ວັນທີ 26–30 ມັງກອນ 2026, ນະຄອນຫຼວງວຽງຈັນກັບມາຄຶກຄື້ນອີກຄັ້ງ ດ້ວຍກິ່ນຫອມ ລົດຊາດ ແລະ ຄວາມພາກພູມໃຈທາງວັດທະນະທຳ ເນື່ອງໃນໂອກາດທີ່ ງານເທດສະການອາຫານລາວ ປີ 2026 ຄັ້ງທີ 21 ຈັດຂຶ້ນທີ່ ສວນເຈົ້າອານຸວົງ ພາຍໃຕ້ຄຳຂວັນ “ສຳຜັດຄວາມເປັນລາວ ຜ່ານລົດຊາດອາຫານລາວ”. ເປັນໜຶ່ງໃນງານດ້ານວັດທະນະທຳທີ່ຍິ່ງໃຫຍ່ທີ່ສຸດຂອງປະເທດ, ງານນີ້ໄດ້ຮວບຮວມເອົາຄວາມຫຼາກຫຼາຍຂອງອາຫານລາວຈາກເໜືອຮອດໃຕ້ ເຊິ່ງມີຮ້ານຄ້າເຂົ້າຮ່ວມຫຼາຍກວ່າ 180 ຮ້ານ, ເປັນງານທີ່ມີການນຳສະເໜີອາຫານປະຈຳພາກ, ຜະລິດຕະພັນທ້ອງຖິ່ນ ແລະ ຂະບວນການປຸງແຕ່ງທີ່ສືບທອດກັນມາດົນນານ.
ບໍລິສັດ ເບຍລາວ ຈຳກັດ ໄດ້ເປັນຄູ່ຮ່ວມຍຸດທະສາດ ແລະ ໃຫ້ການສະໜັບສະໜູນຢ່າງຕໍ່ເນື່ອງຫຼາຍປີແກ່ງານເທດສະການອາຫານລາວ ແລະ ບໍລິສັດຍັງຄົງສືບຕໍ່ບົດບາດດັ່ງກ່າວດ້ວຍຄວາມຄວາມພາກພູມໃຈ ເປັນຜູ້ສະໜັບສະໜູນຫຼັກໃຫ້ກັບງານຄັ້ງທີ່ 21 ໃນປີນີ້ອີກດ້ວຍ ເພື່ອຢັ້ງຢືນຄວາມມຸ່ງໝັ້ນໃນການສົ່ງເສີມວັດທະນະທຳອາຫານລາວ ແລະ ຊຸມຊົນທ້ອງຖິ່ນ.
ພາຍໃນງານຜູ້ເຂົ້າຮ່ວມຈະໄດ້ສຳຜັດການເດີນທາງຜ່ານລົດຊາດອາຫານລາວຢ່າງແທ້ຈິງ, ຕັ້ງແຕ່ອາຫານຈານຫຼັກທີ່ມີຊື່ສຽງ, ອາຫານຈານຍ່ອຍທ້ອງຖິ່ນແບບກິນງ່າຍ, ໄປຈົນເຖິງຜະລິດຕະພັນກະສິກຳທ້ອງຖິ່ນ, ຫັດຖະກຳ ແລະ ສິນຄ້າຈາກຊຸມຊົນ, ພ້ອມກັບບັນຍາກາດທີ່ຄຶກຄື້ນທີ່ແຄມແມ່ນ້ຳຂອງ.
ແນ່ນອນວ່າງານເທດສະການອາຫານລາວກໍ່ຕ້ອງຄູ່ກັບເຄື່ອງດື່ມຄູ່ໃຈອັນເປັນເອກະລັກ ນັ້ນກໍ່ຄື ເບຍລາວ ເຊິ່ງຢູ່ຄູ່ວັດທະນະທຳການກິນຢູ່ຂອງຄົນລາວ ເຊິ່ງເປັນທີ່ຮູ້ຈັກແລະນິຍົມກັນດີໃນຄວາມເຂົ້າກັນໄດ້ຢ່າງລົງໂຕກັບອາຫານລາວຫຼາກຫຼາຍປະເພດ. ບໍລິສັດບໍ່ພຽງແຕ່ມີສ່ວນຮ່ວມໃນງານນີ້ເທົ່ານັ້ນ ແຕ່ຍັງສືບຕໍ່ການເປັນສ່ວນໜຶ່ງຂອງວັດທະນະທຳອາຫານລາວໃນຊີວິດປະຈຳວັນ ພ້ອມທັງຈະມາຕື່ມຄວາມແຊບໃຫ້ກັບທຸກລົດຊາດຕະຫຼອດງານ.
ພິເສດພາຍໃນງານໄດ້ມີ ບູທເບຍລາວ ທີ່ຈະມານຳສະເໜີປະສົບການຄວາມມ່ວນຊື່ນ. ຜູ້ເຂົ້າຮ່ວມງານສາມາດເຂົ້າຮ່ວມຫຼິ້ນກິດຈະກຳ ເພື່ອທົດສອບຄວາມຮູ້ກ່ຽວກັບເບຍລາວ ສຳລັບຜູ້ທີ່ຢາກລອງທ້າທາຍຕົນເອງ ແລະ ຜູ້ທີ່ເປັນແຟນພັນແທ້ເບຍລາວຕົວຈິງກໍ່ສາມາດເຂົ້າຮ່ວມໄດ້ (ສຳລັບບຸກຄົນທີ່ມີອາຍຸ18ປີຂື້ນໄປ) ເພື່ອລຸ້ນຮັບລາງວັນຈາກທາງເບຍລາວ, ບອກເລີຍວ່າບູທນີ້ຈະມາສ້າງຄວາມຄຶກຄື້ນໃຫ້ກັບບັນຍາກາດພາຍໃນງານ. ພາກັນແວ່ມາຫຼິ້ນຫຼາຍໆເດີແລ້ວທ່ານຈະຮູ້.
ງານນີ້ເປັນຫຼາຍກວ່າງານເທດສະການອາຫານລາວ, ເປັນທັງການສະເຫຼີມສະຫຼອງອາຫານປະຈຳຊາດ ແລະ ຄວາມພາກພູມໃຈທາງວັດທະນະທຳ, ພ້ອມທັງເປັນເວທີສຳຄັນໃຫ້ແມ່ຍິງໄດ້ສະແດງບົດບາດ ແລະ ຄວາມສາມາດໃນການອະນຸລັກອາຫານລາວ, ສົ່ງເສີມວັດຖຸດິບທ້ອງຖິ່ນ ແລະ ຂັບເຄື່ອນຄວາມເປັນແມ່ຄ້າຊາວຂາຍ ຫຼື ນັກທຸລະກິດ.
