ແຫລ່ງຂ່າວຈາກ ແຂວງຈຳປາສັກໃຫ້ຮູ້ວ່າ: ພະແນກໂຍທາທິການ ແລະ ຂົນສົ່ງ (ຍທຂ) ແຂວງຈໍາປາສັກ ເປີດບໍລິການແລ່ນລົດເມສາທາລະນະ ປະຈຳສາຍທາງພາຍໃນເທສະບານນະຄອນປາກເຊ ໂດຍບໍ່ເສຍຄ່າ ໃນວັນທີ 17 ມີນາ 2026 ທີ່ຫ້ອງວ່າການແຂວງ ໂດຍມີທ່ານ ສຸກສະຫວັນ ວິໄລວົງ ປະທານຄະນະກໍາມະການປົກຄອງແຂວງຈຳປາສັກ, ທ່ານ ສິດທິພອນ ບຸດຕິວົງ ຫົວໜ້າພະແນກ ຍທຂ ແຂວງ ພ້ອມດ້ວຍການນໍາຫ້ອງວ່າການແຂວງ, ການນໍາພະແນກການກົມກອງອ້ອມຂ້າງແຂວງ, ພະແນກ, ຂະແໜງ, ກອງ ແລະ ພະນັກງານວິຊາການ ພາຍໃນພະແນກ ຍທຂ ແຂວງ ເຂົ້າຮ່ວມ.
ໃນພິທີ, ທ່ານ ສິດທິພອນ ບຸດຕິວົງ ໄດ້ລາຍງານວ່າ: ການເປີດບໍລິການແລ່ນລົດເມສາທາລະນະ ປະຈຳສາຍທາງພາຍໃນເທສະບານນະຄອນປາກເຊ ໂດຍບໍ່ເສຍຄ່າຄັ້ງນີ້ ຂອບເຂດ ແລະ ເສັ້ນທາງບໍລິການຈະເນັ້ນໃສ່ເສັ້ນທາງສາຍຫລັກພາຍໃນເທສະບານແຂວງ ແລະ ເສັ້ນທາງເຊື່ອມຕໍ່ເຂດຊານເມືອງ ທີ່ເປັນຈຸດຈຳເປັນໃນການໄປ-ມາ. ສ່ວນແຜນການນໍາໃຊ້ລົດເມ ແລະ ກຳນົດສາຍທາງ ນັ້ນ, ພະແນກ ຍທຂ ແຂວງ ໄດ້ສ້າງແຜນນໍາໃຊ້ ແລະ ກຳນົດສາຍທາງ ໃນເທສະບານນະຄອນປາກເຊ ແລະ ສາຍທາງນະຄອນປາກເຊ ຫາ ບັນດາເມືອງໃກ້ຄຽງ ຄື: ສາຍທາງໃນເທສະບານນະຄອນປາກເຊ ມີ 1 ສາຍທາງ ຄື: ສາຍທາງຫລັກ 7 ເໜືອ-ຫລັກ 8 ໃຕ້, ຈໍານວນລົດແລ່ນ 2 ຄັນ, ແລ່ນຕາມທາງ 13 ໃຕ້, ຈຸດເລີ່ມຕົ້ນສະຖານນີຂົນສົ່ງໂດຍສານຫລັກ 7 ເໜືອ ແລະ ສະຖານີຂົນສົ່ງໂດຍສານ ຫລັກ 8 ໃຕ້, ເວລາເລີ່ມຕົ້ນ 6 ໂມງ ຫາ 20:30 ໂມງ, ໜຶ່ງຮອບ 2 ຊົ່ວໂມງ, 7 ຖ້ຽວຕໍ່ມື້, ຈຸດຈອດລົດຮັບຜູ້ໂດຍສານມີດັ່ງນີ້: ຄິວຫລັກ 7 ເໜືອ,ທາງເຂົ້າບ້ານດອນເຂາະ, ທາງເຂົ້າໂຮງຮຽນຂັບຂີ່ໂພຊີໄຄ, ໜ້າສະໜາມບິນ, ຕະຫລາດມີໄຊ (ທ່າຫີນ), ໜ້າສໍານັກງານປົກຄອງນະຄອນປາກເຊ, ໜ້າສະໜາມແດງ, ຕະຫລາດສະບາຍດີ, ໜ້າສະໜາມກິລາ, ໜ້າວິທະຍາໄລຄູ ປາກເຊ, ໂຮງງານ ຊີບີເອັບ, ວິທະຍາໄລ, ກະສິກກຳ ຫລັກ 6 ແລະ ສະຖານີຫລັກ 8 ໃຕ້.
ສາຍທາງ ນະຄອນປາກເຊ ຫາ ບັນດາເມືອງ ມີ 1 ສາຍທາງ, ຈໍານວນ 2 ຄັນ ຄື: ສາຍທາງຕະຫລາດໃໝ່ປາກເຊ (ຕະຫລາດດາວເຮືອງ) ຫາ ຕະຫລາດຫລັກ 14 ເມືອງບາຈຽງຈະເລີນສຸກ, ຈໍານວນລົດແລ່ນ 2 ຄັນ, ແລ່ນໄປທາງສາລາຂຽວ-ກັບທາງສາລາຂຽວ, ເວລາເລີ່ມຕົ້ນ 6 ໂມງ, ສິ້ນສຸດ 17:30, ໜຶ່ງຮອບ 2 ຊົ່ວໂມງ, ຈຸດຈອດລົດຮັບຜູ້ໂດຍສານດັ່ງນີ້: ຕະຫລາດໃໝ່ປາກເຊ (ຕະຫລາດດາວເຮືອງ), ໜ້າໂຮງຮຽນ ມສ ປາກເຊ, ສາມແຍກທາງເຂົ້າບັງເຢາະ, ໜ້າຮ້ານ ມະຫາໄຊ, ໜ້າສູນໂຕໂຢຕ້າ, ໜ້າຮ້ານສຸວັນນີ, ໜ້າໂຮງຮຽນປະຖົມບ້ານພັດທະນາ, ທາງເຂົ້າ ມະຫາວິທະຍາໄລຈຳປາສັກ, 3 ແຍກ ໂຮງຮຽນ ມ ປາຍພອນສະຫວັນ, ວິທະຍາໄລເຕັກນິກວິຊາຊີບ ແຂວງຈໍາປາສັກ (ຫລັກ 9), ໜ້າວັດຫລັກ 10, ໜ້າວັດຫລັກ 12, ໜ້າຄ້າຍທະຫານກອງພົນທີ 5 (ຫລັກ 13) ແລະ ຕະຫລາດຫລັກ 14.
ໂອກາດນີ້, ທ່ານ .ສຸກສະຫວັນ ວິໄລວົງ ໄດ້ມີຄໍາເຫັນວ່າ: ການເປີດໃຫ້ບໍລິການລົດເມໂດຍສານສາທາລະນະໂດຍບໍ່ເສຍຄ່າ ຄັ້ງນີ້ ສຸດທີ່ມີຄວາມໝາຍສໍາ ໂດຍອີງຕາມທິດຊີ້ນໍາຂອງ ທ່ານເລຂາຄະນະບໍລິຫານພັກແຂວງຈໍາປາສັກ ຄັ້ງວັນທີ 11 ມິນາ 2026 ທັງເປັນການຈັດຕັ້ງປະຕິບັດຄໍາສັ່ງຂອງນາຍົກລັດຖະມົນຕີ ເລກທີ 40/ນຍ, ລົງວັນທີ 13 ມີນາ 2026 ວ່າດ້ວຍການເພີ່ມທະວີແກ້ໄຂບັນຫາຜົນກະທົບຈາກລາຄານໍ້າມັນເຊື້ອໄຟ. ສໍາລັບຄ່າໃຊ້ຈ່າຍໃນການເປີດບໍລິການລົດເມສາທາລະນະໂດຍບໍ່ສາຄ່າຄັ້ງນີ້ ແມ່ນຄະນະພັກ-ອົງການປົກຄອງແຂວງ ເປັນຜູ້ຮັບຜິດຊອບ. ຈຸດປະສົງ ກໍເພື່ອເປັນການແບ່ງເບົາພາລະຄ່າໃຊ້ຈ່າຍໃນລະດັບໜຶ່ງ ແລະ ອໍານວຍຄວາມສະດວກໃນການສັນຈອນໄປ-ມາ ຂອງພໍ່ແມ່ປະຊາຊົນ, ພະນັກງານ, ທະຫານ, ຕຳຫລວດ ແລະ ນັກຮຽນ-ນັກສຶກສາ ໃນສະພາບວິກິດການຂາດແຄນນໍ້າມັນເຊື້ອໄຟ ແລະ ລາຄານໍ້າມັນເພີ່ມຂຶ້ນສູງທັງເປັນການຮ່ວມກັນປະຢັດ ພະລັງງານ ແລະ ຫລຸດຜ່ອນການນໍາໃຊ້ພາຫະນະສ່ວນຕົວໃນໄລຍະວິກິດການນີ້. ນະໂຍບາຍນີ້ຈະປະຕິບັດໄປຈົນກວ່າສະພາບການຂາດແຄນນໍ້າມັນຈະຜ່ອນຄາຍລົງ ແລະ ລາຄານໍ້າມັນກັບຄືນສູ່ສະພາບປົກກະຕິ.
ໃນຕໍ່ໜ້າ, ຖ້າວ່າສະພາບການຂາດແຄນນໍ້າມັນຍັງບໍ່ທັນຜ່ອນຄາຍ, ພະແນກ ຍທຂ ແຂວງ ຈະສືບຕໍ່ເປີດບໍລິການລົດເມສາທາລະນະໂດຍບໍ່ເສຍຄ່າຕື່ມອີກ 2 ສາຍ ຄື: ສາຍທາງ ທ່າສາລາຄໍາ ຫາ ຕະຫລາດດາວເຮືອງ ແລະ ສາຍທາງ ຕະຫລາດໃໝ່ປາກເຊ (ຕະຫລາດດາວເຮືອງ) ຫາ ຫ້ອງວ່າການປົກຄອງເມືອງຊະນະສົມບູນ.
ຂ່າວ-ພາບ: ທູນທອງໃຈ
