຮືອທັງໝົດ 55 ຄົນ ຢູ່ເທິງເຮືອບິນປອດໄພທັງໝົດ.
ສາຍການບິນ ສະຕາສະກາຍ ອອກຖະແຫລງການຢືນຢັນວ່າ: ການຕັດສິນໃຈທີ່ເດັດຂາດ ແລະ ວ່ອງໄວຂອງນັກບິນ ມີຄວາມສຳຄັນຢ່າງຍິ່ງໃນການຊ່ວຍຊີວິດຜູ້ໂດຍສານ 50 ຄົນ ແລະ ລູກເຮືອ 5 ຄົນ ທີ່ຢູ່ເທິງເຮືອບິນລຳດັ່ງກ່າວ.ທາງດ້ານ ອົງການການບິນພົນລະເຮືອນຂອງໂຊມາລີ (CAA) ໃຫ້ຮູ້ວ່າ: ເຮືອບິນລຸ້ນ “ຟອກເກີ 50” (Fokker 50) ໄດ້ລາຍງານບັນຫາຂັດຂ້ອງ ຫຼັງຈາກບິນຂຶ້ນຈາກສະໜາມບິນໃນນະຄອນຫຼວງໂມກາດີຊູ ໄດ້ບໍ່ດົນ ໃນຊ່ວງເຊົ້າວັນອັງຄານ ວັນທີ 10 ກຸມພາ 2026 ເຮັດໃຫ້ນັກບິນຕ້ອງຂໍອະນຸຍາດນຳເຮືອບິນກັບຄືນມາລົງຈອດທັນທີ.
ທ່ານ ອາເໝັດ ມາຄາລິນ ຮັດຊັນ, ຜູ້ນຳອຳນວຍການ CAA ກ່າວວ່າ: ໃນຂະນະທີ່ເຮືອບິນລົງແຕະພື້ນນັ້ນ ບໍ່ສາມາດຢຸດຢູ່ເທິງທາງແລ່ນ (Runway) ໄດ້, ເຮັດໃຫ້ເຮືອບິນໄຖລອອກນອກລານບິນ ແລະ ໄປຢຸດລົງໃນເຂດນ້ຳຕື້ນ.
ພາຍຫຼັງເກີດເຫດ, ຄະນະຜູ້ແທນຂອງສະຫະພາບອາຟຣິກາໃນໂຊມາລີ ພ້ອມດ້ວຍກອງກຳລັງສະຫະປະຊາຊາດ ໄດ້ຮີບຮ້ອນລົງໄປຍັງຈຸດເກີດເຫດ ເພື່ອປະຕິບັດການກູ້ໄພ ແລະ ໃຫ້ການຊ່ວຍເຫຼືອຢ່າງວ່ອງໄວ, ໂດຍມີລັດຖະມົນຕີກະຊວງຄົມມະນາຄົມຂອງໂຊມາລີ ລົງຕິດຕາມສະຖານະການໃນທີ່ເກີດເຫດດ້ວຍຕົນເອງ.
