ວັນທີ 27 ມັງກອນ 2026,ທ່ານ ນາງ ຂັນທະລີ ສີລິພົງພັນ ປະທານຄະນະກໍາມະການພາລາແລັມປິກ ແຫ່ງຊາດລາວ ພ້ອມດ້ວຍຄະນະຮັບຜິດຊອບ ໄດ້ຈັດພິທີຊົມເຊີຍ ພ້ອມທັງຕ້ອນຮັບຄະນະນໍາ ແລະ ທັບນັກກິລາຄົນພິການທີມຊາດລາວ ທີ່ສາມາດຍາດໄດ້ເກີນຄາດໝາຍກັບຄືນສູ່ປະເທດໃນການເຂົ້າຮ່ວມແຂ່ງຂັນງານມະຫາກໍາກິລາ ອາຊຽນພາຣາເກມ ຄັ້ງທີ XIII ທີ່ຣາຊະອານາຈັກໄທ ເຊິ່ງຈັດຂຶ້ນໃນລະຫວ່າງ ວັນທີ 20-26 ມັງກອນ ຜ່ານມາ.
ທ່ານ ນາງ ຂັນທະລີ ສີຣິພົງພັນ ປະທານຄະນະກໍາມະການພາລາແລັມປິກແຫ່ງຊາດລາວ ໃຫ້ສໍາພາດວ່າ: ການເຂົ້າຮ່ວມແຂ່ງຂັນກິລາຄົນພິການອາຊຽນພາຣາເກມ ຄັ້ງທີ XIII ທີ່ສະໜາມກິລາ 80 ພັນສາ ນະຄອນຣາຊະສີມາ ປະ ເທດໄທຄັ້ງນີ້, ສປປ ລາວ ໄດ້ສົ່ງນັກກິລາເຂົ້າຮ່ວມທັງໝົດ 160 ກວ່າຄົນ ໃນ 12 ປະເພດກິລາ ແລະ ຜ່ານການແຂ່ງ ຂັນຕົວຈິງ ສາມາດຍາດໄດ້ຜົນງານເກີນຄາດໝາຍລວມທັງໝົດ 18 ຫຼຽນ ຄື: ຄວ້າໄດ້ 2 ຫຼຽນຄໍາ, 5 ຫຼຽນເງິນ ແລະ 11 ຫຼຽນທອງ. ສໍາລັບຫຼຽນຄຳ ທໍາອິດ ແມ່ນໄດ້ຈາກນັກກິລາຍິງປືນ ໃນລາຍການປືນຍາວ 50 ແມັດຊາຍ ຊື່ທ້າວ ໄຊສະຫວັນ ມະຫາໄຊ ແລະ ຫຼຽນຄໍາ ທີ 2 ແມ່ນທ້າວ ສະເຫຼີມໄຊ ໄຊຍະສິດ ນັກກິລາຟັນດາບ ປະເພດດ່ຽວ ດາບເຊີເວີຊາຍຄາດບີ ແລະ ຜູ້ກ່ຽວຍັງສາມາດຄວ້າໄດ້ອີກ 2 ຫຼຽນທອງ ຟັນດາບປະເພດທີມປະສົມ ດາບເອເປຊາຍຄາດບີ ອີກດ້ວຍ.
ໂອກາດນີ້, ທ່ານ ສິດປະກອນ ພົມມະວົງສາ ປະທານສະຫະພັນຍິງປືນຄົນພິການແຫ່ງຊາດລາວ ຍັງໃຫ້ສົມພາດອີກວ່າ: ຂ້າພະເຈົ້າຮູ້ສຶກພາກພູມໃຈເປັນຢ່າງຍິ່ງທີ່ນັກກິລາທັງສອງສະຫາຍສາມາດຍາດໄດ້ 2 ຫຼຽນຄໍາ ໂດຍສະເພາະກໍແມ່ນນັກກິລາຍິງປືນ ເຊິ່ງເປັນການສ້າງຜົນງານທີ່ເກີນຄາດໝາຍ ແລະ ໄດ້ນໍາເອົາກຽດສັກສີ ແລະ ຊື່ສຽງກັບມາໃຫ້ປະເທດຊາດ ແລະ ສະຫະພັນອີກດ້ວຍ. ພ້ອມນີ້, ໃນຕໍ່ໜ້າ, ສະຫະພັນຍັງຈະສືບຕໍ່ສົ່ງເສີມການພັດທະນານັກກິ ລາຍິງປືນຄົນພິການທີມຊາດລາວໃຫ້ຕໍ່ເນື່ອງ ເພື່ອຝຶກຝົນໃຫ້ເຂົາເຈົ້າມີຄວາມຊໍານິຊໍານານ,ຫ້າວຫັນ ແລະ ມີຄຸນນະ ພາບ ເພື່ອສືບຕໍ່ເຂົ້າແຂ່ງຂັນໃນຄັ້ງຕໍ່ໄປຢ່າງມີປະສິດທິຜົນສູງ.
ໂອກາດດຽວກັນ, ຄະນະຮັບຜິດຊອບ ພ້ອມດ້ວຍນັກກິລາ ຍັງໄດ້ເດີນທາງໄປວາງກະຕ່າດອກໄມ້ຢູ່ໜ້າຮູບປັ້ນຫຼໍ່ ປະທານ ໄກສອນ ພົມວິຫານ ເພື່ອເປັນການສະແດງຄວາມຮູ້ບຸນຄຸນ, ເຄົາລົບຮັກ ແລະ ລາຍງານຜົນສໍາເລັດໃນການແຂ່ງຂັນກິລາຄັ້ງນີ້ ອີກດ້ວຍ.
ຂ່າວ: ລັດດາວັນ ບຸດຕະວົງ
