ໃນວາລະດຳເນີນກອງປະຊຸມສະໄໝສາມັນ ເທື່ອທີ 10 ຂອງສະພາປະຊາຊົນ ນະຄອນຫລວງວຽງຈັນ ຊຸດທີ IV ວັນທີ 16 ທັນວາ 2025 ພາຍໃຕ້ການເປັນປະທານຂອງ ທ່ານ ອານຸພາບ ຕຸນາລົມ ປະທານສະພາປະຊາຊົນ ນະຄອນຫລວງວຽງຈັນ (ນວ), ທ່ານ ປັນຍາ ມະນີວົງ ຫົວໜ້າຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ (ຄບຕ) ໄດ້ຊີ້ແຈ້ງຕໍ່ຄຳຊັກຖາມ ຂອງສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ນວ ແລະ ສະມາຊິກ ສະພາປະຊາຊົນ ນວ ກ່ຽວກັບການຄຸ້ມຄອງຮ່ອງລະບາຍນໍ້າໃນນະຄອນຫລວງວຽງຈັນ.
ທ່ານ ປັນຍາ ມະນີວົງ ໄດ້ຊີ້ແຈ້ງວ່າ: ໄລຍະຜ່ານມາ, ອົງການປົກຄອງນະຄອນຫລວງວຽງຈັນ ກໍຄື ຫ້ອງ ການຄຸ້ມຄອງ ແລະ ບໍລິການຕົວເມືອງວຽງຈັນ ສົມທົບພາກສ່ວນກ່ຽວຂ້ອງ ເປັນເຈົ້າການໃນການຄຸ້ມຄອງ, ຕິດຕາມ, ກວດກາ, ປົກປັກຮັກສາ, ສ້ອມແປງ ແລະ ໄດ້ເຮັດອະນາໄມ ລວງຮ່ອງລະບາຍນໍ້າ ໃນນະຄອນຫລວງວຽງຈັນ ເປັນຕົ້ນ ຮ່ອງນ້ຳສັກ, ຮ່ອງແຊງ ແລະ ຮ່ອງທອງ ເພື່ອຮອງຮັບປະລິມານນ້ຳຈາກຄົວເຮືອນ, ຊຸມຊົນ, ຮອງຮັບປະລິມານນ້ຳຝົນໃນລະດູຝົນ ຫລີກລ່ຽງບັນຫານ້ຳອັ່ງໃນຕົວເມືອງ ກໍຄື ການຕ້ານຖ້ວມ. ເຖິງຢ່າງໃດກໍຕາມ ການຄຸ້ມຄອງ-ປົກປັກຮັກສາ ລະບົບຮ່ອງລະບາຍນ້ຳໃນຕົວເມືອງ ຍັງພົບບັນຫາຄວາມຫຍຸ້ງຍາກໃນຫລາຍດ້ານຕິດພັນກັບການມີສ່ວນຮ່ວມ ຂອງທຸກພາກສ່ວນໃນສັງຄົມ ໂດຍສະເພາະ ຍັງມີສະພາບການບຸກລຸກ ເຊັ່ນ: ການປຸກສ້າງ ກວມເຂດສະຫງວນ ຂອງຮ່ອງລະບາຍນ້ຳ, ຖົມດິນຕັນແລວການໄຫລຂອງນ້ຳ, ການຖິ້ມຂີ້ເຫຍື້ອ ຫລື ສິ່ງເສດເຫລືອລົງໃສ່ຮ່ອງນ້ຳ ເຮັດໃຫ້ມີຄວາມຫຍຸ້ງຍາກໃນການ ອະນາໄມ. ນອກນັ້ນ, ການປ່ອຍນໍ້າເປື້ອນຈາກ ຄົວເຮືອນ, ຊຸມຊົນ ທີ່ບໍ່ໄດ້ຜ່ານການບໍາບັດ ປ່ອຍໂດຍກົງລົງສູ່ຮ່ອງລະບາຍນ້ຳ ເກີດຜົນກະທົບທາງດ້ານສິ່ງແວດລ້ອມ; ລວມທັງການພັດທະນາ ນຳໃຊ້ພື້ນທີ່ຮ່ອງດຳເນີນກິດຈະການຕ່າງໆ ກໍ່ຍັງສ້າງຄວາມຫຍຸ້ງຍາກ ໃນການອະນາໄມ-ລວງຮ່ອງ ແລະ ບັນຫາອື່ນໆ.
ຕໍ່ກັບການແກ້ໄຂບັນຫາທີ່ເກີດຂຶ້ນ, ອົງການປົກຄອງນະຄອນຫລວງວຽງຈັນ ຖືເປັນບັນຫາທີ່ສຳຄັນ ໄດ້ມອບໃຫ້ບັນດາພາກສ່ວນກ່ຽວຂ້ອງ ເປັນຕົ້ນ ພະແນກ ໂຍທາທິການ ແລະ ຂົນສົ່ງ ນະຄອນຫລວງວຽງຈັນ ອອກໜັງສືແຈ້ງການ ເຖິງພາກສ່ວນຜູ້ພັດທະນາໄດ້ຮັບຊາບ ແລະ ເຂົ້າໃຈ ໃນການຈັດຕັ້ງປະຕິບັດ ການຄຸ້ມຄອງ,ປົກປັກຮັກສາ, ການອະນາໄມລວງຮ່ອງ ໂດຍສະເພາະ ໄລຍະຜ່ານມາ ໄດ້ລົງແນະນຳທາງດ້ານເຕັກນິກ, ກຳນົດເປີດຈຸດລົງອະນາໄມ ແລະ ຕ້ອງເຮັດອະນາໄມຢ່າງໜ້ອຍ 1 ຄັ້ງຕໍ່ປີ; ໄດ້ສົມທົບອົງການປົກຄອງເມືອງ-ບ້ານ ໂຄສະນາເຜີຍແຜ່ ບັນດານິຕິກຳ ຕິດພັນກັບການປົກປັກຮັກສາ, ການມີສ່ວນຮ່ວມ ລວມທັງຂໍ້ຫ້າມ ກໍຄື ມາດຕະການຕໍ່ຜູ້ສ້າງຜົນເສຍຫາຍຕໍ່ຮ່ອງລະບາຍນ້ຳ; ຄົ້ນຄວ້າ, ສຶກສາກົນໄກການແກ້ໄຂ ສະພາບນ້ຳເປື້ອນທີ່ສົ່ງຜົນກະທົບດ້ານສິ່ງແວດລ້ອມ ເຊັ່ນ: ແຜນການດູດນ້ຳຂອງເຂົ້າຄອງລະບາຍນ້ຳ ເພື່ອເປັນການລ້າງຮ່ອງລະບາຍນ້ຳ ໃນລະດູແລ້ງ, ຊຶ່ງປະກອບມີ 3 ຈຸດ ຄື: ຈຸດບ້ານອາກາດ, ຈຸດປາກປ່າສັກ ແລະ ຈຸດໂຮງແຮມແລນມາກ
ຂ່າວ: ກິດຕາ
ພາບ: ເກດສະໜາ
