ຂປລ. ພິທີ ມອບ-ຮັບໜ້າທີ່ ເລຂາຄະນະບໍລິຫານງານພັກແຂວງອັດຕະປື ລະຫວ່າງ ສະຫາຍ ພົທ ວັນທອງ ກອງມະນີ ເລຂາທິການສູນກາງພັກ ເລຂາຄະນະບໍລິຫານງານພັກແຂວງອັດຕະປື ຜູ້ເກົ່າ ແລະ ສະຫາຍ ບຸນເຖິງ ດວງສະຫວັນ ກໍາມະການສູນກາງພັກ ເລຂາຄະນະບໍລິຫານງານພັກ ແຂວງອັດຕະປື ຜູ້ໃໝ່ ຈັດຂຶ້ນໃນວັນທີ 22 ມັງກອນ 2026 ທີ່ຫໍປະຊຸມໃຫຍ່ຂອງແຂວງ ໂດຍເປັນກຽດເຂົ້າຮ່ວມຂອງ ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ ນາຍົກລັດຖະມົນຕີ ແຫ່ງ ສປປ ລາວ, ພ້ອມດ້ວຍພາກສ່ວນທີ່ກ່ຽວຂ້ອງຂັ້ນສູນກາງ, ຂັ້ນແຂວງ ແລະ ເມືອງເຂົ້າຮ່ວມ.
ໃນພິທີ, ສະຫາຍ ວິສຸກ ພົມພິທັກ ຮອງຫົວໜ້າຄະນະຈັດຕັ້ງສູນກາງພັກ ໄດ້ຜ່ານບັນດານິຕິກໍາຕ່າງໆ ເປັນຕົ້ນ ຄຳສັ່ງຂອງກົມການເມືອງສູນກາງພັກ, ສະບັບເລກທີ 05/ກມສພ, ລົງວັນທີ 16 ມັງກອນ 2026 ວ່າດ້ວຍການຍົກຍ້າຍ ພະນັກງານການນຳຂັ້ນສູງໄປຮັບໜ້າທີ່ໃໝ່ ໂດຍຍົກຍ້າຍ ສະຫາຍ ພົທ ວັນທອງ ກອງມະນີ ຄະນະເລຂາທິການສູນກາງພັກ, ເລຂາຄະນະບໍລິຫານງານພັກແຂວງອັດຕະປື ຜູ້ເກົ່າ ໄປຮັບໜ້າທີ່ໃໝ່ຢູ່ກະຊວງປ້ອງກັນຄວາມສະຫງົບ, ຜ່ານມິຕິກົມການເມືອງສູນກາງພັກ, ສະບັບເລກທີ 14/ກມສພ, ລົງວັນທີ 16 ມັງກອນ 2026 ວ່າດ້ວຍການແຕ່ງຕັ້ງ ເລຂາຄະນະບໍລິຫານງານພັກແຂວງອັດຕະປື ໂດຍແຕ່ງຕັ້ງ ສະຫາຍ ບຸນເຖິງ ດວງສະຫວັນ ກຳມະການສູນກາງພັກ, ເປັນເລຂາພັກແຂວງອັດຕະປື ຜູ້ໃໝ່.
ໃນພິທີຍັງໄດ້ຜ່ານ ດໍາລັດຂອງນາຍົກລັດຖະມົນຕີ ສະບັບເລກທີ 821/ນຍ ລົງວັນທີ 23 ທັນວາ 2025 ວ່າດ້ວຍການແຕ່ງຕັ້ງ ທ່ານ ທະນູໄຊ ບັນຊາລິດ ເປັນປະທານຄະນະກໍາມະການປົກຄອງແຂວງອັດຕະປື, ຜ່ານຂໍ້ຕົກລົງ ຄະນະກໍາມະການປົກຄອງແຂວງ ສະບັບເລກທີ 30/ປຄປຂ ລົງວັນທີ 16 ມັງກອນ 2026 ວ່າດ້ວຍການແຕ່ງຕັ້ງ ທ່ານ ສຸລິວົງ ອະໄພວົງ ແລະ ທ່ານ ສີໄລ ສີສະແຫວງສຸກ ທັງສອງ ເປັນຮອງປະທານຄະນະກໍາມະການປົກຄອງແຂວງອັດຕະປື.
ໂອກາດດັ່ງກ່າວ, ສະຫາຍ ສອນໄຊ ສີພັນດອນ ໄດ້ເນັ້ນໃຫ້ບັນດາສະຫາຍການນຳທຸກຂັ້ນຂອງແຂວງອັດຕະປື ເປັນເອກະພາບນຳຂັ້ນເທິງ ຕໍ່ກັບການສັບປ່ຽນພະນັກງານການນຳຂັ້ນສູງຂອງແຂວງ ກໍຄືຂອງພັກ, ສືບຕໍ່ປົກປັກຮັກສາ ແລະ ເສີມສ້າງຄວາມສາມັກຄີພາຍໃນພັກ, ເອົາໃຈໃສ່ນໍາພາ-ຊີ້ນໍາວຽກພັກ-ພະນັກງານໃຫ້ດີ, ເພີ່ມທະວີວຽກງານກວດກາໃຫ້ເຂັ້ມແຂງ ແລະ ແກ້ໄຂຜົນການກວດກາ, ຕ້ານການເສື່ອມຄຸນປ່ຽນທາດ, ຕ້ານການສໍ້ລາດບັງຫລວງຂອງພະນັກງານໃຫ້ເຂັ້ມງວດ ໄປພ້ອມກັບການເຮັດວຽກງານສຶກສາອົບຮົມການເມືອງ-ແນວຄິດ ຂອງສະມາຊິກພັກ, ພະນັກງານ-ລັດຖະກອນ, ທະຫານ-ຕຳຫລວດ ແລະ ປະຊາຊົນບັນດາເຜົ່າ ຮັບຮູ້ເຂົ້າໃຈແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ, ສືບຕໍ່ເອົາໃຈໃສ່ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຂອງພັກ ກໍຄືມະຕິກອງປະຊຸມໃຫຍ່ຂອງອົງຄະນະພັກແຂວງອັດຕະປື ສະໄໝປັດຈຸບັນ ແລະ ແຜນພັດທະນາເສດຖະກິດ-ສັງຄົມຂອງແຂວງ ຕິດພັນກັບການປະຕິບັດ 2 ວາລະແຫ່ງຊາດບົນຈິດໃຈສືບຕໍ່ສ້າງການຫັນປ່ຽນໃໝ່ ຢ່າງແຂງແຮງ, ເລິກເຊິ່ງ ແລະ ຮອບດ້ານ ເພື່ອແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ບັນຫາໄພເງິນເຟີ້, ຄ່າຄອງຊີບສູງ, ການເໜັງຕີງແຮງຂອງອັດຕາແລກປ່ຽນ ທີ່ສົ່ງຜົນກະທົບເຖິງແນວຄິດ, ຈິດໃຈ ແລະ ຊີວິດການເປັນຢູ່ຂອງສະມາຊິກພັກ, ພະນັກງານ-ລັດຖະກອນ, ທະຫານ-ຕຳຫລວດ ແລະ ປະຊາຊົນບັນດາເຜົ່າ ໂດຍສະເພາະ ບຸກທະລຸການສ້າງເສັ້ນທາງເຊື່ອມຈອດພາຍໃນແຂວງ, ຕ່າງແຂວງ, ຕ່າງປະເທດໃຫ້ສະດວກສະບາຍ, ບຸກທະລຸການແກ້ໄຂຄວາມທຸກຍາກຂອງປະຊາຊົນບັນດາເຜົ່າ ແລະ ພັດທະນາແຫລ່ງທ່ອງທ່ຽວພາຍໃນແຂວງໃຫ້ສໍາເລັດຕາມແຜນການ, ສືບຕໍ່ຍູ້ແຮງການພັດທະນາເສດຖະກິດ-ສັງຄົມຂອງແຂວງ ໃຫ້ແຂງແຮງກວ່າເກົ່າ ເປັນຕົ້ນ ສຸມໃສ່ຊຸກຍູ້ສົ່ງເສີມຂະບວນການຜະລິດເປັນສິນຄ້າ ໃຫ້ສືບຕໍ່ຂະຫຍາຍຕົວຢ່າງແຂງແຮງ, ກວ້າງຂວາງ ແລະ ມີຄຸນນະພາບສູງຂຶ້ນ ເພື່ອທົດແທນການນຳເຂົ້າ ແລະ ສົ່ງອອກຫລາຍຂຶ້ນຕື່ມ, ສ້າງພື້ນຖານລາຍຮັບທີ່ໝັ້ນຄົງ ແລະ ຍາວນານຂອງແຂວງ ໂດຍຕິດພັນກັບການແກ້ໄຂຄວາມທຸກຍາກຂອງປະຊາຊົນ, ຊຸກຍູ້ສົ່ງເສີມການຜະລິດ ທີ່ເປັນໜໍ່ແໜງໃໝ່ຂອງປະຊາຊົນ ໃຫ້ເປັນຂະບວນການກວ້າງຂວາງ ເພື່ອເຮັດໃຫ້ຊີວິດການເປັນຢູ່ຂອງປະຊາຊົນນັບມື້ດີຂຶ້ນ, ອັນສໍາຄັນແມ່ນຕ້ອງຊຸກຍູ້ໃຫ້ປະຊາຊົນ ເປັນເຈົ້າຕົນເອງໃນການພັດທະນາຊີວິດການເປັນຢູ່ ແລະ ຍົກລະດັບແບບແຜນດໍາລົງຊີວິດທີ່ກ້າວໜ້າກວ່າເກົ່າ ເພື່ອເຮັດໃຫ້ຄອບຄົວຫລຸດພົ້ນອອກຈາກຄວາມທຸກຍາກ, ເອົາໃຈໃສ່ເພີ່ມທະວີ ແລະ ຍົກສູງປະສິດທິພາບໃນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ, ສືບຕໍ່ເອົາໃຈໃສ່ຊີ້ນຳວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ມີຄວາມສະຫງົບປອດໄພ, ສືບຕໍ່ປັບປຸງກົງຈັກການຈັດຕັ້ງໃຫ້ເຂັ້ມແຂງ ໜັກແໜ້ນ ຕາມທິດກະທັດຮັດ, ມີປະສິດທິພາບ ຕິດພັນກັບການກະກຽມດຳເນີນການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະພາປະຊາຊົນແຂວງ ຊຸດທີ V. ພ້ອມນີ້, ຕ້ອງຖືສໍາຄັນໃນການເລືອກເຟັ້ນເອົາພະນັກງານຜູ້ທີ່ດີ ເພື່ອຫັນລົງກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດຮອບດ້ານ ແກ້ໄຂຄວາມທຸກຍາກ ແລະ ການປະຕິບັດວຽກງານ 3 ສ້າງ, ນໍາພາຊຸກຍູ້ຂະບວນການແຂ່ງຂັນຮັກຊາດ ແລະ ພັດທະນາໃຫ້ດີຂຶ້ນເທື່ອລະກ້າວ.
ຂ່າວ: ວ.ຫລວງອາໄພ
