ສະຖານການຄວາມເຄັ່ງຕຶງໃນຕາເວັນອອກກາງປະທຸໜັກ ຫຼັງ ເບນຈາມິນ ເນທັນຍາຮູ ນາຍົກລັດຖະມົນຕີອິດສະຣາເອນ ແຖລງຢືນຢັນວ່າ ອິດສະຣາເອນໄດ້ໂຈມຕີທຳລາຍໂຄງສ້າງສຳຄັນຂອງແຫຼ່ງກາ໋ສຍັກ “ເຊົາ ພາ” ຂອງອີຣ່ານແລ້ວ
ເນທັນຍາຮູລະບຸໃນຄລິບວິດີໂອວ່າ ປະຕິບັດການດັ່ງກ່າວແມ່ນສ່ວນໜຶ່ງຂອງແຜນໂຈມຕີຢ່າງເປັນລະບົບ ເພື່ອທຳລາຍ ເຄື່ອງຈັກສ້າງລາຍຮັບ ຂອງກອງກຳລັງພິທັກຮັກສາການປະຕິວັດອິດສະລາມ (Revolutionary Guard) ໂດຍກ່າວວ່າ ອິດສະຣາເອນກຳລັງທຳລາຍໂຮງງານ ກຳຈັດເຄືອຂ່າຍ ແລະ ເດີນໜ້າຈັດການບຸກຄົນລະດັບສູງຢ່າງຕໍ່ເນື່ອງ
ດ້ານ ອິດສະຣາເອນ ແຄັດຊ໌ ລັດຖະມົນຕີກາລາໂຫມອິດສະຣາເອນ ເປີດເຜີຍວ່າ ການໂຈມຕີເກີດຂຶ້ນທີ່ໂຮງງານປີໂຕຣເຄມີ South Pars (ເຊົາ ພາ) ໃນເມືອງ Assaluyeh ຊຶ່ງເປັນສູນກາງການຜະລິດປີໂຕຣເຄມີທີ່ໃຫຍ່ທີ່ສຸດຂອງອີຣ່ານ
ລາວລະບຸວ່າ ເປົ້າໝາຍດັ່ງກ່າວມີຄວາມສຳຄັນຍ່ິງ ເນື່ອງຈາກຜະລິດປີໂຕຣເຄມີຄິດເປັນປະມານ 50% ຂອງທົ່ວປະເທດ ແລະ ຖືເປັນໜຶ່ງໃນເສົາຫຼັກທາງເສດຖະກິດຂອງອີຣ່ານ
ກ່ອນໜ້ານີ້ ການໂຈມຕີພື້ນທີ່ South Pars ໃນເດືອນມີນາ ໄດ້ຈູດຊົນວົນໃຫ້ອີຣ່ານ ເປີດການໂຕ້ຕອບດ້ວຍການໂຈມຕີໂຄງສ້າງພື້ນຖານດ້ານນ້ຳມັນ ແລະ ກາ໋ສໃນກຸ່ມປະເທດອ່າວອາຣັບ ສ້າງຄວາມກັງວົນຕໍ່ສະຖຽນລະພາບພະລັງງານໂລກ
ດ້ານໂຄສົກກອງທັບອິດສະຣາເອນ ນາດາຟ ໂຊຊານີ ລະບຸພຽງວ່າ ອີຣ່ານຈະບໍ່ມີຄວາມຄຸ້ມກັນໃດໆ ທ່າມກາງການເຈລະຈາທີ່ກຳລັງດຳເນີນຢູ່
ຂະນະດຽວກັນ ສະຫະລັດອາເມລິກາ ຍັງບໍ່ທັນໄດ້ອອກມາສະແດງທ່າທີຕໍ່ການໂຈມຕີດັ່ງກ່າວໃນທັນທີ ເຖິງແມ່ນຈະມີລາຍງານວ່າ ອິດສະຣາເອນ ແລະ ສະຫະລັດໄດ້ຮ່ວມກັນເປີດການໂຈມຕີອີຣ່ານໃນວັນດຽວກັນ ສົ່ງຜົນໃຫ້ມີຜູ້ເສຍຊີວິດຫຼາຍກວ່າ 25 ຄົນ
ມີລາຍງານວ່າ ຫຼັງການໂຈມຕີ ອີຣ່ານໂຕ້ຕອບດ້ວຍການຍິງຂີປະນາວຸດໃສ່ອິດສະຣາເອນ ແລະ ປະເທດເພື່ອນບ້ານໃນອ່າວອາຣັບ ສົ່ງສັນຍານຄວາມຂັດແຍ່ງທີ່ມີທ່າອ່ຽງລາມໄໝ່ໃນວົງກວ້າງ.
ຂ່າວຈາກ:
