ໃນວັນທີ 19 ກຸມພາ 2026 ນີ້, ສະຫາຍ ພົນຕີ ກົງທອງ ສຸຂະວົງ ຮອງລັດຖະມົນຕີກະຊວງປ້ອງກັນປະເທດ ພ້ອມດ້ວຍຄະນະ ໄດ້ລົງມາຢ້ຽມຢາມ ທີມງານພາກສະໜາມ ກວດກູ້ ແລະ ທຳລາຍລະເບີດບໍ່ທັນແຕກເພື່ອມະນຸດສະທຳ ລາວ-ຣັດເຊຍ ປະຈຳສົກ 2025-2026 ຢູ່ແຂວງຫົວພັນ ໂດຍໃຫ້ການຕ້ອນຮັບຂອງ ສະຫາຍ ພັນໂທ ອັນເດຼ ບາລານຍຸກ ຫົວໜ້າໜ່ວຍງານກວດກູ້ລະເບີດ, ສູນກູ້ມິນສາກົນ, ວິທະຍາຄານທະຫານຊ່າງແສງ ກຳລັງປະກອບອາວຸດແຫ່ງ ສ ຣັດເຊຍ ພ້ອມຄະນະ 2 ຝ່າຍປະຈຳພາກສະໜາມ.
ເຊິ່ງການລົງມາຢ້ຽມຢາມໃນຄັ້ງນີ້, ສະແດງໃຫ້ເຫັນເຖິງຄວາມເປັນຫ່ວງເປັນໄຍ ຂອງຄະນະນຳກະຊວງປ້ອງປະເທດ ທັງເປັນສ້າງຂວັນກຳລັງໃຈ ໃຫ້ອ້າຍນ້ອງທີ່ປະຕິບັດໜ້າທີ່ທັງ 2 ຝ່າຍ ຄື ກອງທັບປະຊາຊົນລາວ ແລະ ກອງທັບ ແຫ່ງ ສ ຣັດເຊຍ ທີ່ກຳລັງປະຕິບັດໜ້າທີ່ ກວດກູ້ລະເບີດບໍ່ທັນແຕກ ທີ່ຕົກຄ້າງມາແຕ່ປາງສົງຄາມ, ເພື່ອເພີ່ມພື້ນທີ່ດິນໃຫ້ປະຊາຊົນ ເຂດເມືອງວຽງໄຊ ໄດ້ທຳມາຫາກິນ ປະສະຈາກ ໄພອັນຕະລາຍຕ່າງຈາກລະເບີດບໍ່ທັນແຕກ ທັງເປັນການຫັດແໜ້ນຄວາມສາມະຄີອັນພິເສດ ລະຫວ່າງ ສອງກອງທັບ ລາວ-ຣັດເຊຍ ໃຫ້ແໜ້ນແຟ້ນຍິ່ງຂຶ້ນ ພ້ອມດຽວກັນນີ້, ຍັງໄດ້ຮັບຟັງການອະທິບາຍວິທີການເຮັດວຽກຂອງອ້າຍນ້ອງປະຈຳຢູ່ພາກສະໜາມ ພ້ອມທັງລົງກວດເບິ່ງການປະຕິບັດໜ້າທີ່ຂອງອ້າຍຢູ່ພາກສະໜາມ.
ພາບ+ຂ່າວ: ຮທ ໄພລິນ ບຸນຍັງ
