ຜູ້ລົງທຶນກໍ່ສ້າງ ໃນນະຄອນຫຼວງວຽງຈັນ ໃນປະຈຸບັນ ກຳລັງປະເຊີນກັບ ລາຄາວັດສະດຸຂື້ນລາຄາຢ່າງໄວວາ ເຊິ່ງບາງປະເພດເພີ່ມຂື້ນເກືອບ 50%.
ບັນຫາລາຄານ້ຳມັນແພງ ເປັນສາເຫດຕົ້ນຕໍ່ເຮັດໃຫ້ຜູ້ປະກອບການ ແລະ ພາກທຸລະກິດ ຕ້ອງໄດ້ປັບລາຄາສິນຄ້າ ຂອງຕົນ ເພື່ອປະຄັບປະຄອງທຸລະກິດ ແລະ ການບໍລິການ ຂອງເຂົາເຈົ້າ ເນຶ່ອງຈາກຕົ້ນທຶນເພີ່ມຂື້ນສູງ. ນັບແຕ່ຕົ້ນເດືອນມີນາ ລາຄານ້ຳມັນ ພາຍໃນປະເທດ ໄດ້ຖືກປັບຂື້ນ ຈຳານວນ 5 ຄັ້ງ ໃນໄລຍະສັ້ນໆ ແລະ ປັບລົງຈຳນວນ 1 ຄັ້ງ.
ນັບແຕ່ມີການປັບລາຄານ້ຳມັນ, ລາຄາບາງປະເພດວັດສະດຸຮັບໃຊ້ວຽກງານການກໍ່ສ້າງ ກໍ່ໄດ້ປັບຂື້ນຕາມການປ່ຽນແປງຂອງລາຄານ້ຳມັນຕາມໆກັນ. ໜຶ່ງໃນວັດສະດຸທີ່ມີລາຄາແພງຂື້ນໄດ້ແກ່ ແຮ່ຫີນຄົບ ແລະ ແຮ່ຊາຍ.
ໃນໄລຍະສະພາບລາຄານ້ຳມັນຄົງທີ່ ປົກກະຕິ ຜູ້ສະໜອງວັດຖຸເຫຼົ່ານີ້ ດ້ວຍລົດບັນທຸກຂະໜາດນ້ອຍ ຈະສະໜອງໃຫ້ຜູ້ກໍ່ສ້າງ ໃນລາຄາ 800,000 ກີບ ຕໍ່ທ້ຽວ ເຊິ່ງຈະບັນຈຸແຮ່ຫີນ ແລະ ແຮ່ຊາຍ ຢ່າງລະເຄິ່ງລົດ ຈາກນັ້ນຜູ້ສະໜອງກໍ່ຄ່ອຍປັບລາຄາຂື້ນ ເປັນ 1.2 ລ້ານກີບ ແລະ ປະຈຸບັນ ແມ່ນ 1,400,000 ກີບ ຂື້ນກັບໄລຍະທາງຂອງການສະໜອງ, ອີງຕາມຜູ້ໃຫ້ບໍລິການຂົນສົ່ງແຮ່ຫີນ ແລະ ແຮ່ຊາຍ.
ລາຄາວັດສະດຸເຫຼົ່ານີ້ ອາດຈະມີແນວໂນ້ມແພງຂື້ນ ຕາມການປ່ຽນແປງ ຂອງກະແສລາຄານ້ຳມັນໂລກ.
ໃນປະຈຸບັນ ຜູ້ລົງທຶນກໍ່ສ້າງ ຕ້ອງແບກຫາບ ຄ່າໃຊ້ຈ່າຍເພີມຂື້ນ ເພາະວ່າບໍ່ພຽງແຕ່ລາຄາແຮ່ຫີນ ແລະ ແຮ່ຊາຍແພງຂື້ນເທົ່ານັ້ນ ຜູ້ຜະລິດ ແລະ ຜູ້ສະໜອງວັດສະດຸກໍ່ສ້າງອື່ນໆ ເຊັ່ນ: ຫີນບ໋ອກ ລວມໄປເຖິງຮ້ານຂາຍເຄຶ່ອງກໍ່ສ້າງຕ່າງໆ ກໍ່ມີການປັບຄ່າບໍລິການເຊັ່ນກັນເພື່ອຮັກສາສະຖຽນລະພາບຂອງທຸລະກິດ.
ອິງຕາມສະຖິຕິ ຂອງກົມການຄ້າພາຍໃນ ກະຊວງ ອຸດສາຫະກຳ ແລະ ການຄ້າ, ກົມການຄ້າພາຍໃນ ໄດ້ປັບລົງລາຄານ້ຳມັນ ຄັ້ງຫຼ້າສຸດແມ່ນ ໃນວັນທີ 19 ເດືອນກຸມພາ ໃນນີ້ ແອັດຊັ່ງພິເສດ ຈາກ 26,450 ກີບ/ລິດ ມາເປັນ 26,020 ກີບ/ລິດ; ແອັດຊັ່ງທຳມະດາ 22,460 ກີບ/ລິດ ມາເປັນ 21,990 ກີບ/ລິດ; ແລະ ກະຊ່ວນ ຈາກ 19,810 ກີບ/ລິດ ມາເປັນ 19,640 ກີບ/ລິດ. ແຕ່ເລີ່ມຕົ້ນວັນທີ 3 ເດືອນມີນາ ລາຄານ້ຳມັນ ພາຍໃນປະເທດ ໄດ້ຖືກປັບຂື້ນ, ວັນທີ 5 ແລະ ວັນທີ 9 ໄດ້ຖືກປັບຂື້ນອີກ ສອງຄັ້ງ ແລະ ວັນທີ 11 ໄດ້ມີການປັບລົງເລັກໜ້ອຍ. ຈາກນັ້ນ ວັນທີ 13 ແລະ ວັນທີ 17 ກໍ່ໄດ້ຖືກປັບຂື້ນອີກສອງຄັ້ງ. ປະຈຸບັນ ລາຄານ້ຳມັນ ແອັດຊັງທຳມະດາ ຢູ່ບັນດາປ້ຳ ໃນນະຄອນຫຼວງວຽງຈັນ ແມ່ນ 36,900 ກີບ/ລິດ ແລະ ກາຊ່ວນ ແມ່ນ 37,100 ກີບ/ລິດ.
