ສຳນັກຂ່າວຕ່າງປະເທດລາຍງານວັນທີ 11 ກຸມພາ 2026 ວ່າ: ຄະນະສົງທີ່ເດີນທຸດົງເພື່ອສັນຕິພາບ (Walk For Peace) ຜ່ານ 9 ລັດ ທາງພາກຕາເວັນອອກຂອງສະຫະລັດອາເມລິກາ ລວມໄລຍະທາງກວ່າ 3,700 ກິໂລແມັດ ໄດ້ເດີນທາງເຖິງຈຸດໝາຍປາຍທາງ ທີ່ນະຄອນຫຼວງວໍຊິງຕັນ ດີຊີ ເປັນທີ່ຮຽບຮ້ອຍແລ້ວ, ຖືເປັນການສິ້ນສຸດພາລະກິດການເດີນທຸດົງທີ່ຍາວນານໃຊ້ເວລາດົນເຖິງ 108 ວັນ.
ຄະນະສົງດັ່ງກ່າວປະກອບມີພະພິກຂຸ 19 ອົງ, ນຳໂດຍ “ພະປັນນາກຣາພິກຂຸ” (Bhikkhu Pannakara) ພະສົງຊາວອາເມລິກາເຊື້ອສາຍຫວຽດນາມ. ການເດີນທາງໄດ້ເລີ່ມຕົ້ນຈາກວັດແຫ່ງໜຶ່ງໃນເມືອງ ຟອດເວີດ (Fort Worth), ລັດເທັກຊັດ ຕັ້ງແຕ່ທ້າຍເດືອນຕຸລາປີຜ່ານມາ ແລະ ມຸ່ງ ໜ້າສູ່ຈຸດໝາຍປາຍທາງທີ່ນະຄອນຫຼວງວໍຊິງຕັນ ດີຊີ ທ່າມກາງການຕ້ອນຮັບຢ່າງອົບອຸ່ນຈາກປະຊາ ຊົນໃນທຸກຈຸດທີ່ຜ່ານ.
ປັດຈຸບັນ, ຄະນະສົງໄດ້ພັກເຊົາຢູ່ທີ່ ມະຫາວິຫານແຫ່ງຊາດວໍຊິງຕັນ (Washington National Cathedral) ຫຼັງຈາກນີ້, ຄະນະສົງມີກຳນົດການຈະໄປຮ່ວມກິດຈະກຳຢູ່ທີ່ ອະນຸສອນສະຖານ ລິນຄອນ (Lincoln Memorial).
ຈຸດປະສົງຫຼັກຂອງພາລະກິດໃນຄັ້ງນີ້ ແມ່ນເພື່ອສົ່ງສັນຍານແຫ່ງສັນຕິພາບ, ຄວາມເມດຕາ ແລະ ຄວາມເຫັນອົກເຫັນໃຈໃຫ້ດັງກ້ອງໄປທົ່ວດິນແດນສະຫະລັດອາເມລິກາ ແລະ ທົ່ວໂລກ. ເຖິງແມ່ນວ່າຄວາມເຄື່ອນໄຫວນີ້ເກີດຂຶ້ນທ່າມກາງບັນຍາກາດທີ່ເຄັ່ງຕຶງໃນສະຫະລັດອາເມລິກາ, ເຊິ່ງສ່ວນໜຶ່ງມີສາເຫດມາຈາກມາດຕະການປາບປາມຜູ້ອົບພະຍົບທີ່ເຂັ້ມງວດຂອງລັດຖະບານ ໂດນັລ ທຣຳ. ໂດຍໄດ້ມີການສົ່ງເຈົ້າໜ້າທີ່ກອງກຳລັງພິທັກມາຕຸພູມ (National Guard) ໄປປະຈຳການໃນຫຼາຍເມືອງ, ໂດຍສະເພາະເມືອງທີ່ບໍລິຫານງານໂດຍພັກເດໂມແຄຣັດ.
