ກະຊວງວັດທະນະທຳ ແລະ ການທ່ອງທ່ຽວ (ວທ) ໄດ້ຈັດກອງປະຊຸມສະຫຼຸບວຽກງານວັດທະນະທຳ ແລະ ການທ່ອງທ່ຽວ (ວທ) ທົ່ວປະເທດ ປະຈຳປີ 2025 ແລະ ທິດທາງປີ 2026 ຂຶ້ນໃນລະຫວ່າງວັນທີ 6-7 ເມສານີ້ ທີ່ນະຄອນຫຼວງວຽງຈັນ (ນວ) ໂດຍການເປັນປະທານຂອງທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງ ວທ, ມີຮອງລັດຖະມົນຕີ, ຮອງປະທານຄະນະກຳມະການປົກຄອງ ນວ ຜູ້ຊີ້ນໍາວຽກງານວັດທະນະທຳ-ສັງຄົມ, ມີອະດີດການນໍາກະຊວງ ວທ, ບັນດາຫົວໜ້າກົມ-ຮອງກົມ, ຫົວໜ້າພະແນກ ວທ ນວ, ມີບັນດາຮອງປະທານຄະນະກຳມະການປົກຄອງແຂວງ, ຜູ້ຊີ້ນຳວຽກງານ ວທ, ບັນດາທ່ານຫົວໜ້າພະແນກ ວທ ແຂວງກ່ຽວຂ້ອງເຂົ້າຮ່ວມແບບປົກກະຕິ ແລະ ອອນລາຍ.
ທ່ານ ນາງ ສວນສະຫວັນ ວິຍະເກດ ກ່າວເປີດກອງປະຊຸມວ່າ: ວຽກງານ ວທ ໄດ້ມີບົດບາດທີ່ສໍາຄັນໃນການປະກອບສ່ວນເຂົ້າໃນຂະບວນການ ນັບແຕ່ສະໄໝຕໍ່ສູ້ກູ້ຊາດ ຈົນມາຮອດຍຸກສ້າງສາ ແລະ ພັດທະນາປະເທດຊາດ ດ້ວຍການເສີມຂະຫຍາຍຄຸນຄ່າວັດທະນະທຳອັນດີງາມ ທີ່ມີເອກະລັກຂອງຊາດ ກໍຄືການພັດທະນາ ແລະ ຄຸ້ມຄອງການທ່ອງທ່ຽວໃຫ້ມີຄວາມຍືນຍົງ, ຊຸກຍູ້ການຂັບເຄື່ອນແຜນພັດທະນາເສດຖະກິດ-ສັງຄົມແຫ່ງຊາດ ເປັນແຕ່ລະໄລຍະຢ່າງແຂງແຮງ. ຕະຫຼອດໄລຍະ 1 ປີຜ່ານມາ, ຄະນະພັກ-ຄະນະນຳແຕ່ລະຂັ້ນທັງສູນກາງ ແລະ ທ້ອງຖິ່ນໄດ້ເອົາໃຈໃສ່ນໍາພາ-ຊີ້ນຳວຽກງານ ວທ ດ້ວຍຄວາມຮັບຜິດຊອບສູງ ຊຶ່ງສະແດງອອກໃຫ້ເຫັນຫຼາຍຜົນງານ. ບົນພື້ນຖານຜົນສໍາເລັດດັ່ງກ່າວນັ້ນເຫັນວ່າ, ພະນັກງານ-ລັດຖະກອນທົ່ວຂະແໜງການ ວທ ມີຄວາມຫ້າວຫັນໃນການປະຕິບັດໜ້າທີ່ການເມືອງຂອງຕົນ, ບັນດາກົມ, ກອງອ້ອມຂ້າງກະຊວງ ແລະ ບັນດາພະແນກ ວທ ແຂວງ ແລະ ນວ ໄດ້ເປັນເຈົ້າການ ປະຕິບັດໜ້າທີ່ວຽກງານວິຊາສະເພາະຂອງຕົນດ້ວຍຄວາມຮັບຜິດຊອບສູງ, ເປັນເສນາທິການໃຫ້ຄະນະພັກ-ຄະນະນຳກະຊວງ ກໍຄື ຄະນະພັກ ແລະ ອຳນາດການປົກຄອງທ້ອງຖິ່ນໄດ້ເປັນຢ່າງດີ ເຮັດໃຫ້ວຽກງານ ວທ ໄດ້ຮັບຜົນສໍາເລັດທັງດ້ານປະລິມານ ແລະ ຄຸນນະພາບຢ່າງຕໍ່ເນື່ອງເປັນກ້າວໆມາ ປະກອບສ່ວນເຮັດໃຫ້ປະເທດຊາດ ມີຄວາມສະຫງົບ, ມີສະຖຽນລະພາບ ແລະ ຄວາມໝັ້ນຄົງທາງດ້ານການເມືອງ, ປະຊາຊົນບັນດາເຜົ່າມີຄວາມສາມັກຄີປອງດອງ ແລະ ມີຊີວິດການເປັນຢູ່ທາງດ້ານວັດຖຸ ກໍຄືຈິດໃຈນັບມື້ນັບດີຂຶ້ນໄປເລື້ອຍໆ. ສະນັ້ນ, ຮຽກຮ້ອງມາຍັງບັນດາຜູ້ແທນກອງປະຊຸມ ຈົ່ງພ້ອມກັນຄົ້ນຄວ້າລົົງເລິກ ຕີລາຄາຕໍ່ຮ່າງບົດສະຫຼຸບວຽກງານ ວທ ດັ່ງກ່າວດ້ວຍການຊ່ວຍປະກອບຄໍາຄິດຄໍາເຫັນ, ແລກປ່ຽນບົດຮຽນຊຶ່ງກັນ ແລະ ກັນຢ່າງພາວະວິໄສ, ກົງໄປກົງມາ ເພື່ອໃຫ້ສາມາດຮູ້ໄດ້ຈຸດອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ແລ້ວຊອກຫາວິທີການແກ້ໄຂໃຫ້ມີຄວາມສອດຄ່ອງ ແລະ ແທດເໝາະກັບສະພາບເງື່ອນໄຂຕົວຈິງ. ຈາກນັ້ນ, ກໍພ້ອມກັນຄົ້ນຄວ້າຢ່າງລະອຽດຖີ່ຖ້ວນ ເພື່ອຄວາມເປັນເອກະພາບກັນ ໃນການກໍານົດໄດ້ທິດທາງແຜນການປະຈໍາປີ 2026 ຢ່າງມີຈຸດສຸມ, ພາວະວິໄສ ແລະ ແທດເໝາະກັບສະພາບເງື່ອນໄຂຕົວຈິງ ຕາມທິດຫັນເປັນ ສອຈ ຢ່າງແທ້ຈິງ ແນໃສ່ຍົກສູງບົດບາດວຽກງານ ວທ ມີບາດກ້າວຂະຫຍາຍຕົວໃໝ່ທີ່ເຂັ້ມແຂງ, ໜັກແໜ້ນ ແລະ ພົ້ນເດັ່ນຍິ່ງຂຶ້ນ ໃຫ້ສົມກັບຄໍາຂວັນທີ່ວ່າ: “ການນໍາພາເຂັ້ມແຂງ, ບຸກຄະລາກອນມີຄຸນນະພາບ, ວັດທະນະທຳສີວິໄລ, ທ່ອງທ່ຽວຍືນຍົງ ຫັນເປັນອຸດສາຫະກໍາທັນສະໄໝ ແລະ ສົ່ງເສີມການມີສ່ວນຮ່ວມຂອງສັງຄົມ”.
ທ່ານ ນາງ ດາລານີ ພົມມະວົງສາ ຮອງລັດຖະມົນຕີກະຊວງ ວທ ໄດ້ສະຫຼຸບລາຍງານການຈັດຕັ້ງປະຕິບັດວຽກງານ ວທ ທົ່ວປະເທດປະຈໍາປີ 2025 ແລະ ທິດທາງປີ 2026 ວ່າ: ໃນໄລຍະ 1 ປີຜ່ານມາ, ຄະນະພັກ-ຄະນະນໍາກະຊວງ ໄດ້ເອົາໃຈໃສ່ນໍາພາ-ຊີ້ນຳ, ສຶກສາອົບຮົມການເມືອງ-ແນວຄິດໃຫ້ພະນັກງານ-ລັດຖະກອນໄດ້ຮັບຮູ້, ເຂົ້າໃຈ ແລະ ເຊື່ອມຊຶມຕໍ່ແນວທາງ-ນະໂຍບາຍຂອງພັກ, ຄຽງຄູ່ກັບການຈັດຕັ້ງປະຕິບັດບັນດາກົດ ໝາຍ, ມະຕິ, ຄຳສັ່ງ ແລະ ລະບຽບການຕ່າງໆຂອງລັດ ໃນແຕ່ລະໄລຍະດ້ວຍຫຼາຍຮູບການ ເຮັດໃຫ້ມີຜົນສໍາເລັດຫຼາຍດ້ານ ເປັນຕົ້ນ ວຽກງານ ວທ: ໄດ້ຊຸກຍູ້ທ້ອງຖິ່ນສ້າງຄອບຄົວວັດທະນະທຳໄດ້ 20,861 ຄອບຄົວເທົ່າກັບ 80.23% ຂອງແຜນການປີ (ມະຕິສະພາ 26,000 ຄອບຄົວ); ສ້າງບ້ານວັດທະນະທໍາ 134 ບ້ານເທົ່າກັບ 89.33% ຂອງແຜນປີ (ມະຕິສະພາແຫ່ງຊາດ 150 ບ້ານ); ສ້າງບ້ານວັດທະນະທໍາຕົວແບບໄດ້ 1 ບ້ານໃນທົ່ວປະເທດ (ມະຕິສະພາ 2 ບ້ານ) ສາມາດປະຕິບັດໄດ້ 50%; ວຽກງານທ່ອງທ່ຽວ: ໃນປີ 2025 ໄດ້ຕ້ອນຮັບນັກທ່ອງທ່ຽວຕ່າງປະເທດເຖິງ 4,580,709 ເທື່ອຄົນ ຫຼື ລື່ນຄາດໝາຍ 5% (ຄາດໝາຍ: 4,36 ລ້ານເທື່ອຄົນ) ແລະ ນັກທ່ອງທ່ຽວພາຍໃນໄດ້ 4,617,987 ເທື່ອຄົນ ຫຼື ລື່ນຄາດໝາຍ 87% (ຄາດໝາຍ 2,46 ລ້ານເທື່ອຄົນ), ໄດ້ສໍາເລັດການສໍາຫຼວດ-ກໍານົດຂອບເຂດດິນແຫຼ່ງທ່ອງທ່ຽວຈໍານວນ 8 ແຫ່ງ ເທົ່າກັບ 266% ຂອງແຜນ ການ (ຄາດໝາຍ: 3 ແຫ່ງ) ຄື: ແຂວງບໍລິຄຳໄຊ 2 ແຫ່ງ, ຄຳມ່ວນ 1 ແຫ່ງ, ອັດຕະປື 1 ແຫ່ງ, ວຽງຈັນ 1 ແຫ່ງ ແລະ ແຂວງຊຽງຂວາງ 3 ແຫ່ງ.
ຂ່າວ: ວັນເພັງ; ພາບ: ອົ້ນ
